ازيادا الاۋى: قازاقستان سپورتشىلارىنىڭ الەۋەتى زور

19 قىركۇيەكتە جاپونيانىڭ ايچي پرەفەكتۋراسى مەن ونىڭ ورتالىعى ناگويا قالاسىندا حح جازعى ازيا ويىندارىنىڭ جالاۋى كوتەرىلەدى.

جارىستار توكيو قالاسى مەن سيدزۋوكا، وساكا جانە گيفۋ پرەفەكتۋرالارىنداعى ارەنالاردى قوسا العاندا، 50-دەن استام سپورت نىسانىندا بولادى.

ازيادانىڭ باعدارلاماسىنا 43 سپورت ءتۇرى مەن 71 ديستسيپلينا ەنگىزىلدى. جالپى 469 جۇلدە جيىنتىعى ساراپقا سالىنادى.

ازيادانىڭ باعدارلاماسىنا 43 سپورت ءتۇرى ەنگىزىلسە، سونىڭ 35-ىندە وتانداستارىمىز مەدال ءۇشىن تالاسادى. ونىڭ ىشىندە قازاقستان سپولرتشىلارى بيىل العاش رەت رەسمي باعدارلاماعا قوسىلعان MMA (ارالاس جەكپە-جەك)، پادەل جانە ۆيرتۋالدى تاەكۆوندو سياقتى ەرەكشە سپورت تۇرلەرىنەن بولاتىن جەكپە-جەك تۇرلەرىنە دە قاتىسادى.

ەلىمىز ازيا ويىندارىنا دەربەس مەملەكەت رەتىندە 1994 جىلدان باستاپ قاتىسىپ كەلەدى. وسى ۋاقىتقا دەيىن قازاقستان سپورتشىلارى 8 جازعى (1994 —2022) جانە 7 قىسقى (1996—2025) ازيا ويىندارىنا قاتىستى.

جازعى ازيا ويىندارىنىڭ قورىتىندىسى بويىنشا قازاقستان قۇراماسى بارلىعى 637 مەدال (165 التىن، 180 كۇمىس جانە 292 قولا) يەلەندى. ونىڭ ىشىندە ەڭ كوپ 25 التىن جۇلدەنى كانوە مەن بايداركادا ەسكەك ەسۋشىلەر السا، ودان كەيىن جەڭىل اتلەتيكادان 23، بوكستان 16، نىسانا كوزدەۋدەن 14 (وق اتۋ مەن ستەند اتۋدان)، اۋىر اتلەتيكادان 12، تاس جولداعى ۆەلوسپورتتان 12 التىن مەدالدى جەڭىپ العان بولاتىن. ال قازاقستان ءۇشىن جازعى ازيا ويىندارىنىڭ ىشىندە ەڭ ءساتتى بولعان جارىس 2014 جىلعى ينچحوندا بولدى. كورەياداعى جارىستا وتانداستارىمىز 28 التىن، 23 كۇمىس، 33 قولا جۇلدەمەن جالپى ەسەپتە 37 ەلدىڭ اراسىنان ءتورتىنشى ورىنعا تۇراقتادى.

جالپى ەلىمىز كوماندالىق ەسەپتە ەڭ جاقسى كورسەتكىش رەتىندە ءتورتىنشى ورىننان ءتورت رەت (1994، 2002، 2006، 2014) كورىنگەن.

قازاقستان ۇلتتىق قۇراماسى ءۇشىن بيىلعى دودانىڭ ءبىر ەرەكشەلىگى، ول وتانداستارىمىزدىڭ سانى جاعىنان ەڭ كوپ قاتىساتىن ازيا ويىندارى بولادى.

ۇلتتىق وليمپيادا كوميتەتىنىڭ حابارلاۋىنشا، وتىنىمدەرگە سايكەس ازياداعا قاتىسۋ ءۇشىن 559 سپورتشى تىركەلگەن. ۇلتتىق وليمپيادا كوميتەتىنە سپورتشىلاردى جارىستان شىعارۋ تۋرالى ەشقانداي ءوتىنىش تۇسكەن جوق. وسىعان بايلانىستى ازيا وليمپيادالىق كەڭەسى شەشىم قابىلداعانعا دەيىن 559 سپورتشىنىڭ بارلىعى جارىسقا قاتىساتىن سپورتشىلار قۇرامىندا قالادى.

