SportPress.kz قازاقستان سپورت جاڭالىقتارى
قازاقستاننىڭ ءبىرىنشى، الەمنىڭ 6-راكەتكاسى ەلەنا رىباكينا ساۋد ارابياسىنىڭ ەر-رياد قالاسىندا وتكەن WTA قورىتىندى تۋرنيرىندە ۇزدىك شىقتى، دەپ حابارلادى قازاقستان تەننيس فەدەراتسياسى.
تەننيسشى فينالدا الەمنىڭ 1-راكەتكاسى، «ۇلكەن دۋلىعا» ءتۋرنيرىنىڭ ءتورت دۇركىن جەڭىمپازى، بەلارۋس وكىلى ارينا سوبولەنكومەن وينادى.
ءبىرىنشى پارتيادا ەسەپ 3:2 بولعان كەزدە رىباكينا برەيك جاساپ، سول باسىمدىلىعىن 6:3 ەسەبىمەن ساقتاپ قالدى.
ەكىنشى سەتتە تاي-برەيكتە رىباكينا بەت قاراتپادى. ەسەپ – 7:6 (7:0).
وسىلايشا، رىباكينا جارىس 1972 جىلى ۇيىمداستىرىلعاننان بەرى جەڭىمپاز اتانعان العاشقى ازيالىق تەننيسشى اتاندى. بۇعان دەيىن قىتايلىقتار لي نا (2013 جىلى) مەن چجەن تسينۆەن (2024) تەك فينالعا دەيىن جەتكەن ەدى.
رىباكينا بارلىق ويىندى جەڭىپ، 1 500 رەيتينگىلىك ۇپايعا قوسا 5،235 ملن دوللار (2،747 ملرد تەڭگە) تابىس تاپتى. وعان قوسا دۇيسەنبىدە جاڭارتىلاتىن WTA رەيتينگىسىندە 5-ورىنعا كوتەرىلەدى.
سونىمەن قاتار رىباكينا 2016 جىلدان بەرى ەيس سانىن 500-دەن اسىرعان ءبىرىنشى تەننيسشى بولدى. 2016 جىلى مۇنداي ناتيجەگە چەحيالىق كارولينا پليشكوۆا جەتكەن ەدى.
بۇدان بولەك، ەلەنا رىباكينا بيىلعى ماۋسىمدا توپ-10-عا كىرەتىن 7 تەننيسشىنى قاپى قالدىرىپ، بۇل جونىنەن ۇزدىك شىقتى. رىباكينا سپورتتىق جولىندا ۋيمبلدونداعى جەڭىسىن قوسقاندا، WTA دودالارىندا 11 تيتۋل جەڭىپ الدى. مۇنداي مەجەگە قازاقستاننان ەشكىم جەتكەن ەمەس.
