SportPress.kz Qazaqstan sport jańalyqtary
Fýtboldan Qazaqstan Premer-lıgasynyń HHVI týrynda «Qaırat» klýby óz alańynda Qostanaı qalasynyń «Tobyl» komandasymen oınap, oısyraı jeńildi, dep habarlaıdy Egemen.kz.
Komandalardyń birinshi matchy 11 sáýirde Qostanaıda bolǵan edi. Osy oıynda qarsylastar 1:1 esebimen teń tarqasyp, bir-birinen bir upaıdy ǵana julyp alǵan bolatyn. Sol kezde «Tobyl» alty ret oıyn erejesin buzyp, bir matchta alty sary qaǵaz alyp, jasyl alańnan áreń degende aıaqtaryn alyp shyqqan edi. Sodan beri komandalar bir-birimen oınaǵan emes. Al keshegi Almatynyń Ortalyq stadıonynda bolǵan matchta «Tobyl» múlde basqasha oıyn órnegin kórsetti. Bul matchta «Qaıratqa úsh upaı aýadaı qajet edi. О́ıtkeni, Almaty komandasyna týrnır kestesinde birinshi orynda kele jatqan Shymkenttiń «Ordabasysynan» asyp, kósh bastaý kerek bolǵan. Biraq, match bastalysymen Qostanaıdyń klýby ońaı shaǵylatyn jańǵaq emes ekenin kórsetti.
Olar tóreshiniń ysqyryǵynan keıin alań ıeleri qaqpasyna jıi shabýyldap, nysanany izdedi. Sondaı sáttiń birinde «Qaırattyń» qaqpasyna 11-metrlik penaltı belgilendi. Sóıtip, 18-mınýtta «Tobyldyń» quramynda jıi alańǵa shyǵyp, kózge túsip júrgen Ýrosh Mılovanovıch bul joly da qaqpany dál kózdedi. Sodan keıin «Qaırattyń» oıynshysy Mark Gýal 40-mınýtta esepti teńistirdi.
Birinshi taım aıaqtalýǵa jaqyn qalǵanda tablodaǵy esep taǵy ózgerdi. Shynyn aıtý kerek, alań ıeleri mundaı eseptiń oıynnyń birinshi jartysynda bolatynyn kútpegen edi. Oıynnyń 44-mınýtynda Ýrosh Mılovanovıch taǵy bir márte kózge tústi.
Ekinshi taımda «Tobyl» shabýyldy odan saıyn jıeletti. Al «Qaırat» ne isterin bilmeı, qorǵanysqa qana shegine berdi. Osy jerde alań ıeleriniń qaqpashysy Temirlan Anarbekovke ońaı bolmaǵanyn aıtý kerek. Ol jalǵyz ózi qorǵaýshylarǵa aıqaılap, durys qorǵanýdyń jolyn kórsetkisi kelgenimen onysynan eshteńe shyqpady. Al Qostanaıdyń jasaǵy bolsa, taǵy dopty torǵa toǵytýǵa talpyndy. Sóıtip, 63-mınýtta «Tobyldyń» sapyndaǵy Vıtalıı Lısakovıch goldyń avtory atandy.
Osymen oıyn bitken sııaqty bolǵan. Komandalar sharshap-shaldyǵyp, alańda kóp qımyldamaı, bir-biriniń qateligin ańdyp júrgen edi. Sondaı kezdiń birinde 80-mınýtta Lýıs Gerra qorǵanystyń qateligin tıimdi paıdalanýǵa tyrysyp, taǵy bir gol salyp ketti. Osylaısha, tablodaǵy esep 1:4-ti kórsetti.
«Tobyl» tájirıbeli qarsylasyn úlken esebimen jeńip, týrnır kestesinde 34 upaımen jetinshi orynǵa shyqty. Al «Ordabasymen» ıyq teńestirip kele jatqan «Qaırat» birinshi orynǵa shyǵa almaı qaldy.
Osy týrda Shymkenttiń komandasy «Astanany» 1:0 esebimen jeńip, týrnır kestesinde 58 upaımen kósh bastady. «Qaıratta» — 57 upaı.
Budan basqa Pavlodardyń «Ertis» klýby óz alańynda Kókshetaýdyń «Oqjetpesin» 2:1, О́skemenniń «Altaı» komandasy syrt alańda Jezqazǵannyń «Ulytaýyn» 3:0 esebimen basym tústi.
Sonymen birge Aqtaýdyń «Kaspıı» jasaǵy óz alańynda «Aqtóbeden» 1:2 esebimen jeńilse, Semeıdiń «Elimaı» fýtbolshylary Taldyqorǵannyń «Jetisý» klýbyn 2:1, Astananyń «Jeńis» komandasy Petropavldyń «Qyzyljar» jasaǵyn 3:1, Qyzylordanyń «Qaısar» oıynshylary «Atyraýdy» 1:0 esebimen jeńdi.
Endi komandalar 17 jáne 18 qyrkúıekte oınaıdy. Áýeli «Tobyl» men «Elimaı», «Astana» men «Qaırat», «Atyraý» men «Ordabasy» kúsh synassa, 18 qyrkúıekte «Oqjetpes» pen «Jeńis», «Jetisý» men «Kaspıı», «Altaı» men «Ertis», «Qyzyljar» men «Qaısar», «Aqtóbe» men «Ulytaý» jasyl alańǵa shyǵady.
Qazir týrnır kestesinde 25 matchtan keıin birinshi orynda 58 upaımen «Ordabasy», ekinshi orynda 57 upaı jınaǵan «Qaırat», úshinshi orynda 45 upaıy bar «Astana» komandalary keledi. «Astanada» bir oıyn kem. Olar 24 ret alańǵa shyqty.
Tórtinshi orynda 42 upaımen «Oqjetpes», besinshi satynda 41 upaı alǵan «Aqtóbe» tur.
Dastan KENJALIN,
ASTANA