«سپورتشىنى جارىستان شىعارۋ تۋرالى شەشىمدى ۇلتتىق وليمپيادا كوميتەتىنىڭ ءوتىنىشى نەگىزىندە ازيا وليمپيادالىق كەڭەسى (اوك) مەن AINAGOC (ۇيىمداستىرۋ كوميتەتى) قابىلدايدى»، دەپ حابارلادى ۇلتتىق وليمپيادا كوميتەتى.

ولار جارىستىڭ 35 تۇرىنەن باق سىنايدى.

بۇل وتكەن ازيادامەن سالىستىرعاندا ەداۋىر كوپ. 2023 جىلى قىتايدىڭ حانچجوۋ قالاسىندا وتكەن سىندارعا 523 سپورتشى قاتىسقان ەدى.

2023 جىلى وتانداستارىمىز 10 التىن، 22 كۇمىس، 48 قولا جۇلدەمەن جالپى ەسەپتە 11-ورىنعا شىعىپ، تومەنگى كورسەتكىشىن كورسەتتى. سوندىقتان وسى جولى ساڭلاقتارىمىز التىن جۇلدەنى بارىنشا جەڭىپ الىپ، قۇرمەت تۇعىرىنىڭ ەڭ بيىك ساتىسىنان كورىنسە دەگەن تىلەگىمىز بار. ەڭ كوپ جۇلدە جيىنتىعى جەڭىل اتلەتيكا (50 جۇلدە جيىنتىعى)، ءجۇزۋ (41 جۇلدە جيىنتىعى)، بايداركا جانە كانوەدە ەسكەك ەسۋدە (24 جۇلدە جيىنتىعى) ۇلەستىرىلەدى. وتانداستارىمىزدىڭ سپورتتىڭ بۇل تۇرلەرىنەن جۇلدەنى جەڭىپ الۋعا مۇمكىندىگى زور. سونىمەن بىرگە ازيادانىڭ باعدارلاماسىنا العاش رەت قوسىلعان مما، پادەل، BMX فريستايل، سەرفينگ پەن تەكبولدان دا ناتيجە كورسەتۋگە بولادى.

ازيا ويىندارى – سپورتشىلار ءۇشىن وليمپيادادان كەيىنگى ەڭ ماڭىزدى جارىس. سوندىقتان ءتورت جىلدا ءبىر وتەتىن دوداعا دايىندىق وليمپيادا الاۋى سونگەننەن كەيىن-اق باستالىپ كەتەدى. بيىلعى باسەكەگە دە سپورشىلارىمىز تىڭعىلىقتى دايىندىقپەن اتتانىپ كەتتى.

جاقىندا استانادا تۋريزم جانە سپورت ءمينيسترى ەربول مىرزابوسىنوۆ ازياداعا قاتىساتىن ءبىر توپ سپورتشىمەن كەزدەسكەندە دە وسىناۋ ويىنداردىڭ  جىلدىڭ باستى سپورتتىق دودالارىنىڭ ءبىرى جانە ەلىمىز ءۇشىن ماڭىزدى جارىس ەكەنىن، ۇلتتىق قۇرامانى جاقسى دايايىنداۋ ءۇشىن مەملەكەت تاراپىنان قاجەتتى جاعدايلار جاسالعانىن اتاپ ءوتتى.  سونىمەن بىرگە قورىتىندى دايىندىق كەزەڭىندە سپورتشىلاردىڭ فيزيكالىق جاعدايىنا، قالپىنا كەلۋىنە جانە جارىس كۇندەرىنە تىكەلەي دايىندىعىنا ەرەكشە نازار اۋدارىلعانىن ايتتى.

«ازيا ويىندارى – جىلدىڭ باستى سپورتتىق دودالارىنىڭ ءبىرى جانە ەلىمىز ءۇشىن ماڭىزدى جارىس. كوماندانىڭ نەگىزگى بولىگى قازىردىڭ وزىندە جاپونيادا قورىتىندى دايىندىق كەزەڭىنەن ءوتىپ جاتىر. سپورتشىلاردىڭ كليماتقا، اۋا رايىنا، ۋاقىت بەلدەۋىنە الدىن الا بەيىمدەلىپ، ءوز جارىستارىنا وڭتايلى دايىندىقپەن كەلۋى ءۇشىن بارلىق جاعدايدى جاساۋعا تىرىستىق. سىزدەر ازياداعا جىلدار بويعى قاجىرلى ەڭبەكتى، جاتتىقتىرۋشىلاردىڭ ەڭبەگى مەن ميلليونداعان وتانداسىمىزدىڭ قولداۋىن ارقالاپ بارا جاتسىزدار. سىزدەرگە ءوز كۇشتەرىڭىزگە سەنىمدىلىك، ساتتىلىك جانە ۇزدىك ناتيجەلەر تىلەيمىن»،  دەدى ول.

