Azııa oıyndaryna Qazaqstannan 559 sportshy tirkeldi

Týrızm jáne sport mınıstrligi  Sport jáne dene shynyqtyrý isteri komıteti Sportty damytý dırekııasynyń málimetine qaraǵanda, Qazaqstan ulttyq quramasynan 19 qyrkúıek pen 4 qazan aralyǵynda Japonııanyń Aıtı prefektýrasy men Nagoıa qalasynda ótetin XX jazǵy Azııa oıyndaryna qatysý úshin 559 sportshysy tirkeldi.

Bul básekede otandastarymyz jarys baǵdarlamasyna engizilgen 43 sport túriniń 35-i boıynsha júldege talasady.

Qazaqstan Ulttyq Olımpıada komıtetiniń habarlaýynsha, ótinimderge sáıkes Azıadaǵa qatysý úshin 559 sportshy tirkelgen. Ulttyq Olımpıada komıtetine sportshylardy jarystan shyǵarý týraly eshqandaı ótinish túsken joq. Osyǵan baılanysty Azııa Olımpıadalyq keńesi sheshim qabyldaǵanǵa deıin 559 sportshynyń barlyǵy jarysqa qatysatyn sportshylar quramynda qalady.

«Sportshyny jarystan shyǵarý týraly sheshimdi Ulttyq Olımpıada komıtetiniń ótinishi negizinde Azııa Olımpıadalyq keńesi (AOK) men AINAGOC (uıymdastyrý komıteti) qabyldaıdy», dep habarlady Ulttyq Olımpıada komıteti.

Jazǵy Azııa oıyndarynyń resmı ashylý saltanaty 19 qyrkúıekte Nagoya City Mizuho Park Athletic Stadium stadıonynda ótedi.

Saltanatty is-shara Qazaqstan ýaqytymen saǵat 14:00-de bastalady. Qurlyqtyq dodaǵa Azııanyń 45 elinen shamamen 15 myń sportshy qatysady dep josparlanyp otyr.

Jarys baǵdarlamasy boıynsha 469 medaldar jıyntyǵy sarapqa salynady. XX jazǵy Azııa oıyndary Japonııanyń 53 sport nysanynda uıymdastyrylady.

Oıyndar Aıtı prefektýrasy men Nagoıa qalasynan bólek, Tokıo jáne Osaka qalalarynda, sondaı-aq Sıdzýoka men Gıfý prefektýralarynda ótedi.

Dastan KENJALIN,

ASTANA