«Ertis» óz oıynshylaryna qaryzǵa baılanysty málimdeme jasady

Áleýmettik jelide Pavlodar qalasynyń «Ertis» klýbynyń fýtbolshylar men qyzmetkerlerine birneshe aıdan beri jalaqy tóleı almaı jatqany týraly aqparat shyqty.

Eldar_amanvibe telegram arnasynda jarııalanǵan jazbaǵa qaraǵanda, Qazaqstan premer-lıgasyna joldama alǵan «Ertis» komandasy óz oıynshylary men qyzmetkerlerine mıllıondaǵan teńge qaryz. Klýb bes aıdan beri syıaqy da tóleı almaı keledi.

Qolda bar derekke qaraǵanda, klýbtyń bıylǵy Birinshi lıgadaǵy bıýdjeti 1 mlrd 332 mln teńge bolǵan. Osy aqparatqa qatysty «Ertis» FK resmı málimdeme jasady.

— Klýbtyń oıynshylary men qyzmetkerleri aldynda jalaqy boıynsha eshqandaı bereshegi joq. Áleýmettik jelide taralǵan aqparat shyndyqqa janaspaıdy. Fýtbolshylar, jattyqtyrýshylar men ákimshilik personal aldyndaǵy barlyq qarjylyq mindetteme tolyq ári belgilengen merzimde oryndalǵan.

Klýbtyń málimetine súıensek, oıynshylardyń FIFA-ǵa habarlasýǵa daıyndalyp jatyr degen aqparat ta jalǵan.

-«Ertis» fýtbol klýby jumysyn jalǵastyryp, kelesi maýsymǵa daıyndyqqa nazar aýdaryp otyr, — delingen habarlamada.

Pavlodardyń klýby Qazaqstan Premer-lıgasyna «Kaspıı» men «Altaı» komandalary sııaqty joldama alǵan.

Dastan KENJALIN,

ASTANA