كەزدەسۋدە ويىنداردىڭ اشىلۋ سالتاناتىنداعى سپورتشىلار شەرۋىندە قازاقستاننىڭ اتىنان شىعاتىن سپورتشىلار دا تانىستىرىلدى. ولار – دزيۋدودان وليمپيادا چەمپيونى ەلدوس سمەتوۆ پەن ۇستەل تەننيسىنەن ۇلتتىق قۇرامانىڭ سپورتشىسى سارۆينوز ميركاديروۆا.

وسى كەزدەسۋدە دزيۋدودان وليمپيادا چەمپيونى ەلدوس سمەتوۆ ءمينيستردىڭ قولىنان سالتاناتتى جاعدايدا مەملەكەتتىك تۋدى العان سوڭ، ۇلتتىق قۇرامانىڭ ازياداعا دايىندىعى تۋرالى ايتىپ، كوپشىلىككە ەل نامىسىن قورعاۋ ءۇشىن قولدا بار مۇمكىندىكتىڭ ءبارىن جاسايتىنىن جەتكىزدى.

«بۇگىن مەن ءۇشىن تاريحي كۇن. حح جازعى ازيا ويىندارىندا كوك تۋدى ۇستاپ شىعۋ مارتەبەسى ماعان بۇيىرىپ تۇر. مۇنداي ءسات مەندە ءبىرىنشى رەت. بۇل شەشىمدى قابىلداۋ وڭايعا سوققان جوق. سەبەبى، مۇنىڭ ارتىندا قانشاما جاۋاپكەرشىلىك، ەلدىڭ، مەملەكەتتىڭ سەنىمى بار. وسى ويىندا بار كۇشىمدى سالۋعا ۋادە بەرەمىن. ەلىمىزدىڭ كوك تۋىن ۇستاپ شىعۋ ۇلكەن مارتەبە»،  دەدى وليمپيادا چەمپيونى.

سونداي-اق، ول قازىرگى كەزدە مەملەكەت تاراپىنان سپورتشىعا بارلىق جاعداي جاسالعانىن، جارىستار مەن وقۋ-جاتتىعۋ جيىندارىندا قاجەتتى مەديتسينالىق كومەك، ءدارى-دارمەك، ساۋىقتىرۋ شارالارى مەن سپورتشىنىڭ قايتا قالپىنا كەلۋى ءۇشىن بارلىق جاعدايدىڭ ۇسىنىلىپ وتىرعانىن اتاپ ءوتتى.

ەلدوس ايتسا، راسىن ايتادى. وعان ءار جارىس سايىن مەملەكەت مۇمكىندىكتىڭ ءبارىن بەرىپ وتىر. سول مۇمكىندىكتى ول ءدۇبىرلى دودادا تاريحي جەڭىسكە اينالدىرىپ كەلەدى. 2024 جىلعى وليمپيادانىڭ التىن جۇلدەسى – وسى جۇيەلى قولداۋ مەن سپورتشىنىڭ ماڭداي تەرى، قاجىر-قايراتى مەن تاباندىلىعىنىڭ ناتيجەسى.

تابانبىلىق دەگەننەن شىعادى، دزيۋدويست پاريج وليمپياداسىنا دەيىن ەكى رەت وليمپيالىق ويىندارعا قاتىسىپ، ەكەۋىنەن التىن مەدال بولماسا دا جۇلدەسىز قايتپادى.

2016 جىلى وليمپيادانىڭ كۇمىس، 2020 جىلى قولا جۇلدەسىن الدى. سودان كەيىن ول ارمان-ماقساتىنا جەتۋ ءۇشىن «التىن جۇلدە الامىن»، دەپ جاتتىعۋىن جالعاستىرىپ، دايىندالا بەردى. مىنە، سول تاباندىلىقتىڭ ارقاسىندا ول 2024 جىلى وليمپيادانىڭ قۇرمەت تۇعىرىنىڭ ەڭ بيىك ساتىسىنا كوتەرىلدى.

