ەركىن وقاسوۆ تاعى ءبىر قىزمەتكە كىرىستى

قازاقستان كۇرەس فەدەراتسياسىنىڭ توراعاسى ەركىن وقاسوۆ بىرىككەن كۇرەس الەمى ۇيىمى (United World Wrestling) بيۋروسىنىڭ مۇشەسى بولىپ سايلاندى، دەپ حابارلادى قازاقستان كۇرەس فەدەراتسياسىنىڭ ءباسپاسوز قىزمەتى.

فەدەراتسيا ءباسپاسوز قىزمەتىنىڭ مالىمەتىنە قاراعاندا، سايلاۋ بۇگىن استانادا بىرىككەن  كۇرەس الەمى ۇيىمىنىڭ كەزەكتى كونگرەسىندە بولدى.

وعان UWW باسشىلىعى مەن الەمنىڭ ءار ەلىنەن كەلگەن ۇلتتىق فەدەراتسيالاردىڭ دەلەگاتتارى قاتىستى. جيىننىڭ كۇن تارتىبىندەگى نەگىزگى ماسەلەلەردىڭ ءبىرى ۇيىمنىڭ پرەزيدەنتى مەن بيۋرو مۇشەلەرىن سايلاۋعا ارنالدى.

«وسى باسقوسۋدا قازاقستان كۇرەس فەدەراتسياسىنىڭ توراعاسى ەركىن وقاسوۆ 117 دەلەگاتتىڭ داۋىسىن جيناپ، UWW بيۋروسىنىڭ قۇرامىنا ەندى. بۇل شەشىم قازاقستاننىڭ حالىقارالىق كۇرەس قاۋىمداستىعىمەن بايلانىسىن ودان ءارى نىعايتىپ، الەمدىك كۇرەستىڭ دامۋىنا قاتىستى ماڭىزدى ماسەلەلەردى تالقىلاۋعا جانە شەشىم قابىلداۋعا مۇمكىندىك بەرەدى.

ەركىن قادىرعالي ۇلىنىڭ جەتەكشىلىگىمەن قازاقستان كۇرەس فەدەراتسياسى حالىقارالىق ىنتىماقتاستىقتى كەڭەيتۋ، ءىرى حالىقارالىق جارىستاردى ەلىمىزدە وتكىزۋ جانە وتاندىق كۇرەستى دامىتۋ باعىتىندا جۇمىس جۇرگىزىپ كەلەدى»، دەلىنگەن حابارلامادا.

استانادا وتكەن UWW كونگرەسى الەمدىك كۇرەستىڭ الداعى دامۋ باعىتتارىن ايقىندايتىن ماڭىزدى جيىنداردىڭ ءبىرى. كونگرەسس اياسىندا ۇيىمنىڭ 2026-2032 جىلدارعا ارنالعان ستراتەگياسى، تورەشىلىك جۇيەسى، قارجىلىق جانە ۇيىمداستىرۋشىلىق ماسەلەلەر، سونداي-اق 2028 جىلعى لوس-اندجەلەس وليمپياداسىنا دايىندىق ماسەلەسى قارالدى.

بىرىككەن كۇرەس الەمى ۇيىمىنىڭ بيۋروسى – ۇيىمىنىڭ نەگىزگى باسقارۋ ورگاندارىنىڭ ءبىرى. بيۋرو حالىقارالىق كۇرەستىڭ دامۋى، جارىستاردى ۇيىمداستىرۋ، سپورتتىق جانە ستراتەگيالىق ماسەلەلەر بويىنشا ماڭىزدى شەشىمدەر قابىلداۋمەن اينالىسادى.

ەرتەڭ استاناداعى «بارىس ارەنا» سپورت كەشەنىندە گرەك-ريم، ەركىن جانە ايەلدەر كۇرەسىنەن ەرەسەكتەر اراسىنداعى الەم چەمپيوناتى باستالادى. دۇرمەكتى دودا 1 قاراشاعا دەيىن بولادى. جىلدىڭ باستى دودالارىنىڭ بىرىنە 135 ەلدەن 900-دەن استام سپورتشى قاتىسادى.