…جەرەبە تاستالدى — ساۋەگەيلىك باستالدى!

…الەم چەمپيوناتىنىڭ اۋىز كوپىرتەر اڭگىمەلەرى از ەمەس! 2026 جىلى ءۇش مەملەكەتتىڭ فۋتبول الاڭدارىندا وتەتىن بۇل ءتورت جىلدىڭ باستى فۋتبول دوداسى كۇتپەگەن كەمشىلىكتەرگە ءسۇرىنىپ، ينفانتينو باستاعان فيفا قاراعىم جەرگە قاراپ جۇرمەسە بولعانى. ونداي تالاس-تارتىستىڭ شەتى بۇگىن-اق قىلتيىپ تۇر…

سونىمەن، 48 كوماندانى جىلىكتەپ-مۇشەلەپ، 12 توپقا ءبولىپ، قوراعا قامادىق. ولارعا كوكتەمدە كەلىپ قوسىلاتىن 8 كوماندانى قوسا ايتىپ وتىرمىن. اقش-تىڭ 11، مەكسيكانىڭ 3، كانادانىڭ 2 قالاسىندا توپتىق ويىندار اياقتالعان سوڭ، وسى 12 توپتان 1-2 ورىن العان 24 كوماندا كەلەسى كەزەڭگە، ياعني 1/16 فينالعا جولداما الادى. مۇنان سوڭ… وسى 12 توپتا 3-ءشى ورىن العان 12 كوماندانىڭ 8-ءى الگى 24 كومانداعا قوسىلىپ(؟)، ۇزىن سانىن 32-گە جەتكىزەدى دە، جەڭىلگەنى جارىستان شىعىپ قالاتىن 1/16 فينال باستالادى.

باستى كەمشىلىك وسىندا! و زامان دا بۇ زامان الەم چەمپيوناتىندا ءوز توبىندا 3-ءشى ورىن العان كوماندا جارىستى جالعاستىرۋشى ما ەدى؟! ول كوماندالاردىڭ كىمدەر بولاتىنىن ءبىلۋ ءۇشىن فۋتبولدى مىقتى بىلەتىن عالىم بولىپ كەرەگى جوق. بۇل فيفا-نىڭ 48 كوماندا جايلى عايىپتان ويلاپ تاپقان جاڭالىعىنان تۇمسىعى تاسقا تىرەلىپ، سودان شىعاتىن جول تاپقان ءتۇرى! ويتكەنى، قانشا جەردەن ميلى باستار جينالسا دا 48 كوماندانى توپتىق كەزەڭنەن سوڭ 32-لىك پلەي-وفف كەستەسىنە سارت ەتكىزىپ ورنالاستىرا المايدى! سوندىقتان دا كەيىنگى 8 كوماندا، ماتەماتيكالىق ەسەپ كەزىندە قالدىق قالعان سەكىلدى، سول ورىندى تولتىرۋعا كەرەك بوپ تۇر! ال، مۇنداي اۋىلبايلاعان ءادىس قولدانۋ — الەمدىك فۋتبول چەمپيوناتىن وتكىزۋ كەزىندە لايىق تا ەمەس، داۋسىز دا ەمەس!!!

