Tektiden tekti týady

«Tektiden tekti týady», degen tálsim mán-maǵynasyn joǵaltqan emes. Rasymende túbinde áıteýir urpaǵynyń birinde ata-baba jolyn qaıtalaıtyn bireý dúnıege keleri anyq. Muny tipti ǵalymdar da dáleldeıdi. Al aıtpaǵymyz qazaqta dál osyndaı urpaq qýalap keletin jaǵdaılar kóp kezdesedi. Mysaly, Almaty oblysy Narynqol aýdanynda marqum Noǵaı Músirbekti bilmeıtin jan joq. Eldegi eski kózdermen kezdesip, Noǵaı týraly suraı qalsań, ol kisiniń qandaı el dep týǵan er ekenin saǵyna eske alady.

Noǵaı týǵan aýylynyń jotasyndaǵy taýǵa qysta shańǵy sportymen aýyl jastary men turǵylyqty halyq aınalyssyn dep aspaly jol salǵan adam. Sport meketibiniń dırektory bolyp júrgende qanshama shákirtter tárbıelep, elge aty tanylǵan ustaz. Tipti, óziniń týǵan uly Tımýr erkin kúresten jasóspirimder arasynda álem chempıonatynyń altyn júldesin jeńip alsa, jan-jary Roza apaıymyz júgirýden Qazaqstannyń birneshe dúrgen chempıony atanǵan eken. Mine, otbasymen óńir sportyna ólsheýsiz úles qosqan jandardyń nemerleri de jeńisti joldy jalǵastyryp keledi eken.

Senbi kúni Almaty oblysy Ile aýdany, О́tegen kentindegi Balalar men jasóspirimder sport mektebinde elge belgili úzdik ustaz, kóp jyldar boıy Muqaǵalı Maqataev atyndaǵy №13 orta mektepte dırektor bolyp qyzmet etken marqum Ǵalııa Nádibekqyzyn eske alýǵa arnalǵan dzıýdo kúresinen jasóspirimder arasynda dúbirli jarys bolyp ótti.

Bul jarysqa Jetisý oblysy men Almaty oblysynyń kóptegen aýdandarynan 150-ge tarta jas balýandar kelip qatysty. Jarystyń saltanatty ashylýyna Balalar men jasóspirmder sport mektebiniń dırektory, Qazaqstan Respýblıkasynyń eńbegi sińgen jattyqtyrýshy, Ile aýdanynyń qurmetti azamaty Qapar Raýanov, Qazaqstan Respýblıkasynyń eńbegi sińgen jattyqtyrýshy, jarysty uıymdastyrýshy Tólegen Sultanov, Ǵalııa Nádirbekqyzynyń týǵan uly men kóptegen qurmetti azamattar qatysyp, balaýandarǵa tabysty beldesýler tiledi.

Ashylýy aıaqtalǵan soń balýandar jekpe-jegi qyza jalǵasty. Joǵaryda aıtyp ótkenimizdeı Noǵaı Músirbektiń týǵan nemeresi Altynaıdyń kúresine tánti bolmaǵan jan joq shyǵar. Ol qarsylastaryn alyp ta shalyp ta jyǵyp, óziniń sheberligin jankeshti kúresterimen aıqyn kórsetti. Kilem shetinde qyzynyń kúresine kúıip pisip, alyp-ushyp júrgen ákesi Tımýr bilgenin aıtyp, qyzyn qamshylaı túsýde. Noǵaı Músirbektiń bel nemeresi ekenin kórip bilgen kónekóz jankúıerler de Altynaıdyń kúresine qyzyǵy qarap, úlken áser aldy.

«Tektiden tekti týady», — degen qaǵıda osyndaıda belgi beretinine kóz jetkendeı boldy. Bir qyzyǵy, voleıbolǵa qatysyp júrgen Altynaı áke jolyn qýyp kúreske aýysyp ketse kerek. Dzıýdo úıirmesine ol óziniń jan qurbysy Alýamen birge baryp, qatysa bastaıdy.

Alýa da naǵyz balýannyń sheberi bolyp ósip keledi. Bul týrnırde ol qarsylas shaq keltirmeı qoǵadaı japyra fınalǵa shyǵyp, jeńimpaz atandy. Negizi, Almaty oblysynda sport úlken jolǵa qoıylǵan. Alysqa barmaı-aq keshegi kúni aıaqtalǵan úshinshi Azııa oıyndarynda ulttyq quramada óner kórsetken Almaty oblysynyń sportshylary altyn júldemen, júldegerler qatarynan kórinip, el namysyn abyroımen qorǵap qaıtty.

Sonymen Ǵalııa Nádirbekqyzyn eske alýǵa arnalǵan jarysta jeńis bıigine kóterilgen jósóspirim ul-qyzdar uıymdastyrýshylardyń ázirlegen marapattaryna ıe bolyp tarqasty. Bul jarys oblystyń jyltizbesine kirgen eken. Uıymdastyrýshylar aldaǵy jyldary respýblıkalyq deńgeıge kóterýdi maqsat etip otyr eken.

Aqyn ORDABAIULY,

Almaty oblysy