قپل: «قايرات» ورتالىق ستاديوندا «توبىلدان» ويسىراي جەڭىلدى

فۋتبولدان قازاقستان پرەمەر-ليگاسىنىڭ ءححVى تۋرىندا «قايرات» كلۋبى ءوز الاڭىندا قوستاناي قالاسىنىڭ «توبىل» كومانداسىمەن ويناپ، ويسىراي جەڭىلدى، دەپ حابارلايدى Egemen.kz.

كوماندالاردىڭ ءبىرىنشى ماتچى 11 ساۋىردە قوستانايدا بولعان ەدى. وسى ويىندا قارسىلاستار 1:1 ەسەبىمەن تەڭ تارقاسىپ، ءبىر-بىرىنەن ءبىر ۇپايدى عانا ج ۇلىپ العان بولاتىن. سول كەزدە «توبىل» التى رەت ويىن ەرەجەسىن بۇزىپ، ءبىر ماتچتا التى سارى قاعاز الىپ، جاسىل الاڭنان ارەڭ دەگەندە اياقتارىن الىپ شىققان ەدى. سودان بەرى كوماندالار ءبىر-بىرىمەن ويناعان ەمەس. ال كەشەگى الماتىنىڭ ورتالىق ستاديونىندا بولعان ماتچتا «توبىل» مۇلدە باسقاشا ويىن ورنەگىن كورسەتتى. بۇل ماتچتا «قايراتقا ءۇش ۇپاي اۋاداي قاجەت ەدى. ويتكەنى، الماتى كومانداسىنا تۋرنير كەستەسىندە ءبىرىنشى ورىندا كەلە جاتقان شىمكەنتتىڭ «ورداباسىسىنان» اسىپ، كوش باستاۋ كەرەك بولعان. بىراق، ماتچ باستالىسىمەن قوستانايدىڭ كلۋبى وڭاي شاعىلاتىن جاڭعاق ەمەس ەكەنىن كورسەتتى.

ولار تورەشىنىڭ ىسقىرىعىنان كەيىن الاڭ يەلەرى قاقپاسىنا ءجيى شابۋىلداپ، نىسانانى ىزدەدى. سونداي ءساتتىڭ بىرىندە «قايراتتىڭ» قاقپاسىنا 11-مەترلىك پەنالتي بەلگىلەندى. ءسويتىپ، 18-مينۋتتا «توبىلدىڭ» قۇرامىندا ءجيى الاڭعا شىعىپ، كوزگە ءتۇسىپ جۇرگەن ۋروش ميلوۆانوۆيچ بۇل جولى دا قاقپانى ءدال كوزدەدى. سودان كەيىن «قايراتتىڭ» ويىنشىسى مارك گۋال 40-مينۋتتا ەسەپتى تەڭىستىردى.

ءبىرىنشى تايم اياقتالۋعا جاقىن قالعاندا تابلوداعى ەسەپ تاعى وزگەردى. شىنىن ايتۋ كەرەك، الاڭ يەلەرى مۇنداي ەسەپتىڭ ويىننىڭ ءبىرىنشى جارتىسىندا بولاتىنىن كۇتپەگەن ەدى. ويىننىڭ 44-مينۋتىندا ۋروش ميلوۆانوۆيچ تاعى ءبىر مارتە كوزگە ءتۇستى.

ەكىنشى تايمدا «توبىل» شابۋىلدى ودان سايىن جيەلەتتى. ال «قايرات» نە ىستەرىن بىلمەي، قورعانىسقا قانا شەگىنە بەردى. وسى جەردە الاڭ يەلەرىنىڭ قاقپاشىسى تەمىرلان اناربەكوۆكە وڭاي بولماعانىن ايتۋ كەرەك. ول جالعىز ءوزى قورعاۋشىلارعا ايقايلاپ، دۇرىس قورعانۋدىڭ جولىن كورسەتكىسى كەلگەنىمەن ونىسىنان ەشتەڭە شىقپادى. ال قوستانايدىڭ جاساعى بولسا، تاعى دوپتى تورعا توعىتۋعا تالپىندى. ءسويتىپ، 63-مينۋتتا «توبىلدىڭ» ساپىنداعى ۆيتالي ليساكوۆيچ گولدىڭ اۆتورى اتاندى.