بۇگىندە قازاقستان دەلەگاتسياسى تولىعىمەن كۇن شىعىس ەلىنە جەتتى. بيىل ۇلتتىق قۇرامانى دايارلاۋ جۇيەسىنە جاڭا ءتاسىل ەنگىزىلدى. قورىتىندى وقۋ-جاتتىعۋ جيىندارىنىڭ ەداۋىر بولىگى تىكەلەي ازيا ويىندارى وتەتىن ەلدە ۇيىمداستىرىلدى.

بۇل شەشىم سپورتشىلاردىڭ جارىس باستالعانعا دەيىن الدىن الا جەرگىلىكتى جاعدايعا بەيىمدەلۋى، ۋاقىت بەلدەۋىنە، كليماتتىق جاعدايلارعا جانە جارىس ورتاسىنىڭ ەرەكشەلىكتەرىنە ۇيرەنۋى ءۇشىن قابىلداندى. سونىمەن قاتار جاپونيادا سپورتشىلاردىڭ دايىندىعى تەكسەرىلىپ، جارىستار الدىنداعى جاتتىعۋ جۇكتەمەلەرىنە قاجەتتى تۇزەتۋلەر ەنگىزىلەدى.

ەندى قازاقستان قۇراماسى قاتىساتىن سپورت تۇرلەرىنە كەلسەك، ءبىزدىڭ ساڭلاقتار جارىستىڭ 35 تۇرىنە قاتىسادى. سونىڭ ىشىندە ەلدوس سمەتوۆ باستاعان دزيۋدوشىلارىمىز جۇلدەگە ۇمىتتىلەردىڭ ءبىرى بولىپ وتىر.

دەگەنمەن دزيۋدودا جاپونيانىڭ مىسى باسىم بولاتىن سياقتى. التىن جۇلدەگە باستى ۇمىتكەر رەتىندە جاپون ريۋدزيۋ ناگايامانىڭ اتى اتالىپ ءجۇر.  قازاقستان قۇراماسىندا ەلدوس سمەتوۆ، الەم چەمپيوناتىنىڭ ءفيناليسى ءابيبا ابۋجاقىنوۆا مەن ازيا چەمپيونى المات ادىلەتكە ءۇمىت ارتامىز. قازىر ءابيبا الەمدىك رەيتينگتە 19-ورىندا تۇر. دزيۋدو كۇرەسىندە لوس-اندجەلەس وليمپياداسىنا بارۋعا مۇمكىندىك بەرەتىن ۇپاي ۇلەستىرىلەدى.

بوكسشىلارعا كەلسەك،  ازياداعا قازاقستان ساپىنان 9 الەم چەمپيونى مەن 2 الەم چەمپيوناتىنىڭ ءفيناليسى قاتىسادى. بۇل دودادا 11 جۇلدە جيىنتىعى ۇلەستىرىلەدى.  شىنىن ايتقاندا، بىلعارى قولعاپ يەلەرىنىڭ قاي-قايسىسى بولسىن التىن جۇلدەنى جەڭىپ الۋعا ۇمىتكەر. بۇعان دەيىن قازاقستان ۇلتتىق قۇراماسى انگليانىڭ ليۆەرپۋل قالاسىندا وتكەن الەم چەمپيوناتى مەن موڭعوليادا جالاۋى جەلبىرەگەن ازيا چەمپيوناتىندا جالپى ەسەپتە توپ جارعان ەدى. سوعان قاراپ ۇلتتىق قۇراما تاعى دا بيىكتەن كورىنۋى ابدەن مۇمكىن. دەگەنمەن، ازيادا ەلىمىزگە وزبەكستان، ءۇندىستان، موڭعوليا، پاكىستان، قىتاي، جاپونيا سياقتى ەلدەردىڭ وكىلدەرى دە باسەكەلەس بولا الادى. ولار جاقىندا ناگويا قالاسىندا وتكەن سوڭعى حالىقارالىق وقۋ-جاتتىعۋ جيىنىندا قازاقستان قۇراماسىمەن بىرگە ءبىر زالدا جاتتىقتى.

ۆەلوسپورتتان الەكسەي لۋتسەنكونىڭ توپ جارۋى ابدەن مۇمكىن. ول 2014، 2018، 2023 جىلدارى جازعى ازيا ويىندارىندا جەكە سايىستا چەمپيون اتانعان. الەكسەي جاقىندا يسپانيادا وتكەن «ۆۋەلتا» كوپكۇندىگىنىڭ كەزەڭىندە ءتورتىنشى ورىنعا تۇراقتاپ، جاقسى قىرىنان كورىندى.

