SportPress.kz قازاقستان سپورت جاڭالىقتارى
تەننيسشى ەلەنا رىباكينا العاش رەت اۋستراليا اشىق چەمپيوناتىن جەڭىپ الدى، دەپ حابارلادى قازاقستان تەننيس فەدەراتسياسى.
ول فينالدا الەمنىڭ ءبىرىنشى راكەتكاسى ارينا سوبولەنكونى (بەلارۋس) 6:4، 4:6، 6:4 ەسەبىمەن جەڭدى. تيتۋلعا بارار جولدا قازاقستاننىڭ كوشباسشى تەننيسشىسى شيرەك فينالدا جارىستىڭ 2-راكەتكاسى يگا شۆەنتەكتەن، جارتىلاي فينالدا التىنشى ءنومىرلى بولىپ تىركەلگەن دجەسسيكا پەگۋلادان ايلاسىن اسىردى.
2023 جىلى رىباكينا مەن سوبولەنكو فينالدا ويناعان ەدى. سول كەزدە ماتچ ءۇش سەتتە اياقتالىپ، سوبولەنكونىڭ پايداسىنا شەشىلگەن بولاتىن.
بۇل — ەلەنا رىباكينا ءۇشىن توپ-10-عا كىرەتىن ويىنشىمەن بولعان قاتارىنان ونىنشى جەڭىس. سونداي-اق سوڭعى 21 ماتچتاعى 20 جەڭىس، جەكەلەي سىندا 2022 جىلعى ۋيمبلدوننان كەيىنگى «ۇلكەن دۋلىعا» تۋرنيرىندەگى ەكىنشى جانە سپورتتىق جولىنداعى 12-ءىنشى تيتۋل.
قازاقستان تەننيس فەدەراتسياسىنىڭ پرەزيدەنتى بولات وتەمۇراتوۆ وتانداستارىمىزدى تاريحي جەڭىسپەن قۇتتىقتادى.
-بۇل Australian Open قازاقستان ءۇشىن تاريحي جارىس بولدى. ءۇش ءجاسوسپىرىمدى قوسقاندا، ءبىزدىڭ ويىنشىلاردىڭ رەكوردتىق قاتىسۋى — ۇلتتىق تەننيس ءۇشىن ەلەۋلى جەتىستىك. ەلەنا رىباكينانىڭ جەڭىسى ونىڭ الەمدىك رەيتينگتىڭ ۇزدىك ۇشتىكتەگى ورنىن نىعايتىپ، سپورتتىق جولىنداعى «ۇلكەن دۋلىعا» تۋرنيرىندەگى ەكىنشى تيتۋلى بولدى.
جۇپتىق سىندا فينالعا شىققان اننا دانيلينا جانە جاسوسپىرىمدەر اراسىندا مەلبۋرندا قازاقستان تەننيسشىلەرى اراسىنان ءبىرىنشى بولىپ جارتىلاي فينالعا دەيىن جەتكەن زاڭعار نۇرلان ۇلى ءبىزدىڭ مەكتەپتىڭ دەڭگەيىن كورسەتتى. مۇنداي تابىستار جاس ۇرپاقتى جىگەرلەندىرىپ، ەلدە تەننيستىڭ دامۋىنا تىڭ سەرپىن بەرەتىنىنە سەنىمدىمىن. ءبىزدىڭ بارلىق تەننيسشىلەرگە حالىقارالىق ارەنادا جاڭا جەڭىستەر، تۇراقتى العا باسۋ جانە ايشىقتى جەتىستىكتەر تىلەيمىن، — دەدى ول.
Tennis Up to Date سايتىنىڭ حابارلاۋىنشا، ەلەنا رىباكينا قاراشا ايىنان بەرى 7 ملن 996 مىڭ 892 دوللار (4 ملرد 48 ملن تەڭگەدەن استام) تابىس تاپتى.
بۇعان دەيىن ءدال وسىنداي از ۋاقىتتا ەشكىم مۇنداي كورسەتكىشكە جەتپەگەن ەدى.
بۇل سەريا وتكەن جىلعى WTA قورىتىندى تۋرنيرىنەن باستالدى. وندا رىباكينا بىردە-ءبىر رەت جەڭىلمەي، 5 235 مىڭ دوللار تابىس تاپقان بولاتىن. بۇل دا رەكورد ەدى.
سودان كەيىن رىباكينا جاڭا جىلدى بريسبەندەگى (اۋستراليا) جارىستان باستاپ شيرەك فينالعا دەيىن جەتتى. سول ءۇشىن 37،460 مىڭ دوللارعا يە بولدى. ال اۋستراليا اشىق چەمپيوناتىنداعى چەمپيوندىق اتاعى ءۇشىن تەننيسشى 2 ملن 724،432 مىڭ دوللاردى ساناپ الدى.