وسىمەن ويىن بىتكەن سياقتى بولعان. كوماندالار شارشاپ-شالدىعىپ، الاڭدا كوپ قيمىلداماي، ءبىر-ءبىرىنىڭ قاتەلىگىن اڭدىپ جۇرگەن ەدى.  سونداي كەزدىڭ بىرىندە 80-مينۋتتا لۋيس گەررا قورعانىستىڭ قاتەلىگىن ءتيىمدى پايدالانۋعا تىرىسىپ، تاعى ءبىر گول سالىپ كەتتى. وسىلايشا، تابلوداعى ەسەپ 1:4-ءتى كورسەتتى.

«توبىل» تاجىريبەلى قارسىلاسىن ۇلكەن ەسەبىمەن جەڭىپ، تۋرنير كەستەسىندە 34 ۇپايمەن جەتىنشى ورىنعا شىقتى. ال «ورداباسىمەن» يىق تەڭەستىرىپ كەلە جاتقان «قايرات» ءبىرىنشى ورىنعا شىعا الماي قالدى.

وسى تۋردا شىمكەنتتىڭ كومانداسى «استانانى» 1:0 ەسەبىمەن جەڭىپ، تۋرنير كەستەسىندە 58 ۇپايمەن كوش باستادى. «قايراتتا» — 57 ۇپاي.

بۇدان باسقا پاۆلوداردىڭ «ەرتىس» كلۋبى ءوز الاڭىندا كوكشەتاۋدىڭ «وقجەتپەسىن» 2:1، وسكەمەننىڭ «التاي» كومانداسى سىرت الاڭدا جەزقازعاننىڭ « ۇلىتاۋىن» 3:0 ەسەبىمەن باسىم ءتۇستى.

سونىمەن بىرگە اقتاۋدىڭ «كاسپي» جاساعى ءوز الاڭىندا «اقتوبەدەن» 1:2 ەسەبىمەن جەڭىلسە، سەمەيدىڭ «ەلىماي» فۋتبولشىلارى تالدىقورعاننىڭ «جەتىسۋ» كلۋبىن 2:1، استانانىڭ «جەڭىس» كومانداسى پەتروپاۆلدىڭ «قىزىلجار» جاساعىن 3:1، قىزىلوردانىڭ «قايسار» ويىنشىلارى «اتىراۋدى» 1:0 ەسەبىمەن جەڭدى.

ەندى كوماندالار 17 جانە 18 قىركۇيەكتە وينايدى. اۋەلى «توبىل» مەن «ەلىماي»، «استانا» مەن «قايرات»، «اتىراۋ» مەن «ورداباسى» كۇش سىناسسا، 18 قىركۇيەكتە «وقجەتپەس» پەن «جەڭىس»، «جەتىسۋ» مەن «كاسپي»، «التاي» مەن «ەرتىس»، «قىزىلجار» مەن «قايسار»، «اقتوبە» مەن « ۇلىتاۋ» جاسىل الاڭعا شىعادى.

قازىر تۋرنير كەستەسىندە 25 ماتچتان كەيىن ءبىرىنشى ورىندا 58 ۇپايمەن «ورداباسى»، ەكىنشى ورىندا 57 ۇپاي جيناعان «قايرات»، ءۇشىنشى ورىندا 45 ۇپايى بار «استانا» كوماندالارى كەلەدى. «استانادا» ءبىر ويىن كەم. ولار 24 رەت الاڭعا شىقتى.

ءتورتىنشى ورىندا 42 ۇپايمەن «وقجەتپەس»، بەسىنشى ساتىندا 41 ۇپاي العان «اقتوبە» تۇر.

 
داستان كەنجالين،

استانا