قازىرگى كەزدە ول ازيا ويىندارىندا ەڭ كوپ التىن مەدال جەڭىپ العان سپورتشىلاردىڭ قاتارىنا كىرەدى. بيىلعى باسەكەدە ول 160 شاقىرىمعا توپتىق جارىستا جانە ۋاقىت ءۇشىن وتەتىن جەكەلەي سايىستا باق سىنايدى.

توپتىق جاتتىعۋدا الەكسەي لۋتسەنكودان بولەك، بيىلعى ازيا چەمپيونى ەۆگەني فەدوروۆ پەن نيكوليا ۆينوكۋروۆ سىنعا تۇسەدى. ولار 2018 جىلدان بەرى جازعى ازيا ويىندارىندا تۇراقتى تۇردە 2 التىن جۇلدە الىپ كەلەدى. وسى جولى دا سول جەتىستىگىن قايتالسا نۇر ۇستىنە نۇر بولار ەدى.

ترەكتەگى جانە تاسجولداعى ۆەلوسپورتقا ماماندانعان ۆەلوشاباندوز ريناتا سۇلتانوۆا بيىل ازيا ويىندارىنا ەكىنشى رەت قاتىسادى. بۇعان دەيىن ول حانچجوۋدا وتكەن ازيا ويىندارىندا سىنعا تۇسكەن.

سول جىلى ريناتا قۇرلىقتىڭ باستى دوداسىندا العاشقى مەدالىن جەڭىپ العان ەدى. ەندى وسى جولى دا ونىڭ جۇلدەگەرلەردىڭ قاتارىنان كورىنەتىنىنە سەنگىمىز كەلەدى.

اۋىر اتلەتيكادا بىرنەشە سپورتشىمىز 12 جىلدان كەيىن عانا جازعى ازيا ويىندارىنا قاتىسۋعا مۇمكىندىك الدى. بۇل سپورت تۇرىنەن 2014 جىلى مارگاريتا ەليسەەۆا چەمپيون بولعان ەدى.  2018 جىلى جارىسقا بىردە-ءبىر سپورتشىمىز قاتىسپادى. ال 2023 جىلى دوپينگ داۋىنا بايلانىستى سپورتشىلارىمىز سەنىمدى اقتامادى. الەكساندر ۋۆاروۆ قانا قولا جۇلدەگە يە بولدى. ال بيىلعى ازيا ويىندارىندا قازاقستان اتىنان ون اۋىر اتلەت باق سىنايدى.

ءبىر وكىنىشتىسى، قۇراما تىزىمىنە كوماندانىڭ كەيبىر كوشباسشىلارى كىرمەي قالدى. ءتىپتى، الەم چەمپيونى ارتەم انتروپوۆ پەن جاسوسپىرىمدەر اراسىندا ەكى دۇركىن الەم چەمپيونى ەدىگە ەمبەردى دە بۇل باسەكەدەن تىس قالادى. ويتكەنى، 27 قازاندا نينبودا 2028 جىلعى وليمپيالىق ويىندارعا جولداما بەرەتىن الەم چەمپيوناتى باستالادى. سوندىقتان ازيا ويىندارىنا قاتىساتىن سپورتشىلاردىڭ اراسىندا ەرەسەكتەر اراسىنداعى حالىقارالىق جارىستاردا ەڭ ەلەۋلى ناتيجەگە جەتكەن نۇرعيسا ادىلەت ۇلى مەن ليۋبوۆ كوۆالچۋكتى عانا ايتۋعا بولادى.

نۇرعيسا 95 كەلىگە دەيىنگى سالماقتا باق سىنايدى. ول جارىسقا الەم چەمپيونى رەتىندە قاتىسادى. الايدا ونىڭ جۇلدەلەر قورجىنىندا ازيا ويىندارىنىڭ مەدالى ازىرگە جوق.

85 كەلىدە الەكسەي چۋركيننىڭ دە جۇلدە الۋعا مۇمكىندىگى بار. ليۋبوۆ كوۆالچۋك بولسا، 86 كەلىدەن اسا سالماقتا ازيا ويىندارىنا ءىرى حالىقارالىق جارىستاردا جۇلدە العان تاجىريبەلى سپورتشى رەتىندە كۇش سىناسادى.

