ازيا ويىندارىنا قازاقستاننان 559 سپورتشى تىركەلدى

تۋريزم جانە سپورت مينيسترلىگى  سپورت جانە دەنە شىنىقتىرۋ ىستەرى كوميتەتى سپورتتى دامىتۋ ديرەكتسياسىنىڭ مالىمەتىنە قاراعاندا، قازاقستان ۇلتتىق قۇراماسىنان 19 قىركۇيەك پەن 4 قازان ارالىعىندا جاپونيانىڭ ايتي پرەفەكتۋراسى مەن ناگويا قالاسىندا وتەتىن XX جازعى ازيا ويىندارىنا قاتىسۋ ءۇشىن 559 سپورتشىسى تىركەلدى.

بۇل باسەكەدە وتانداستارىمىز جارىس باعدارلاماسىنا ەنگىزىلگەن 43 سپورت ءتۇرىنىڭ 35-ءى بويىنشا جۇلدەگە تالاسادى.

قازاقستان ۇلتتىق وليمپيادا كوميتەتىنىڭ حابارلاۋىنشا، وتىنىمدەرگە سايكەس ازياداعا قاتىسۋ ءۇشىن 559 سپورتشى تىركەلگەن. ۇلتتىق وليمپيادا كوميتەتىنە سپورتشىلاردى جارىستان شىعارۋ تۋرالى ەشقانداي ءوتىنىش تۇسكەن جوق. وسىعان بايلانىستى ازيا وليمپيادالىق كەڭەسى شەشىم قابىلداعانعا دەيىن 559 سپورتشىنىڭ بارلىعى جارىسقا قاتىساتىن سپورتشىلار قۇرامىندا قالادى.

«سپورتشىنى جارىستان شىعارۋ تۋرالى شەشىمدى ۇلتتىق وليمپيادا كوميتەتىنىڭ ءوتىنىشى نەگىزىندە ازيا وليمپيادالىق كەڭەسى (اوك) مەن AINAGOC (ۇيىمداستىرۋ كوميتەتى) قابىلدايدى»، دەپ حابارلادى ۇلتتىق وليمپيادا كوميتەتى.

جازعى ازيا ويىندارىنىڭ رەسمي اشىلۋ سالتاناتى 19 قىركۇيەكتە Nagoya City Mizuho Park Athletic Stadium ستاديونىندا وتەدى.

سالتاناتتى ءىس-شارا قازاقستان ۋاقىتىمەن ساعات 14:00-دە باستالادى. قۇرلىقتىق دوداعا ازيانىڭ 45 ەلىنەن شامامەن 15 مىڭ سپورتشى قاتىسادى دەپ جوسپارلانىپ وتىر.

جارىس باعدارلاماسى بويىنشا 469 مەدالدار جيىنتىعى ساراپقا سالىنادى. XX جازعى ازيا ويىندارى جاپونيانىڭ 53 سپورت نىسانىندا ۇيىمداستىرىلادى.

ويىندار ايتي پرەفەكتۋراسى مەن ناگويا قالاسىنان بولەك، توكيو جانە وساكا قالالارىندا، سونداي-اق سيدزۋوكا مەن گيفۋ پرەفەكتۋرالارىندا وتەدى.

داستان كەنجالين،

استانا