ازيا چەمپيوناتى: قازاقستانعا قازاق كۇرەسىنەن قارسىلاستار كوبەيىپ جاتىر

بۇگىن تۇركىستان قالاسىندا قازاق كۇرەسىنەن ەرەسەكتەر اراسىندا وتكەن ازيا چەمپيوناتى اياقتالدى.

Qazaq Kuresi اسسوتسياتسياسى، تۇركىستان وبلىستىق دەنە شىنىقتىرۋ جانە سپورت باسقارماسى مەن وبلىستىق قازاق كۇرەسى فەدەراتسياسىنىڭ ۇيىمداستىرۋىمەن جالاۋى كوتەرىلگەن سارىقۇرلىق دوداسىندا قازاقستان قۇراماسى 16 سالماق دارەجەسىندە 10 التىن، 4 كۇمىس جانە 4 قولا مەدال الىپ، جالپىكوماندالىق ەسەپتە ءبىرىنشى ورىندى يەلەندى.

بۇگىن چەمپيوناتتىڭ ەكىنشى كۇنى دە بەلدەسۋلەر اسا تارتىستى جانە قىزىقتى ءوتتى.  كۇرەس ساعات 11.00-دە باستالىپ، كەش قارايعانعا دەيىن بولدى. وسى ۋاقىت ارالىعىندا 8 سالماقتا فينالدىق بەلدەسۋلەر ءوتىپ، Olympic center سپورت كەشەنىنە جينالعان جۇرتشىلىقتى ەرەكشە كۇيگە ءبولدىرىپ، ءتانتى ەتتى.  راسىن ايتۋ كەرەك، بۇرىن قازاق بالۋاندارىمەن ەشبىر ەلدىڭ وكىلدەرى يىق تەڭەستىرىپ باسەكەلەسە المايتىن. قاراكوزدەرىمىز شىن قارسىلاس بولماعان سوڭ، التىن جۇلدەنىڭ ءبارىن ساناپ، ارقالاپ اكەتەتىن. ال بۇل جولى تىپتەن باسقاشا بولدى. وزبەك، قىرعىز، تاجىك ەلىنىڭ سپورشىلارى ءتول كۇرەسىمىزبەن شىنداپ اينالىسا باستاعانىن كورسەتتى.

چەمپيوناتتىڭ ءبىرىنشى كۇنى قىزدار اراسىندا 56 كگ سالماقتا وزبەكستاننىڭ وكىلى نوزيگۋل حولميرزاەۆا، 65 كەلىدە تاعى ءبىر وزبەك سپورتشىسى مۋسليماحون احمەدوۆا التىن جۇلدەنى السا، ەكىنشى كۇنى 52 كگ سالماقتا سيتورا يلمۋرودوۆا، 70 كەلىدە سەۆينگ تۋراكۋلوۆا ازيا چەمپيونى اتاعىن جەڭىپ الدى. ءبىر قىزىعى، ولار فينالدا وتانداستارىمىزدان ايلاسىن اسىرىپ كەتتى. سيتورا يلمۋرودوۆا ساعات بالعاراەۆانى جەڭسە، سەۆينگ تۋراكۋلوۆا اقبوتا قىدياليدەن باسىم ءتۇستى. ءبىر قىزىعى دەيمىز-اۋ، ەگەر قىزدار كۇرەسى وسىلاي تارتىستى بولىپ، جالعاسا بەرسە، بولاشاقتا چەمپيوندىق اتاقتى جەڭىپ الاتىن سپورتشىنى الدىن الا بولجاي المايتىن تا شىعارمىز. بۇعان ارينە، قۋانۋ كەرەك. بۇل قازاق كۇرەسىنە دەگەن قىزىعۋشىلىقتىڭ، باسەكەلەستىكتىڭ ارتىن جاتقانىن بىلدەرەدى.