ازيا ويىندارىندا اۋىر اتلەتيكا جارىستارى 23-29 قىركۇيەك ارالىعىندا بولادى. نۇرعيسا ادىلەت ۇلى 28 قىركۇيەكتە سىنعا تۇسسە، ليۋبوۆ كوۆالچۋك 29 قىركۇيەكتە وتانداستارىمىزدىڭ اراسىندا سوڭعى بولىپ جارىس جولىنا شىعادى.

سەمسەرلەسۋدەن ەرلەر قۇراماسى بيىلعى جىلدى وتە جاقسى باستادى. قازىر دە جارىستاردا جاقسى ناتيجە كورسەتىپ كەلەدى. ماۋسىم ايىندا ساپى سايىسىنان ەرلەر قۇراماسى جاپونيانى جەڭىپ، ازيا چەمپيونى اتانسا، شىلدە ايىندا ءوز تاريحىندا العاش رەت الەم چەمپيونى اتاعىنا يە بولدى.

سپورتتىڭ بۇل تۇرىنەن ەل قۇراماسىن ۋكراينادان كەلگەن الەكساندر گورباچۋك جاتتىقتىرادى. ول 2024 جىلعا دەيىن 15 جىل جاپونيانى جاتتىقتىرعان بولاتىن. ايەلدەر اراسىنداعى ساپى سايىسىندا يرينا باكالدينا دا جەڭىسكە دەگەن جىگەرىن كورسەتىپ كەلەدى. ول رەسەيدەن كەلىپ، قازاقستان قۇراماسىنا تەز ءسىڭىسىپ، ازيا چەمپيوناتىندا جارىستىڭ باستى ءفاۆوريتى سانالعان الەم چەمپيونى وڭتۇستىك كورەيانىڭ وكىلى سون سەن سارانى جەڭگەن ەدى. سونىمەن بىرگە پاريج وليمپياداسىندا شيرەك فينالعا جەتكەن ايگەرىم سارىبايدىڭ كەزەگى كەلسە دەپ تە وتىرمىز. ودان دا ءۇمىتىمىز جوق ەمەس.

كوركەم گيمناستيكادا  اقمارال ەرەكەشەۆا مەن ايبوتا ەرتايقىزىنا ءۇمىت ارتامىز.

تامىز ايىندا گەرمانيانىڭ فرانكفۋرت قالاسىندا وتكەن الەم چەمپيوناتىندا اقمارال ەرەكەشەۆا 115.800 ۇپايمەن ازيا قۇرلىعى بويىنشا ەڭ جوعارعى التىنشى ورىندى قاناعات تۇتتى. اقمارال — كوپسايىس قورىتىندىسى بويىنشا جاسوسپىرىمدەر اراسىنداعى الەم چەمپيونى. سولاي دەسەك تە ونىڭ قارسىلاستارى دا قارا جاياۋ سپورتشىلار ەمەس. وسى دودادا 10-ورىنعا جي ۆانگ (قىتاي) تۇراقتاسا، بيىلعى ازيا چەمپيونى تاحمينا يكروموۆا (وزبەكستان) 13-ورىندى يەلەندى. دەسەك تە ولارعا قاراعاندا اقمارال ەرەكەشەۆانىڭ مۇمكىندىگى جاقسىراق. اقمارال جاقىندا چەحيانىڭ برنو قالاسىندا وتكەن گران-پري كەزەڭىن بەس مەدالدى جەڭىپ الدى.

وتانداسىمىز جەكەلەي كوپسايىستا ەكىنشى ورىن العان ەدى. سونداي-اق جەكەلەي جاتتىعۋلار بويىنشا ءتورت فينالعا شىقتى. ناتيجەسىندە اقمارال شىعىرشىقپەن ورىندالاتىن جاتتىعۋدا 29.150 ۇپاي جيناپ، التىن مەدالدى يەلەندى. ال دوپپەن ورىندالاتىن جاتتىعۋدا 28.000 ۇپاي، ۇرشىقتار باسەكەسىندە 29.050 ۇپاي جانە تاسپامەن ورىندالاتىن جاتتىعۋدا 27.600 ۇپاي ەنشىلەپ، ءۇش كۇمىس مەدالعا يە بولدى.

وسىلايشا، اقمارال ەرەكەشەۆا ءبىر التىن جانە ءتورت كۇمىس مەدالمەن جارىستى اياقتادى.

