جاپونيانى مويىنداتقان ەرسىن بالتاعۇل بالۋاندارعا شەبەرلىگىن كورسەتتى

استاناداعى جاقسىلىق ۇشكەمپىروۆ اتىنداعى جەكپە-جەك سارايىندا تاعىلىمى مول كەزدەسۋ بولدى، Qazaq Kuresi اسسوتسياتسياسىنىڭ ءباسپاسوز قىزمەتى.

قازاقتان شىققان كاسىپقوي سۋموشى، جاپونيا تورىندە توپ جارىپ جۇرگەن جالعىز قازاق ەرسىن بالتاعۇل كاسىبي سپورتشىلارمەن جانە جاس بالۋاندارمەن جۇزدەستى.

كەزدەسۋگە قازاق كۇرەسىنىڭ ءابسوليۋتتى سالماق دارەجەسىندە سىنعا ءتۇسىپ جۇرگەن تۇيە بالۋاندار، سونداي-اق Qazaqstan Barysy رەسپۋبليكالىق ءتۋرنيرىنىڭ جەڭىمپاز-جۇلدەگەرلەرى بەيبىت ىستىباەۆ، رۋسلان ابدىرازاقوۆ، مۇحيت تۇرسىنوۆ، ەراسىل قاجىباەۆ پەن پاريج وليمپياداسىنىڭ قولا جۇلدەگەرى عۇسمان قىرعىزباەۆ باستاعان دزيۋدودان ۇلتتىق قۇراما سپورتشىلارى قاتىستى.

ەرسىن بالتاعۇل بۇگىندە جاپونيادا جوعارى ناتيجەگە جەتكەن قازاقستاننىڭ كاسىبي سۋموشىسى. الماتى قالاسىنىڭ تۋماسى سپورتتاعى جولىن قازاق كۇرەسى مەن دزيۋدودان باستاپ، ۇلتتىق مەكتەپتىڭ ءتالىمىن كورىپ شىڭدالعان. كەيىن جاپونياداعى نيحون ۋنيۆەرسيتەتىن تامامداپ، كاسىبي سۋمو الەمىنە قادام باسقان.

كەزدەسۋدە Qazaq Kuresi اسسوتسياتسياسىنىڭ باس ديرەكتورى مەيىرجان بەرەكەتوۆ كينبوزان حارۋكي لاقاپ اتىمەن تانىمال سپورتشىنى وتاندىق بالۋاندارعا تانىستىرىپ، ونىڭ حالىقارالىق ارەناداعى جەتىستىكتەرىنە توقتالدى.

بىلتىر جاپونيادا وتكەن «حاتسۋ باسيو – 2025» تۋرنيرىندە ەرسىن بالتاعۇل 15 كۇندىك دودادا 13 جەڭىسكە جەتىپ، ءۇشىنشى ورىن يەلەندى. بۇل ناتيجە ەل سپورتى تاريحىنداعى ماڭىزدى بەلەستەردىڭ ءبىرى.

جاس بالۋاندار قادىرمەندى قوناققا قازاق كۇرەسىنىڭ ءادىس-تاسىلدەرىن كورسەتىپ، ۇلتتىق سپورت پەن سۋمو اراسىنداعى ۇندەستىكتى پاش ەتتى. ال ەرسىن بالتاعۇل ءوز كەزەگىندە سۋمودا ءجيى قولداناتىن سۇيىكتى ادىستەرىن تانىستىرىپ، جاپونياداعى دايىندىق جۇيەسى، قاتاڭ ءتارتىپ پەن داستۇرگە نەگىزدەلگەن سۋمو مادەنيەتى تۋرالى كەڭىنەن اڭگىمەلەدى.

ءىس-شارادا سپورتشى كاسىبي سۋمودا جەتكەن جەتىستىكتەرىنىڭ باستى قاعيداتتارىن دا ايتتى.

