گرەك-ريم كۇرەسىنەن قورجىنعا ءۇش جۇلدە ءتۇستى

استانادا كۇرەس تۇرلەرىنەن ءوتىپ جاتقان كۇرەستەن الەم چەمپيوناتىندا گرەك-ريم كۇرەسىنەن بەلدەسۋلەر اياقتالدى. قازاقستان قۇراماسى ءۇش قولا مەدال جەڭىپ الدى.

24 قازاندا باستالعان الەم چەمپيوناتىندا ەلىمىزدىڭ اتىنان ون سالماق دارەجەسىندە ون بالۋان سىنعا ءتۇستى. العاشقى ەكى مەدالدى يسحار كۋرباەۆ پەن ايدوس سۇلتانعالي يەلەنسە، باعدات ساباز ءۇشىنشى قولا جۇلدەنى ەل قورجىنىنا سالدى.

قازاقستان كۇرەس فەدەراتسياسىنىڭ حابارلاۋىنشا، 55 كەلىدە بەلدەسكەن يسحار كۋرباەۆ جارىستى قاتارىنان ءۇش جەڭىسپەن باستادى. الدىمەن جاپونيالىق كاگەتورا وكاموتونى، كەيىن وزبەكستاندىق يحتيور بوتيروۆ پەن مولدوۆالىق ارتيوم دەليانۋدى جەڭىپ، جارتىلاي فينالعا شىقتى. بۇل كەزەڭدە يراندىق پايام احماديگە ەسە جىبەرگەنىمەن، قولا مەدال ءۇشىن كۇرەستە ءۇندىستان وكىلى ءلاليتتى 9:0 ەسەبىمەن جەڭدى. نەبارى 1 مينۋت 28 سەكۋندقا سوزىلعان بەلدەسۋدە يسحار تەحنيكالىق باسىمدىقپەن جەڭىسكە جەتىپ، ەل قورجىنىنا العاشقى جۇلدەنى سالدى.

«قازاقستان قۇراماسىنىڭ ەكىنشى قولا مەدالىن 60 كەلىدە ونەر كورسەتكەن ايدوس سۇلتانعالي جەڭىپ الدى. بىلتىر زاگرەبتە الەم چەمپيونى اتانعان وتانداسىمىز العاشقى اينالىمدا رەسەيلىك ءانۋار اللاحياروۆتان، شيرەك فينالدا ازەربايجاندىق مۋراد ماممادوۆتان باسىم ءتۇستى. الايدا، جارتىلاي فينالدا جاپونيالىق كوتو گوميگە 1:5 ەسەبىمەن جول بەردى. ءۇشىنشى ورىن ءۇشىن بەلدەسۋدە ايدوس سۇلتاعالي پاريج وليمپياداسىنىڭ كۇمىس جۇلدەگەرى، قىتايلىق تساو ليگۋونى 5:1 ەسەبىمەن جەڭىپ، الەم چەمپيوناتتارىنداعى جۇلدەلەرىنىڭ قاتارىن تولىقتىردى.

67 كەلى سالماقتا سىنعا تۇسكەن باعدات ساباز تۋرالى بۇعان دەيىن حابارلاعانبىز. ول قازاقستان قۇراماسىنا ءۇشىنشى قولا مەدالدى الىپ بەردى. بالۋان جارىستا قىرعىزستاندىق راززاك بەيشەكەەۆتى 8:4 ەسەبىمەن جەڭىپ، كەلەسى اينالىمدا بولگاريا وكىلى ابۋ اماەۆتان 7:5 ەسەبىمەن باسىم ءتۇستى. الايدا، ول شيرەك فينالدا پاريج وليمپياداسىنىڭ چەمپيونى، يراندىق سايد ەسمايليگە 2:7 ەسەبىمەن ەسە جىبەردى. يران بالۋانى فينالعا شىققاندىقتان، باعدات ساباز جۇبانىش بەلدەسۋىنە قاتىسۋ مۇمكىندىگىن الدى. بۇل كەزەڭدە قىتاي وكىلى تسزين ءسينسيندى جەڭىپ، قولا مەدال ءۇشىن بەلدەسۋ مۇمكىندىگىنە يە بولدى. ءۇشىنشى ورىن ءۇشىن كۇرەستە وتانداسىمىز پاريج وليمپياداسىنىڭ قولا جۇلدەگەرى، ازەربايجاندىق حاسرات دجافاروۆتى 8:5 ەسەبىمەن جەڭىپ، الەم چەمپيوناتىنىڭ قولا مەدالىن يەلەندى»، دەلىنگەن حابارلامادا.

وزگە سالماق دارەجەلەرىندە دە بالۋاندار بىرقاتار جەڭىسكە جەتكەنىمەن، جۇلدەلى ورىنداردى المادى. وسىلايشا، استاناداعى الەم چەمپيوناتىندا قازاقستاننىڭ گرەك-ريم كۇرەسى قۇراماسى ءۇش قولا مەدالمەن جارىستى قورىتىندىلادى.

داستان كەنجالين،

استانا