ايبوتا ەرتايقىزىنا كەلسەك، ول مامىر ايىندا وتكەن ازيا چەمپيوناتىندا 113.650 ۇپايمەن كۇمىس جۇلدەگەر اتانعان. سوندىقتان ازيا ويىندارىندا چەمپيوندىق اتاققا باستى تالاس وسى 3 ەلدىڭ اراسىندا بولۋى مۇمكىن.

سپورتتىق گيمناستيكادان بيىل الەم كۋبوگى ءۇشىن وتكەن ءتۋرنيردىڭ  بەس كەزەڭىندە وتانداستارىمىز 7 كۇمىس، 3 قولا جۇلدەنى يەلەندى. سول كەزدەگى ناتيجەگە قاراپ، ات سناريادى بويىنشا زەينوللا ىدىرىسوۆ، پاريج وليمپياداسىنىڭ كۇمىس جۇلدەگەرى ناريمان قۇربانوۆ، كەرمەدەگى جاتتىعۋدان ميلاد كاريميدىڭ جۇلدە الۋعا مۇمكىندىگى جاقسىراق دەپ ايتۋعا بولادى.

كۇرەس تۇرلەرىنەن بىرنەشە بالۋاننىڭ جۇلدەگە ىلىگۋگە مۇمكىندىگى بار. مىسالى، الەم چەمپيوندارى پاريج وليمپياداسىنىڭ كۇمىس جۇلدەگەرى دەمەۋ جادىراەۆ، ريزابەك ايتمۇحان، وليمپيادالىق سالماققا كوتەرىلگەن نۇرقوجا قايپانوۆ، الەم چەمپيوناتىنىڭ بىرنەشە مارتە جۇلدەگەرى ازامات داۋلەتبەكوۆ، ءجاميلا باقبەرگەنوۆا، ەلميرا سىزدىقوۆا، U20 ساناتىندا الەم چەمپيونى ەدىگە قاسىمبەك پەن U23 ساناتىندا الەم چەمپيونى شۇعىلا ومىربەكتى قۇرمەت تۇعىرىنان كورىپ قالۋىمىز عاجاپ ەمەس.

ازيادادا كۇرەستەن قۇراما كوماندا نۇرماحان تىناليەۆتەن كەيىن 2014 جىلدان بەرى جۇلدە الا الماي كەلەدى. وسى ولقىلىقتىڭ ورنىن بالۋاندارىمىز تولتىرادى دەپ ويلايمىز.

ستەند اتۋدان اسەم ورىنبايعا، جالپى ايەلدەر كومانداسىنا ءۇمىت ارتامىز. ول بيىلعى الەم كۋبوگىندا سكيت جاتتىعۋى بويىنشا الماتىداعى كەزەڭدە توپ جاردى. ال كوماندالىق سايىستا ايەلدەر قۇراماسى جىلدىڭ باسىندا قاتاردىڭ استاناسى دوحادا ازيا چەمپيونى اتاعىن جەڭىپ الدى.

جازعى ازيادادا ساداق اتۋدان جۇلدە 2002 جىلدان بەرى بۇيىرماي كەلەدى.  بىراق بىلتىر وڭتۇستىك كورەيادا وتكەن الەم چەمپيوناتىندا كومپاۋند باعدارلاماسى بويىنشا ساداق اتۋدان كوماندالىق سىنعا قاتىسقان بۇرىمدىلارىمىز قولا جۇلدەنى جەڭىپ الدى. بانگلادەشتە وتكەن ازيا چەمپيوناتىندا ەرلەر قۇراماسى ءبىرىنشى ورىندى يەلەندى. سوندىقتان بيىلعى سارىقۇرلىق باسەكەسىندە دە وتانداستارىمىز جۇلدە الۋى ابدەن مۇمكىن. ويتكەنى، ازيادانىڭ چەمپيونىنا لوس-اندجەلەس وليمپياداسىنىڭ جولداماسى بەرىلەدى.

نىسانا كوزدەۋدە كورپەگە قاراي كوسىلەتىن شىعارمىز.  سپورتتىڭ وسى تۇرىنەن قۇرامانى اتاقتى ولگا دوۆگۋن جاتتىقتىرادى. جاقىندا ول كوماندانىڭ الدىنا ماقسات قويىپ وتىرعانىن ايتتى. بىراق تا كومانلدانىڭ قارسىلاستارى دا وڭاي شاعىلاتىن جاڭعاق ەمەس. مىسالى، ءبىر |قىتايدىڭ ءوزىن الساق، بۇل ەلدىڭ مەرگەندەرى بيىلعى الەم كۋبوگى ءۇشىن جارىستا جاقسى ناتيجە كورسەتتى.