60 كەلى سالماقتا قىرعىز قىزى بەگاي بەيشاناليدىڭ باعىن جاندى. ول وزبەكستاندىق حۋرشيدا تۋحليەۆانى جەڭدى. ال ءۇشىنشى ورىن وتانداسىمىز نازەركە اسانحانعا بۇيىردى.

بۇگىن قىزدار اراسىندا ءبىر التىن جۇلدەنى الدىق. 77 كەلىدەن اسا سالماقتا ارايلىم شەگەنوۆا وزبەكستاننىڭ وكىلى پوكيجاحون كامولدينوۆادان مىقتىراق بولدى. قولا مەدالدى ءۇندى سپورتشىسى يشا بحرات پاتيل الدى. ايتقانداي، چەمپيوناتتىڭ ەكىنشى كۇنى دە ءۇندىستاننىڭ بالۋاندارى جاقسى ناتيجە كورسەتتى.

52 كەلىدە انجالي انجالي ءۇشىنشى ورىن السا، 70 كەلى سالماقتا قولا جۇلدەنى ونىڭ تاعى ءبىر وتانداسى مينا مينا قولا جۇلدەنى قاناعات تۇتتى.

قىزدار كۇرەسى وسىنداي ناتيجەمەن اياقتالدى.

ەرلەر اراسىندا ءتورت سالماقتىڭ ۇشەۋىندە قازاق بالۋاندارى ۇستەمدىك ەتتى.

نۇرتىلەۋ قاراكەسەكوۆ (60 كگ)، تىلەك توقتاسىنوۆ (74)، قايسار ءشامشيدينوۆ (+100 كگ) ءوز سالماقتارىندا ازيا چەمپيونى اتاندى. ال 90 كگ سالماقتا حاكنازار نازاروۆتىڭ جولى بولىپ، ول التىن مەدالدى جەڭىپ الدى. بۇل سلاماقتاعى كۇرەستىڭ تارتىستى وتكەنىن ايتۋ كەرەك.  تاجىك بالۋانى فينالدا يران سپورشىسى سەيەدموحاممادرەزا ساەەديمادانيدى جەڭدى.  قولا مەدال قازاق بالۋانى ايدار بەسكەمپىر مەن وزبەكستاندىق دوستونبەك حولماحمادوۆقا بۇيىردى.

جالپى ايتساق، ەرلەر كۇرەسىندە ەكىنشى كۇنى قازاقستان، تاجىكستان، وزبەكستان، يران مەن قىرعىزستاننىڭ بالۋاندارى جۇلدەنىڭ ءبارىن ءوزارا ءبولىپ الدى.

يران التىن جۇلدە الماسا دا 2 كۇمىس، 1 قولا مەدال، تاجىكستان 1 التىن، 1 كۇمىس، 2 قولا، قىرعىزستان 1 كۇمىس، وزبەكستان 2 قولا جۇلدەنى يەلەندى.

وسىلايشا، ازيا چەمپيوناتىنىڭ  ەكىنشى كۇنى ەل قۇراماسىنىڭ قورجىنىنا 4 التىن، 2 كۇمىس، 2 قولا مەدال ءتۇسىپ، جالپىكوماندالىق ەسەپتە 10 التىن، 4 كۇمىس جانە 2 قولا مەدالمەن 260 ۇپاي جينادى.

وزبەكستان (4 التىن، 2 كۇمىس، 2 قولا، 250 ۇپاي) ەكىنشى ورىنعا، قىرعىزستان (1 التىن، 4 كۇمىس، 2 قولا، 189 ۇپاي) ۇشىنشگى ورىنعا شىقتى.

ەندى 30-31 قازان كۇندەرى تۇركىستان قالاسىندا تاعى ءبىر دۇرمەكتى دودا بولادى. وسى جەردە قازاق كۇرەسىنەن الەم كۋبوگى جالاۋ كوتەرەدى.

داستان كەنجالين،

تۇركىستان