Rybakına WTA týrnırin jeńgen alǵashqy azııalyq tennısshi atandy

Qazaqstannyń birinshi, álemniń 6-raketkasy Elena Rybakına Saýd Arabııasynyń Er-Rııad qalasynda ótken WTA qorytyndy týrnırinde úzdik shyqty, dep habarlady Qazaqstan tennıs federaııasy.

Tennısshi fınalda álemniń 1-raketkasy, «Úlken dýlyǵa» týrnıriniń tórt dúrkin jeńimpazy, Belarýs ókili Arına Sobolenkomen oınady.

Birinshi partııada esep 3:2 bolǵan kezde Rybakına breık jasap, sol basymdylyǵyn 6:3 esebimen saqtap qaldy.

Ekinshi sette taı-breıkte Rybakına bet qaratpady. Esep – 7:6 (7:0).

Osylaısha, Rybakına jarys 1972 jyly uıymdastyrylǵannan beri jeńimpaz atanǵan alǵashqy azııalyq tennısshi atandy. Buǵan deıin qytaılyqtar Lı Na (2013 jyly) men Chjen ınven (2024) tek fınalǵa deıin jetken edi.

Rybakına barlyq oıyndy jeńip, 1 500 reıtıngilik upaıǵa qosa 5,235 mln dollar (2,747 mlrd teńge) tabys tapty. Oǵan qosa dúısenbide jańartylatyn WTA reıtıngisinde 5-orynǵa kóteriledi.

Sonymen qatar Rybakına 2016 jyldan beri eıs sanyn 500-den asyrǵan birinshi tennısshi boldy. 2016 jyly mundaı nátıjege chehııalyq Karolına Plıshkova jetken edi.

Budan bólek, Elena Rybakına bıylǵy maýsymda TOP-10-ǵa kiretin 7 tennısshini qapy qaldyryp, bul jóninen úzdik shyqty. Rybakına sporttyq jolynda Ýımbldondaǵy jeńisin qosqanda, WTA dodalarynda 11 tıtýl jeńip aldy. Mundaı mejege Qazaqstannan eshkim jetken emes.