قازاقستان كۇرەس فەدەراتسياسىنا جاڭا باسشى كەلدى

بۇگىن «گرەك-ريم، ەركىن جانە ايەلدەر كۇرەسى فەدەراتسياسى» رەسپۋبليكالىق قوعامدىق بىرلەستىگىنىڭ جىلدىق قورىتىندى كونفەرەنتسيا وتىرىسىندا قازاقستان كۇرەس فەدەراتسياسىنا جاڭا باسشىنى سايلاۋ ءراسىمى بولدى.

بۇعان دەيىن فەدەراتسياسىنىڭ پرەزيدەنتى قىزمەتىن اتقارعان داڭقتى بالۋان، پارلامەنت ءماجىلىسىنىڭ دەپۋتاتى داۋلەت تۇرلىحانوۆتىڭ ورنىنا كاسىپكەر ەركىن وقاسوۆ سايلاندى.

قازاقستان كۇرەس فەدەراتسياسىنىڭ الەۋمەتتىڭ جەلىدەگە پاراقشاسىندا داۋلەت تۇرلىحانوۆ قىزمەتىنەن كەتەتىنىن جاريا ەتتى.

— بۇگىن مەن قازاقستان كۇرەس فەدەراتسياسىنىڭ پرەزيدەنتى قىزمەتىن اياقتاۋ تۋرالى شەشىم قابىلدادىم. بۇل ءساتتى مەن تەرەڭ العىس سەزىمىمەن قابىلدايمىن. ءوزىنىڭ جۇرەگىن قازاقستان كۇرەسىن دامىتۋعا ارناپ، سوڭعى 4 جىلدا بىرگە ەڭبەك ەتكەن ءاربىر جانعا – باپكەرلەرگە، سپورتشىلارعا، وڭىرلىك فەدەراتسيالارعا، تورەشىلەرگە، دارىگەرلەرگە، سەرىكتەستەرىمىزگە جانە كۇن سايىن تاباندى ەڭبەك ەتكەن بارلىق ازاماتتارعا شىنايى العىس ايتقىم كەلەدى. مەنىڭ باسشىلىعىم كەزىندە ەلىمىز ماقتان تۇتارلىق ناتيجەلەرگە جەتتى.

اتاپ ايتقاندا، پاريج-2024 وليمپياداسىنىڭ كۇمىس جۇلدەسى ەرەسەكتەر اراسىندا 3 الەم چەمپيونى، 23 جاسقا دەيىنگى سپورتشىلار اراسىندا 3 الەم چەمپيونى، 20 جاسقا دەيىنگى سپورتشىلار اراسىندا 4 الەم چەمپيونى، 17 جاسقا دەيىنگى سپورتشىلار اراسىندا 4 الەم چەمپيونى شىقتى. بۇل جەڭىستەر – ءبىزدىڭ ءبىرتۇتاس كوماندامىزدىڭ ەڭبەگى، كۇرەسىمىزدىڭ بولاشاعىنا سەنگەن، تاباندىلىق تانىتقان، جانكەشتىلىكپەن جۇمىس ىستەگەن ادامداردىڭ ورتاق جەتىستىگى، — دەدى داۋلەت تۇرلىحانوۆ.

سونداي-اق ول ۇلكەن جولدى بىرگە ءجۇرىپ وتكەنىن اتاپ ءوتىپ، قازاق كۇرەسىنىڭ حالىقارالىق ارەناداعى بەدەلىن نىعايتقانىن جەتكىزدى.

— ءىرى حالىقارالىق تۋرنيرلەردى جوعارى دەڭگەيدە وتكىزدىك. جاس تالانتتارعا جاڭا مۇمكىندىكتەر اشتىق. وسى تاريحي كەزەڭنىڭ ءبىر بولىگى بولۋ – مەن ءۇشىن ۇلكەن قۇرمەت. بىراق سپورت تەك ساباقتاستىق پەن العا جىلجۋ بار جەردە داميدى. جاڭا كوماندا جاڭا كوزقاراس، تىڭ يدەيالار جانە ءبىزدىڭ سۇيىكتى سپورتىمىزدى دامىتۋعا تىڭ سەرپىن اكەلەتىنىنە شىن جۇرەكتەن سەنەمىن. جاڭا پرەزيدەنتكە جانە فەدەراتسيا ۇجىمىنا زور تابىس تىلەيمىن. ءاربىر قادام ءبىزدى جاڭا جەڭىستەرگە، جاڭا چەمپيوندارعا، ەلىمىزدەگى بارلىق كۇرەس تۇرلەرىنىڭ بىردەي ءارى قارقىندى دامۋىنا باستاي بەرسىن. سەنىمدەرىڭىزگە، قولداۋلارىڭىزعا جانە بىرلەسكەن ەڭبەگىمىزگە مىڭ العىس. مەن وتانىمىزعا قىزمەت ەتۋدەن ەشقاشان باس تارتپايمىن. قازاقستاندى دامىتۋ – مەنىڭ باستى باسىمدىعىم جانە ەلگە، قوعامعا پايدا تيگىزە الاتىن كەز كەلگەن جەردە ءوز ۇلەسىمدى قوسا بەرەتىن بولامىن، — دەدى ول.

بۇدان بۇرىن داۋلەت تۇرلىحانوۆ ازيا كۇرەس فەدەراتسياسى باسشىلىعىنان كەتكەن بولاتىن.

ونىڭ ورنىنا سايلانعان ەركىن وقاسوۆ تا قازاقستان كۇرەس فەدەراتسياسىنىڭ جۇمىسىنا قاتىستى ءوز وي-پىكىرىن ءبىلدىردى.

— كۇرەستىڭ تۋىن تۇسىرمەي، قازاق سپورتىن الەمگە اسقاقتاتا بەرۋ ءۇشىن بار كۇش-جىگەرىمدى سالامىن. سەنىم بىلدىرگەن بارشا جاندارعا مىڭ العىس جانە وزدەرىڭىزدىڭ قولداۋلارىڭىز ارقىلى تالاي بەلەستەردى بىرگە باعىندىرامىز دەپ سەنەمىن، — دەدى ەركىن وقاسوۆ.

ەركىن وقاسوۆ – باتىس قازاقستان وبلىسىنىڭ تۋماسى. كاسىپكەر، «ۆد ستروي-ينجينيرينگ» جشس باقىلاۋ كەڭەسىنىڭ توراعاسى. وسى ۋاقىتقا دەيىن «Qazaq kuresi» قاۋىمداستىعىنىڭ ۆيتسە-پرەزيدەنتى قىزمەتىن اتقاردى.

داستان كەنجالين،

استانا