قىتايدا ديماشتىڭ تۋريستىك لوكاتسيادا تۇسىرىلگەن جوباسى تانىستىرىلادى

بيىلعى 5 اقپاندا قىتايدىڭ تانىمال Hunan TV تەلەارناسىندا حالىقارالىق مۋزىكالىق Voice Beyond Horizon جوباسىنىڭ رەسمي تانىستىرىلىمى بولادى، دەپ حابارلادى تۋريزم جانە سپورت مينيسترلىگى.

باعدارلامانىڭ ءتۇسىرىلىمى تولىق ەلىمىزدىڭ تۋريستىك لوكاتسيالارىندا بولدى. ول 6 ءوڭىردى قامتىدى.

جوبا ديماش قۇدايبەرگەننىڭ باستاماسىمەن قولعا الىنىپ، Hunan Broadcasting System مەدياحولدينگىمەن بىرگە ىسكە اسىرىلدى. Voice Beyond Horizon ءارتۇرلى ەلدەردىڭ ونەرپازدارىن بىرىكتىرۋمەن قاتار قازاقستاننىڭ تابيعي ارالۋاندىعىن جانە تۋريستىك الەۋەتىن ميلليونداعان كورەرمەنگە تانىستىرادى.

تۇسىرىلىمدەر تۇركىستان، ماڭعىستاۋ، الماتى جانە اقمولا وبلىستارىندا، استانا مەن الماتى قالالارىندا بولدى.

جوباعا قازاقستاننىڭ، قىتايدىڭ، قىرعىزستاننىڭ، يتاليانىڭ، مالايزيا مەن سەربيانىڭ انشىلەرى قاتىسادى. وتكەن جىلدىڭ قىركۇيەك ايىندا ولار قازاقستان وڭىرلەرىن ارالاپ، 7 مىڭ شاقىرىمنان استام جول ءجۇرىپ ءوتتى.

جوبا باعىتى كونە تۇركىستاندى، بوزجىرانىڭ ەرەكشە كورىنىستەرىن جانە كاسپي تەڭىزى جاعالاۋىن، تابيعي ءىنجۋ-مارجانعا اينالعان قايىڭدى مەن كوبەيتۇز كولدەرىن، تۋريستيك ساتى اۋىلىن، قاپشاعاي سۋ قويماسىن، ششۋچينسك-بۋراباي كۋرورتتىق ايماعىن قامتىدى.

-قازاقستاننىڭ تۋريستىك الەۋەتىن حالىقارالىق مەدياجوبالار ارقىلى جۇيەلى تۇردە كورسەتەمىز. ءبىز Euronews Travel، Amazon Prime Video، M6 تەلەارناسى سياقتى جەتەكشى الەمدىك  تەلەارنالارمەن ىنتىماقتاستىق ورناتاتىپ جاتىرمىز. ءبىز ديماش قۇدايبەرگەنگە Voice Beyond Horizon جوباسىنا باستاماشىلدىق تانيتقانى ءۇشىن العىس بىلدىرەمىز. بۇل تەلەۆيزيالىق باعدارلاما ءبىزدىڭ تۋريستىك ورىندارىمىزدى ميللياردتاعان اۋديتورياعا كورسەتەدى، – دەدى «كازاح تۋريزم» ۇك» اق باسقارما توراعاسى تالعات عازيزوۆ.

جوبانىڭ رەسمي كورسەتىلىمى قىتايدا اۋديتورياسى 1،9 ميللياردان اساتىن  Hunan TV، Mango TV، ەلىمىزدەگى Qazaqstan ۇلتتىق ارناسىندا بولادى.

جوباعا «Kazakh Tourism» ۇلتتىق كومپانياسى، تۋريزم جانە سپورت، مادەنيەت جانە اقپارات مينيسترلىكتەرى، استانا، الماتى قالالارىنىڭ جانە الماتى، اقمولا، تۇركىستان، ماڭعىستاۋ وبلىستارى اكىمدىكتەرى ۇيىمىرۋشىلىق قولداۋ كورسەتىپ، دەمەۋشىلەر رەتيندە «كارمەت»، «قازاقمىس»، «التىن الماس» كومپانيالارى مەن نۇرلان سماعۇلوۆ قورى دا اتسالىستى.