باكۋ بوزكىلەمى قازاق كۇرەسىنىڭ كەڭىستىگىن كەڭەيتتى

ازەربايجاننىڭ استاناسى باكۋدە وتكەن قازاق كۇرەسىنەن XII ءالەم چەمپيوناتى ءتول كۇرەستىڭ حالىقارالىق دەڭگەيدەگى باسەكەسى جىل وتكەن سايىن كۇشەيىپ كەلە جاتقانىن كورسەتتى، دەپ حابارلادى Qazaq Kuresi اسسوتسياتسياسىنىڭ ءباسپاسوز قىزمەتى.

ەكى كۇنگە سوزىلعان دوداعا 24 ەلدەن 159 سپورتشى قاتىسىپ، ەرلەر مەن ايەلدەر اراسىندا 16 سالماق دارەجەسى بويىنشا الەم چەمپيوندارى انىقتالدى. سونىڭ 11-ىندە قازاقستاننان وزگە مەملەكەتتەردىڭ بالۋاندارى جەڭىسكە جەتتى.

باكۋ بوزكىلەمىندەگى ناتيجەنىڭ باستى ەرەكشەلىگى دە وسىندا. بۇعان دەيىن حالىقارالىق جارىستاردا قازاقستان بالۋانداردىڭ باسىمدىعى ءجيى بايقالسا، بيىلعى الەم چەمپيوناتىندا بىرنەشە مەملەكەتتىڭ وكىلدەرى التىن جۇلدەگە تالاسىپ قانا قويماي، چەمپيون اتاندى. بۇل قازاق كۇرەسىنىڭ شەتەلدە تەك قاتىسۋشىلار سانىمەن ەمەس، سپورتتىق شەبەرلىك دەڭگەيى جاعىنان دا دامىپ كەلە جاتقانىن اڭعارتتى.

ەرلەر اراسىنداعى سەگىز سالماقتىڭ بەسەۋىندە شەتەلدىك سپورتشىلار توپ جاردى. اتاپ ايتقاندا، 66 كەلىدە تاجىكستان وكىلى ابدۋلفيز مۋستافوي، 82 كەلىدە ونىڭ وتانداسى ناۆرۋز كاريمزود الەم چەمپيونى اتاندى. گرۋزيالىق بالۋاندار دا ەكى التىن يەلەندى: 90 كەلىدە گيورگي كاتسياشۆيلي، +100 كەلىدە گيورگي چاگەليشۆيلي قارسىلاستارىنان باسىم ءتۇستى. 100 كەلىدە ازەربايجان وكىلى تۋنجاي شاميل چەمپيون بولدى.

قازاقستان قۇراماسى ەرلەر اراسىندا ءۇش سالماقتا التىن الدى. 55 كەلىدە رۋزيمون تۋگۋشەۆ، 60 كەلىدە ەرنۇر سۇلەيمەن، 74 كەلىدە جۇماجان قوجامبەكوۆ قۇرمەت تۇعىرىنىڭ ەڭ بيىك ساتىسىنان كورىندى.

اتاپ ايتقاندا، الەم چەمپيوناتىنىڭ باس دەمەۋشىسى – «سامۇرىق-قازىنا» ۇلتتىق ءال-اۋقات قورى» اق، ال دەمەۋشىسى – Sport Qory سپورتتى قولداۋ قورى بولعانىن اتاپ وتكەن ءجون. ءسويتىپ، ەرلەر اراسىنداعى جالپىكوماندالىق ەسەپتە قازاقستان 155 ۇپايمەن ءبىرىنشى ورىنعا يە بولسا، گرۋزيا 145 ۇپايمەن ەكىنشى، تاجىكستان 120 ۇپايمەن ءۇشىنشى ورىنعا تۇراقتادى.