ءۇندىستان قۇراماسى دا مىقتىلاردىڭ قاتارىندا. بۇل مەملەكەتتىڭ وكىلدەرى ۇزدىك ۇشتىكتە كەلەدى.

ازيادادا  بارلىق ەلدەر ءۇشىن كانوە مەن بايداركادا ەسكەك ەسۋ جۇلدە كوپ اكەلەتىن سپورت ءتۇرى بولىپ سانالادى. 2023 جىلى حانچجوۋدا وتكەن ازيادادان ساباق الساق، بيىلعى دودادا وسىناۋ سۋ سپورتىنان مەدال الۋىمىز كەرەك. سونىمەن بىرگە سۋ دوبى، تاەكۆوندو، تەننيس، جەڭىل اتلەتيكادان،  وليمپيادا باعدارلاماسىنا كىرمەيتىن كاراتە، دجيۋ-دجيتسۋ، مما-دان چەمپيوندار شىعىپ، التىن جۇلدە الۋىمىز مۇمكىن. بۇل تەك بولجام، جورامال عانا. الدا نە بولاتىنىن جارىستىڭ ءوزى كورسەتەدى.

بيىلعى دودانىڭ تاعى ءبىر ەرەكشە تۇسى، جەلكەندى سپورت، ترياتلون، تەننيس، كوگالداعى حوككەي، سەرفينگ پەن سكۆوشدان جەڭىمپاز اتانعاندار 2028 جىلى لوس-اندجەلەس وليمپياداسىنىڭ ليتسەنزياسىن الادى.

جالپى، قولدا بار مالىمەتكە قاراعاندا، قازاقستان قۇراماسىنىڭ وسى ازيادادا 100-گە جۋىق مەدالدى جەڭىپ الۋ جوسپارى بار.

P.S. سونىمەن بۇگىن كۇن شىعىس ەلىندە حح جازعى ازيا ويىندارىنىڭ جالاۋى كوتەرىلەدى. بۇل جارىستار 4 قازانعا دەيىن سوزىلادى. ءبىزدىڭ ەلدەن 559 سپورتشى ەل نامىسىن قورعاۋعا اتتاندى. ارينە، ولاردىڭ ءبارى جارىسقا جولداما-ليتسەنزيا جەڭىپ العان سپورتشىلار. دەگەنمەن جولداما جەڭىپ الۋ باسقا دا ەل اتىنان نامىسقا تىرىسىپ، جارىسقا ءتۇسۋ ءبىر باسقا.

ارينە، جاس، تالانتتى جولداما جەڭىپ العان جاستاردى دا ويىندارعا تاجىريبە جيناقتاۋ ماقساتىندا اپارۋ كەرەك. ول جاعىنان داۋ جوق. مىسالى، 2023 جىلى قىتايدىڭ حانچجوۋ قالاسىنا 524 سپورتشى بارىپ، 10 التىن، 22 كۇمىس، 48 قولا جۇلدە الىپ، جالپىكوماندالىق ەسەپتە 11-ورىندى قاناعات تۇتىپ قايتتى. ەندى بيىلعى باسەكەگە 571 سپورتشى قاتىسادى دەلىنىپ وتىر. بۇعان دەيىن ەلىمىزدەن ازياداعا وسىنشاما سپورتشى قاتىسقان ەمەس. بۇل ءبىر جاعىنان جولداما-ليتسەنزيانى جەڭىپ العان جاستارىمىزدىڭ قاتارى كوبەيىپ كەلە جاتقانىن بىلدىرەدى. ال مەدالدىڭ ەكىنشى جاعىنا قاراساق، وسىنشاما وتانداسىمىز ازياداعا بارسا، بارىنشا تىرىسىپ، التىن جۇلدەنى كوپتەپ الىپ كەلسە دەگىمىز كەلەدى. ويتكەنى، مەملەكەت تاراپىنان سپورتشىلاردى قولداۋ ءۇشىن جاعدايدىڭ ءبارى جاسالىپ جاتىر. ءبارى دە ەندى ادامنىڭ ءوز قولىندا.

 

داستان كەنجالين،

استانا