– كاسىبي سپورتتا تابىسقا جەتۋدىڭ باستى كىلتى – ەڭبەك، ءتارتىپ جانە ۇلتتىق نەگىزدەن اجىراماۋ. مەن سپورتتىق جولىمدى قازاق كۇرەسى مەن دزيۋدودان باستاپ، سول مەكتەپتىڭ ارقاسىندا فيزيكالىق جانە رۋحاني تۇرعىدان قالىپتاسقانمىن. جاپونداردا «زالدىڭ رۋحىن سەزىنۋ» جانە «ءتاتاميدىڭ تىنىسىن اڭعارۋ» دەگەن ماعىنا بەرەتىن «وندۋوشين ي» دەگەن ۇعىم بار. مەن دە كىلەم مەن زالدىڭ تىنىسىن سەزىنۋدى ءتول كۇرەسىمىزدىڭ مەكتەبىنەن ۇيرەندىم. بۇعان مىسال كەلتىرەتىن بولسام، مەن سۋمو بەلدەسۋلەرىندە قازاق كۇرەسىنىڭ «جامباس» ءادىسىن ءجيى قولدانامىن، – دەيدى ەرسىن بالتاعۇل.

سونداي-اق، سپورتشى قازاق كۇرەسىن جاپونيادا دامىتۋ مۇمكىندىگى بار ەكەنىن اتاپ ءوتتى.

– قازاقستاندا ءابسوليۋتتى سالماقتا وتەتىن «قازاقستان بارىسى» جانە «ەۋرازيا بارىسى» سياقتى تۋرنيرلەر ءىرى دەنەلى بالۋانداردىڭ الەۋەتىن كورسەتىپ وتىر. سوندىقتان جاپونيادا قازاق كۇرەسىن دامىتۋعا، جەرگىلىكتى بالۋانداردى سۋمو كۇرەسىنە تارتۋعا تولىق مۇمكىندىك بار دەپ سانايمىن. سۋمو جارىسىنا شىققاندا ءوزىمنىڭ قازاقستاندىق ەكەنىمدى، الماتى قالاسىنىڭ تۋماسى ەكەنىمدى ەشقاشان ۇمىتپايمىن. ياعني، مەن ءۇشىن 146 ميلليون حالقى بار جاپونيادا ەل نامىسىن قورعاۋ ۇلكەن جاۋاپكەرشىلىك دەپ بىلەمىن. قازىر وساكا قالاسىندا وتەتىن يمپەراتور كۋبوگىنە دايىندالىپ جاتىرمىن. بۇل جولى دا ۇزدىكتەر قاتارىنان كورىنۋگە بار كۇشىمدى سالامىن، – دەيدى سپورتشى.

ءىس-شارادا مەيىرجان بەرەكەتوۆ ەرسىن بالتاعۇلعا Qazaq Kuresi اسسوتسياتسياسى ۇجىمىنىڭ اتىنان قۇرمەت كورسەتتى. قازاق داستۇرمەن يىعىنا شاپان جاۋىپ، كادەسىيلاردى تابىس ەتتى.

ءباسپاسوز ورتالىعىندا جالعاسقان سۇحباتتا كاسىبي سۋموشى ۇلتتىق سپورتتان حالىقارالىق دەڭگەيگە شىعۋدىڭ جولى، سپورتتاعى ءتارتىپ پەن تاباندىلىقتىڭ ماڭىزى جانە الداعى جوسپارلارى جايىندا ايتتى.

بۇل كەزدەسۋ ءبىر سپورتشىنىڭ جەتىستىگىن دارىپتەۋ عانا ەمەس، قازاق جاستارىنا موتيۆاتسيا بەرەتىن تاعىلىمدى ءىس-شارا بولعانى ءسوزسىز. ءتول كۇرەستىڭ مەكتەبىنەن تۇلەپ ۇشقان بالۋاننىڭ جاپونيا تورىندە اتوي سالۋى  قازاق سپورتىنىڭ الەۋەتىن ايعاقتايتىن جەتىستىك.

ونىڭ بويى 195 سانتيمەتر، ال سالماعى 178 كەلى بولاتىن ەرسىن بالتاعۇل سۋمو كۇرەسىنىڭ ەڭ جوعارى ديۆيزيونى – ماكۋتيدە ونەر كورسەتىپ ءجۇر.

 

Qazaq Kuresi اسسوتسياتسياسىنىڭ ءباسپاسوز قىزمەتى