SportPress.kz قازاقستان سپورت جاڭالىقتارى
تەننيسشىلەر اسىلجان ارىستانبەكوۆا مەن ىڭكار دۇيسەباي جۇپتىق سىندا تۇركيانىڭ انتاليا قالاسىندا ءوتىپ جاتقان ITF W15 تۋرنيرىندە جارىس كورىگىن قىزدىرىپ جاتىر. ولار جارتىلاي فينالعا شىقتى، دەپ حابارلادى قازاقستان تەننيس فەدەراتسياسى.
جارىستا قازاق قىزدارى 4-راكەتكا بولىپ تىركەلگەن. شيرەك فينالدا تەننيسشىلەر ماجارستاننىڭ مەليندا بيرو مەن اۋستريانىڭ كلاۋديا گاسپاروۆيچ ەسىمدى قارسىلاستارىمەن وينادى.
ويىندا اسىلجان مەن ىڭكار قارسىلاستارىنا ەش مۇمكىندىك قالدىرماي، 6:1، 6:0 ەسەبىمەن ويسىراتا جەڭدى.
ەندى تەننيسشىلەر فينالعا شىعۋ ءۇشىن وسى دودانىڭ 1-راكەتكالارى، جاپون قىزدارى ناناري كاتسۋمي مەن رينكو ماتسۋدامەن باق سىنايدى.
اسىلجان ارىستانبەكوۆا جەكەلەي سىندا 1/16 فينالدا ءدال وسى ن.كاتسۋميگە 4:6، 3:6 ەسەبىمەن جەڭىلگەن ەدى.
بۇدان باسقا دا ەلگە قۋانىشتى حابار كەلىپ جەتتى.
ارۋجان ساعىندىقوۆا ۇندىستانداعى تۋرنيردە ءبىر كۇندە ەكى ويىندى جەڭدى. ال البينا كاكەنوۆا 18 جاسقا دەيىنگىلەر اراسىندا ءۇندىستاندا وتكەن ەكى ITF Juniors 100 تۋرنيرىندە جەڭىمپاز اتاندى.
ول الدىمەن وتانداسىمىز ءساتيما تورەگەنمەن بىرگە جۇپتىق سىندا نيۋ-دەلي دوداسىندا ۇزدىك شىقتى. وندا قازاق دۋەتى فينالدا رەسەيلىك كسەنيا احرامەەۆا مەن ەۆا كوليادينانى 6:4، 6:4 ەسەبىمەن باسىم ءتۇستى.
البينا كاكەنوۆا جەكەلەي سىندا پۋنە قالاسىندا وتكەن جارىستا قارسىلاستارىنىڭ ءبارىن جەڭىپ شىقتى. ول سەنبى كۇنى سوڭعى ويىندا كورت يەسى ءۇندى ديا رامەشتى 6:2، 6:0 ەسەبىمەن جەڭدى.
