شىمكەنتتە قازاق كۇرەسىنەن قازاقستان چەمپيوناتىنىڭ جالاۋى جەلبىرەدى

شىمكەنت قالاسىندا قازاق كۇرەسىنەن ەرەسەكتەر اراسىنداعى قازاقستان چەمپيوناتى ءوز مارەسىنە جەتتى، دەپ حابارلادى  Qazaq Kuresi اسسوتسياتسياسىنىڭ ءباسپاسوز قىزمەتى.

ۇلتتىق سپورتتى ۇلىقتاعان ايتۋلى دودا «جەڭىلاتلەتيكالىق مانەج» سپورت كەشەنىندە بولىپ، ەلدىڭ تۇكپىر-تۇكپىرىنەن جينالعان بالۋانداردىڭ باسىن قوستى.

چەمپيوناتتىڭ سالتاناتتى اشىلۋ راسىمىندە شىمكەنت قالاسى دەنە شىنىقتىرۋ جانە سپورت باسقارماسى باسشىسىنىڭ مىندەتىن اتقارۋشى قانات جولدىقاراەۆ، ۇلتتىق جانە ات سپورتى تۇرلەرى ورتالىعىنىڭ ديرەكتورى قايرات پازىلبەك، Qazaq Kuresi اسسوتسياتسياسىنىڭ باس ديرەكتورى دامير بەكبوسىنوۆ پەن شىمكەنت قالاسى Qazaq Kuresi فەدەراتسياسىنىڭ پرەزيدەنتى اسحات ءابدىجاميل ۇلى ءسوز سويلەپ، جارىسقا قاتىسۋشىلارعا ساتتىلىك تىلەدى.

ءىس-شارادا Qazaq Kuresi اسسوتسياتسياسىنىڭ باس ديرەكتورى دامير اسەنعازى ۇلى قازاق كۇرەسىنىڭ كورنەكتى وكىلى ايدوس عالىموۆقا قازاق كۇرەسى سپورت تۇرىنەن قازاقستان رەسپۋبليكاسىنىڭ ەڭبەك سىڭىرگەن سپورت شەبەرى اتاعىنىڭ توسبەلگىسى مەن كۋالىگىن سالتاناتتى تۇردە تابىس ەتتى.

ايدوس قايرات ۇلى – قازاق كۇرەسىنەن ەكى دۇركىن الەم چەمپيونى، ءتورت دۇركىن «ەۋرازيا بارىسى» ءتۋرنيرىنىڭ جەڭىمپازى جانە ءۇش دۇركىن قازاقستان چەمپيونى.

ايتا كەتەيىك، ۇلتتىق سپورتتىڭ ابىرويىن اسقاقتاتقان جارىستىڭ باس دەمەۋشىلەرى – «سامۇرىق قازىنا» ۇلتتىق ءال-اۋقات قورى» اق جانە Sport Qory سپورتتى قولداۋ قورى.

بيىلعى قازاقستان چەمپيوناتىنا استانا، الماتى، شىمكەنت قالالارىنان جانە 17 وڭىردەن كەلگەن 500-گە جۋىق بالۋان قاتىستى. سپورتشىلار 16 سالماق دارەجەسىندە (ەرلەر – 8، ايەلدەر – 8) بەلدەسىپ، بىرنەشە كۇنگە سوزىلعان تارتىستى جارىستا ءوزارا مىقتىنى انىقتادى.

ءبىرىنشى جارىس كۇنى

العاشقى جارىس كۇنى ەرلەر اراسىندا 90، 100 جانە 100 كەلىلەن اسا سالماق دارەجەلەرىندە چەمپيوندار بەلگىلى بولدى. 90 كەلىدە قىزىلوردا وبلىسىنىڭ وكىلى ەڭبەك ساقتاعانوۆ توپ جارسا، 100 كەلىدە جامبىل وبلىسىنان قازبەك راقىشەۆ، ال 100 كەلىدەن اسا سالماقتا ماڭعىستاۋ وبلىسىنىڭ بالۋانى نۇرداۋلەت جارىلعاپوۆ چەمپيون اتاندى.

ەكىنشى جارىس كۇنى

ەكىنشى كۇنى ەرلەر اراسىندا 66، 74 جانە 82 كەلى سالماق دارەجەلەرىندە، ايەلدەر اراسىندا 56، 60 جانە 65 كەلى سالماقتارىندا بەلدەسۋلەر بولدى. بۇل كۇنى دە بىرنەشە ءوڭىردىڭ بالۋاندارى جۇلدەگەرلەر قاتارىنان كورىنىپ، جارىستىڭ تارتىستى سيپاتىن كورسەتتى.

ءۇشىنشى جارىس كۇنى

ءۇشىنشى جارىس كۇنى ەرلەر 55 جانە 60 كەلى سالماق دارەجەلەرىندە، سونداي-اق تۇيە بالۋان ساناتىندا سىنعا ءتۇستى. تۇيە بالۋان ساناتىندا شىمكەنت قالاسىنىڭ وكىلى نۇرسۇلتان قوجاگەلدى ۇلى جەڭىسكە جەتتى. ايەلدەر اراسىندا 48 جانە 52 كەلى سالماق دارەجەلەرىنىڭ چەمپيوندارى انىقتالدى.

جالپىكوماندالىق ناتيجە

چەمپيوناتتىڭ قورىتىندىسى بويىنشا جالپىكوماندالىق ەسەپتە:

ءى ورىن – شىمكەنت قالاسى (237 ۇپاي)،

ءىى ورىن – جامبىل وبلىسى (225 ۇپاي)،

ءىىى ورىن – اباي وبلىسى (200 ۇپاي) يەلەندى.