ايەلدەر بەلدەسۋىندە حالىقارالىق باسەكە ودان دا ايقىن كورىندى. سەگىز سالماقتىڭ التاۋىندا شەتەلدىك بالۋاندار جەڭىسكە جەتتى. 48 كەلىدە يران وكىلى شيۆا اليشاح دجاحانگيري التىن السا، وزبەكستان قۇراماسى بىردەن ءۇش الەم چەمپيونىن شىعاردى. مۋبينابونۋ ۆاليدجونوۆا 52 كەلىدە، سەۆينچ توشپۋلاتوۆا 56 كەلىدە، تيللو حونيمكۋلوۆا 60 كەلىدە چەمپيون بولدى.

70 كەلىدە جارىس قوجايىنى ازەربايجاننىڭ وكىلى گۇنەل گاسانلى توپ جاردى. ال ەڭ اۋىر سالماقتا يتاليا سپورتشىسى ەلەونورا گەتتي الەم چەمپيونى اتاندى. ەۋروپالىق بالۋاننىڭ قازاق كۇرەسىنەن الەمدىك دودادا التىن الۋى ءتول كۇرەستىڭ گەوگرافياسى كەڭەيىپ كەلە جاتقانىنىڭ تاعى ءبىر كورىنىسى بولدى.

قازاقستان ايەلدەر قۇراماسىنان سەزىم وتەۋلى 65 كەلىدە، نازەركە تىلەۋحانوۆا 77 كەلىدە الەم چەمپيونى اتاندى. ايەلدەر اراسىنداعى جالپىكوماندالىق ەسەپتە قازاقستان 141 ۇپايمەن ءبىرىنشى، وزبەكستان 123 ۇپايمەن ەكىنشى، گرۋزيا 115 ۇپايمەن ءۇشىنشى ورىن الدى.

وسىلايشا، باكۋدە ساراپقا سالىنعان 16 التىن مەدالدىڭ بەسەۋى قازاقستانعا، قالعان 11-ءى شەتەلدىك بالۋاندارعا بۇيىردى. تاجىكستان، گرۋزيا، ازەربايجان، وزبەكستان، يران مەن يتاليا سپورتشىلارىنىڭ الەم چەمپيونى اتانۋى قازاق كۇرەسىنىڭ حالىقارالىق دەڭگەيدەگى باسەكەسى بىرتىندەپ جاڭا سيپات الىپ كەلە جاتقانىن كورسەتتى.

سوڭعى جىلدارى قازاق كۇرەسىنىڭ حالىقارالىق بايلانىستارى دا كەڭەيىپ كەلەدى. اتاپ ايتار بولساق، Qazaq Kuresi اسسوتسياتسياسى 2022 جىلى United World Wrestling (UWW) ۇيىمىنىڭ تولىققاندى مۇشەسى بولعان ەدى. بۇعان دەيىن الەم، ازيا، ەۋروپا، افريكا چەمپيوناتتارى مەن الەم كۋبوكتارى ءار قۇرلىقتا ۇيىمداستىرىلىپ، قازاق كۇرەسىنىڭ حالىقارالىق جارىستار جۇيەسى قالىپتاستى.

بۇگىندە قازاق كۇرەسى الەمنىڭ 40-تان استام ەلىندە دامىپ كەلەدى. باكۋ چەمپيوناتى سول جۇمىستىڭ ناقتى ناتيجەسىن كورسەتتى: شەتەلدىك سپورتشىلار ەندى قازاق كۇرەسىنە تەك قاتىسىپ قانا قويماي، ونىڭ ءادىس-تاسىلدەرىن مەڭگەرىپ، الەمدىك دەڭگەيدە جۇلدە ءۇشىن كۇرەسە الاتىن دارەجەگە جەتتى.

باكۋدەگى الەم چەمپيوناتىنىڭ باستى قورىتىندىسى دا مەدال سانىمەن عانا ولشەنبەيدى. 24 ەلدىڭ باسىن قوسقان دودادا ءارتۇرلى كۇرەس مەكتەبىنەن كەلگەن بالۋانداردىڭ چەمپيون اتانۋى قازاق كۇرەسىنىڭ حالىقارالىق سپورت كەڭىستىگىندەگى اۋقىمى مەن باسەكەسىن كەڭەيتە ءتۇستى.