ول ول ما؟.. ەندى فيفا-نىڭ رەيتينگى… دەگەندى كولدەنەڭ تارتىپ، الگى 24-ءتىڭ ىشىنەن يسپانيا مەن ارگەنتينا ما، فرانتسيا مەن انگليا ما… ولار توپتان شىققاندا، 1/16 فينالدىڭ العاشقى ويىندارىندا بىردەن شەكەلەسىپ قالاتىنداي بولسا، ولاردى جاساندى جەرەبەگە سۇيەنىپ، ءبولىپ جىبەرمەك… قازاق ايتاتىن مۇندايدا: «ءبىر تويدا ەكى جار جوق!» دەپ. سول ايتقانداي، ۆاشينگتوندا وتكەن ءبىر جەرەبە تاستاۋدان كەيىن «تاعى جەرەبەمەن بولەمىز!» دەگەندەرى قاي ساسقانى؟ فيفا سەكىلدى قارجىسى مۇحيت بوپ شالقىپ جاتقان ۇيىمدا وسىنى ەسكەرەتىن، وسىدان ساقتاناتىن، وسىعان جەتكىزبەيتىن ءبىر تورەشىنىڭ تابىلماعانى ما؟! ماقتاندى دەمەڭىزدەر، قازاقستان رەسپۋبليكاسىنىڭ جوعارى ۇلتتىق دارەجەدەگى تورەشىسى دەگەن اتاعىم بار، وسى فۋتبولىڭنان-اق تالاي جارىس وتكىزىپ ءجۇرمىن عوي، وسى شارۋانى ماعان بەرگەندە، مەن ەشكىم قىڭق دەمەيتىندەي ەتىپ ءبىر-اق جەرەبەمەن بۇكىل 48 كوماندا قاتىساتىن الەم چەمپيوناتىنىڭ تىزگىنىن تارتىپ، تالاسسىز وتەتىن كەستە جاساپ بەرەر ەدىم! وسى 48-ءدى ويلاپ تاپقان فيفا عوي، سونى ويلاعاندا ونى شەشۋ جولىن نەگە ويلاماعان؟ مىسالى… اقىر ماقتاندىم عوي: مىناداي قاراپايىم ءبىر عانا ءادىس ايتايىن: بۇيرەكتەن سيراق شىعارىپ، قاتىساتىن كوماندالار سانىن 48 قىلدىڭ با، وندا ولاردى 16 توپقا ءبول دە، ارقايسىسىنا 3 كوماندادان ورنالاستىر! سوسىن توپتىق جارىس قورىتىندىسى بويىنشا 16 توپتان ەكى-ەكىدەن 32 كوماندا شىعادى دا، 1/16 فينالداعى 32 ورىنعا جايعاسا كەتەدى. سول جاعدايدا 3-ءشى ورىن العان كوماندالاردى دا ساپىرىپ اۋرە بولمايسىڭ، فيفا رەيتينگى دەگەن جاساندى جەرەبەگە دە ۇرىنبايسىڭ… ءا، ءاااا، ونى مەن دە بىلەمىن، فيفا-عا كوبىرەك ويىن وتكىزگەن پايدالى، ويتكەنى ءار ويىن بۋما-بۋما اقشا… مىسالى، ەگەر دە 16 توپقا ءۇش كوماندادان عانا جيناسا، بۇكىل چەمپيوناتتا بولاتىن 104 ويىننىڭ ورنىنا نەبارى… 80-اق ويىن بولادى. سوندىقتان دا ءبىر توپقا 3 كوماندادان جينامايدى. «ءار توپتا ءتورت كوماندادان بولۋى كەرەك!» دەيسىز بە، وندا 48 كوماندامەن 1/16 فينالعا ادىلەتتى تۇردە سارت ەتىپ تۇسە قالاتىن 32 كوماندانى فيفا-نىڭ جوعارىداعى جاڭىلتپاشىنسىز شىعارا المايسىز!!! ول — توعىزدىڭ 2-گە بولىنبەيتىنى سەكىلدى، 10-نىڭ 3-كە بولىنبەيتىنى سەكىلدى قورىتىندى! 48 كوماندانى ىڭ-شىڭسىز 1/16 فينالعا شىعارىپ بەرۋدىڭ ودان باسقا دا باستان ۇرىپ ايتار جولدارى بار، بىراق ونى مەنەن كىم سۇراپ جاتىر؟!

…جارايدى، بىرەۋىڭىزدەن «نەسىپ دەگەن كىم، قايدا تۇرادى؟» دەپ سۇراسا، ءبىزدىڭ ءۇي جاققا سىلتەپ جىبەرەرسىزدەر. ەندى «كىم چەمپيون بولادى؟» دەگەنگە كەلەيىك. ارينە، ەڭ شەبەر، ەڭ ىنتىماقتى، ەڭ چەمپيوندىققا شولدەگەن، سول جازدا ەڭ ءبىر ءساتىن سالعان كوماندا چەمپيون بولادى! ينتەرنەت پەن جاساندى ينتەللەكتتىڭ ءتىزىمى مىناداي:

يسپانيا، انگليا، برازيليا، ارگەنتينا، گەرمانيا، پورتۋگاليا، نيدەرلاند، نورۆەگيا، يتاليا، ۋركۋگۆاي… جارايدى، وسى ونى جەتەر. بۇلاردى ارتقا تاستاپ، چەمپيون بوپ كەتەتىن كوماندا جوق، ءسىرا. ال، بىراق بۇل وننىڭ ورنالاسۋىنا مەنىڭ تالاسىم بار. مەن بۇل وندىقتى بىلاي ورنالاستىرار ەدىم (اتتەڭ، فيفا-نىڭ 48 كومانداعا جاساعان جەرەبەسىن تولىق تۇسىنە الماي وتىرمىن، سوندىقتان كىممەن كىمنىڭ كەزدەسۋى مۇمكىن، كىممەن كىمنىڭ كەزدەسۋى مۇمكىن ەمەستىگىنەن قاتەلەسەمىن-اۋ…): برازيليا، يسپانيا، ارگەنتينا، انگليا… نەمەسە: ارگەنتينا، يسپانيا، برازيليا، گەرمانيا… نەمەسە… ە، بولار، اۋىز وزىمدىكى دەپ سايراي بەرگەن ءجون ەمەس، ەندىگى ءسوزدى سىزدەرگە قالدىرايىن. الەم چەمپيوناتىنىڭ باستالۋىنا ءالى جارتى جىل بار. بۇل جارتى جىلدا ايتىلاتىن پىكىر دەگەنىڭىز ءجۇز پىلگە جۇك بولار. سول كەزدە تاعى اينالىپ سوعارمىز.

ال، جاقسى، بالالارىڭىزعا فۋتبول دوبىن ساتىپ الىپ بەرىڭىزدەر، ەرتەلى-كەش تەبە بەرسىن!!!

نەسىپ جۇنىسباي ۇلى،

قازاقستاننىڭ ەڭبەك سىڭىرگەن قايراتكەرى،

سپورت ءجۋرناليسى، جازۋشى، سپورت قايراتكەرى

استانا