ءۇش جىلدا 86 سپورت كەشەنى سالىنادى

استانادا تۋريزم جانە سپورت ءمينيسترى ەربول مىرزابوسىنوۆتىڭ توراعالىعىمەن ۆەدومستۆونىڭ دەنە شىنىقتىرۋ جانە سپورت، تۋريزم، ويىن بيزنەسى جانە لوتەرەيا قىزمەتىن رەتتەۋ سالالارىنداعى 2025 جىلعى قىزمەتى مەن 2026 جىلعا قويىلعان نەگىزگى مىندەتتەرى جونىندەگى كەڭەيتىلگەن القا ءماجىلىسى بولدى، دەپ حابارلادى اتالعان مينيسترلىك.

ءىس-شاراعا قوعامدىق كەڭەستىڭ وكىلدەرى، سالا ارداگەرلەرى، اتاقتى سپورتشىلار مەن قۇرمەتتى جاتتىقتىرۋشىلار، وتاندىق تۋريستىك بىرلەستىكتەر مەن اسسوتسياتسيالار، جەرگىلىكتى اتقارۋشى ورگاندار مەن ۆەدومستۆوعا باعىنىستى ۇيىمداردىڭ باسشىلارى، ۇكىمەتتىك ەمەس ۇيىمدار قاتىستى.

تۋريزم جانە سپورت ءمينيسترىنىڭ ورىنباسارى سەرىك جاراسباەۆ 2025 جىلى اتقارىلعان جەتىستىكتەر مەن 2026 جىلعا ارنالعان جوسپارلاردى باياندادى. ول سپورت سالاسىنىڭ ەلدىڭ ابىرويىن اسقاقتاتىپ، ۇلتتىق رۋحتى كوتەرەتىن ستراتەگيالىق ماڭىزىنا توقتالدى.

-2025 جىلى «دەنە شىنىقتىرۋ جانە سپورت تۋرالى» زاڭعا بىرقاتار تۇزەتۋ ەنگىزىلىپ، باسقارۋ تيىمدىلىگى ارتتىرىلدى. قازاقستان ازاماتتىعى جوق سپورتشىلاردى بيۋدجەت ەسەبىنەن قارجىلاندىرۋعا تىيىم سالىندى، «سپورتتىڭ باسىم تۇرلەرى» انىقتالىپ، اككرەديتتەلگەن سپورت فەدەراتسيالارىنىڭ قىزمەتىنە جاڭا تالاپتار ەنگىزىلدى. سونىمەن قاتار مەملەكەتتىك سپورت ۇيىمدارىنىڭ باسشىلارى روتاتسيالانىپ، وڭىرلىك باسقارمالار KPI جۇيەسى بويىنشا باعالانادى، – دەدى ول.

بۇقارالىق سپورتتى دامىتۋدا 2025 جىلى 8،5 ملن ادام جۇيەلى تۇردە سپورتپەن اينالىسقان. بۇل -حالىقتىڭ 44،5%-ى. ماقسات – 2029 جىلعا قاراي كورسەتكىشتى 50%-عا جەتكىزۋ. 240 مىڭ بالا 7 مىڭنان استام ۇيىرمەگە تەگىن قاتىسىپ، جەرگىلىكتى بيۋدجەتتەردەن 50 ملرد تەڭگە قاراجات ءبولىندى.

2025 جىلى ەلدە 147 سپورت نىسانى، ونىڭ ىشىندە اۋىلدىق جەرلەردە – 107، قالالاردا – 40 سپورت عيماراتى پايدالانۋعا بەرىلدى. 2026–2028 جىلدارعا ارنالعان سپورتتىق ينفراقۇرىلىمدى دامىتۋدىڭ جول كارتاسى ازىرلەندى. وعان سايكەس 86 سپورت نىسانىن سالۋ جوسپارلانعان.

بيىلعى ماڭىزدى وقيعالار – ميلان-كورتينا قالالارىندا وتەتىن XXV قىسقى وليمپيا جانە XIV پاراليمپيا ويىندارى. قازاقستان قۇراماسىنان وليمپياداعا 36، پاراليمپياداعا 7 سپورتشى قاتىسادى.

جيىندا سەرىك جاراسباەۆ تۋريزم سالاسىندا اتقارىلىپ جاتقان جۇمىستار تۋرالى دا ايتتى. ونىڭ ايتۋىنشا، ەلىمىزدە تۋريزم تۇراقتى ءوسىم بايقالادى.

-2025 جىلدىڭ 9 ايىندا ىشكى تۋريستەر سانى 6،7 ملن ادامعا جەتىپ، 2024 جىلمەن سالىستىرعاندا 741،3 مىڭعا ءوستى. ەلگە كەلگەن شەتەلدىك تۋريستەر سانى 15،7 ملن ادامعا جەتىپ، ورنالاستىرۋ ورىندارىنىڭ تابىسى 268 ملرد تەڭگە بولدى. تۋريزمگە ينۆەستيتسيا كولەمى 1،254 ترلن تەڭگەگە جەتىپ، وتكەن جىلمەن سالىستىرعاندا 32%-عا ءوستى. باسىم باعىتتار – الماتى تاۋ كلاستەرى، ششۋچينسك-بۋراباي جانە ماڭعىستاۋ تۋريستىك وڭىرلەرى. بۋرابايدا 10 شاقىرىم ۆەلوجول، 8 شولۋ الاڭى، 4 اۆتوتۇراق پايدالانۋعا بەرىلدى. ماڭعىستاۋدا ەرەكشە تابيعي نىساندارعا قولجەتىمدىلىكتى ارتتىرۋ جوسپارلانعان، – دەدى س.جاراسباەۆ.

تۋريستىك ونىمدەردىڭ گەوگرافياسى 1 100-دەن استام تۋرعا جەتىپ، كاسىبي كادرلاردى وقىتۋ جانە قىزمەت كورسەتۋ ساپاسىن ارتتىرۋ جالعاسۋدا.

ال تۋريزم جانە سپورت ۆيتسە-ءمينيسترى باۋىرجان راپيكوۆ 2025 جىلى تۋريزم جانە سپورت مينيسترلىگى قۇمار ويىندار سالاسىندا ازاماتتاردىڭ قۇقىقتارى مەن مۇددەلەرىن قورعاۋ باعىتىندا جۇرگىزگەن اۋقىمدى زاڭنامالىق جۇمىستار مەن سالاداعى نەگىزگى وزگەرىستەر تۋرالى باياندادى.

سونداي-اق، القا ماجىلىسىندە Kazakh Tourism Development جشس ديرەكتورى ەرجان ەركىنباەۆ، قاراعاندى وبلىسىنىڭ كاسىپكەرلىك باسقارماسىنىڭ باسشىسى يرينا ليۋبارسكايا، قىزىلوردا وبلىسىنىڭ دەنە شىنىقتىرۋ، سپورت جانە تۋريزم باسقارماسىنىڭ باسشىسى باقتيار ارتاەۆ، «دالا قىراندارى» جاستار قوعامدىق بىرلەستىگىنىڭ وكىلى نۇرعالي تۇرسىنعازيەۆ بايانداما جاسادى.