بىرىككەن كۇرەس الەمى ۇيىمى الەمدىك دوداعا جاقسى باعا بەردى

بىرىككەن كۇرەس الەمىنىڭ (UWW) پرەزيدەنتى نەناد لالوۆيچ استانادا كۇرەس تۇرلەرىنەن وتكەن الەم چەمپيوناتىنىڭ ۇيىمداستىرىلۋىنا جاقسى باعا بەردى، دەپ حابارلايدى SportPress.kz.

بيىلعى الەمدىك دودا 1 قاراشادا مارەسىنە جەتتى. وسى كۇنى استاناداعى «بارىس ارەنا» سپورت كەشەنىندە الەم چەمپيوناتى سالتاناتتى جاعدايدا اياقتالىپ، جەر-ءجۇزىنىڭ 135 ەلىنەن كەلگەن 900-دەن استام بالۋان ءوز ەلدەرىنە قايتتى.

استاناداعى دۇرمەكتى دودا توعىز كۇنگە سوزىلدى. وسى ۋاقىتتا بالۋاندار 30 سالماق دارەجەسىندە جۇلدەلەردى ساراپقا سالدى.

قالاعا ارنايى الىس-جاقىن ەلدەردەن كەلگەن قوناقتار كۇرەستىڭ جاقسى وتكەنىن دە ايتتى. جارىس تۋرالى چەمپيوناتتىڭ جابىلۋ سالتاناتىندا بىرىككەن كۇرەس الەمىنىڭ (UWW) پرەزيدەنتى نەناد لالوۆيچ تە ءوز پىكىرىن ءبىلدىردى. ول الەمدىك دودانىڭ ۇيىمداستىرىلۋىنا وتە جاقسى باعا بەردى. مارتەبەلىمەيمان ەلىمىزدىڭ نەبارى 4-5 ايدىڭ ىشىندە وسىنداي اۋقىمدى حالىقارالىق جارىستى وتكىزۋگە دايىندالىپ، بارلىق ۇيىمداستىرۋشىلىق مىندەتتى لايىقتى دەڭگەيدە اتقارا العانىن ەرەكشە اتاپ ءوتتى.

«بۇل ەرەكشە الەم چەمپيوناتى بولدى. جارىستىڭ قانشالىقتى ءتيىستى دەڭگەيدە ۇيىمداستىرىلعانىنا بارلىعىمىز كۋا بولدىق. وسى اۋقىمدى دودانىڭ وتۋىنە اتسالىسقان ءاربىر ازاماتقا شىنايى العىسىمدى بىلدىرەمىن. چەمپيونات ءوز مارەسىنە جەتكەنىمەن، الەمدىك كۇرەستىڭ تاريحىندا تاعى ءبىر جارقىن بەلەس بولىپ قالماق.

استاناداعى الەم چەمپيوناتى بارشامىزدىڭ ەسىمىزدە ەرەكشە اسەرىمەن، جىلى ەستەلىكتەرىمەن ساقتالاتىنىنا سەنىمدىمىن»، دەدى نەناد لالوۆيچ.

وسىدان كەيىن UWW پرەزيدەنتى الەم چەمپيوناتىن جاقسى ۇيىمداستىرعانى ءۇشىن قازاقستان كۇرەس فەدەراتسياسىنىڭ توراعاسى ەركىن وقاسوۆقا حالىقارالىق ۇيىمنىڭ اتىنان ارنايى ەستەلىك سىيلىق پەن چەمپيوندارعا ارناپ تىگىلگەن RUDIS كومپانياسىنىڭ جەيدەسىن تابىس ەتتى. وسى ارادا ايتا كەتەتىن ءبىر نارسە، مۇنداي ماراپات ەلىمىزدىڭ كۇرەس تاريحىندا العاش رەت بەرىلىپ وتىر.

ءوز كەزەگىندە قازاقستان كۇرەس فەدەراتسياسىنىڭ توراعاسى ەركىن وقاسوۆ چەمپيوناتتى ۇيىمداستىرۋعا اتسالىسقان ازاماتتارعا العىسىن ءبىلدىرىپ، ۇلتتىق قۇرامانىڭ جارىستاعى ناتيجەسىنە قاتىستى ءوز ۇستانىمىن اشىق ايتتى.

ول بالۋانداردان بۇدان دا جاقسى كورسەتكىش كۇتكەنىن، الداعى ۋاقىتتا ناتيجەنى جاقسارتۋ فەدەراتسيا جۇمىسىنىڭ باستى مىندەتى بولاتىنىن اتاپ ءوتتى.

سالتاناتتى راسىمىندە الەم چەمپيوناتىنىڭ اۋىسپالى تۋى 2027 جىلعى دودانى ۇيىمداستىراتىن اقش دەلەگاتسياسىنىڭ وكىلدەرىنە تاپسىرىلدى.

وسىلايشا، توعىز كۇن بويى الەمدىك كۇرەس قاۋىمداستىعىنىڭ نازارىندا بولعان استاناداعى چەمپيونات رەسمي تۇردە اياقتالدى.

«قازاقستان كۇرەس فەدەراتسياسى الداعى ۋاقىتتا ۇلتتىق قۇرامالاردىڭ دايىندىعىن كۇشەيتۋگە، جاتتىقتىرۋشىلار مەن سپورتشىلاردىڭ جۇمىسىن جەتىلدىرۋگە جانە حالىقارالىق جارىستارداعى ناتيجەنى جاقسارتۋعا باسىمدىق بەرەدى.

فەدەراتسيا ۇجىمى توراعا بەلگىلەگەن مىندەتتەردى ىسكە اسىرۋ ءۇشىن بىرلەسە جۇمىس اتقارۋعا دايىن. باستى ماقسات – بالۋانداردىڭ الەمدىك ارەناداعى باسەكەگە قابىلەتتىلىگىن ارتتىرىپ، جانكۇيەر سەنىمىن اقتاۋ»، دەپ حابارلادى قازاقستان كۇرەس فەدەراتسياسىنىڭ ءباسپاسوز قىزمەتى.

ەسكە سالا كەتسەك، گرەك-ريم كۇرەسىنىڭ شە­بەر­لەرى باستاپ بەرگەن الەم چەم­پيوناتىن ايەلدەر كۇرەسى مەن ەركىن كۇرەس بالۋاندارى تۇيىندەدى. وكىنىشكە قاراي، ەلوردا تورىندەگى الەمدىك دودادا ەلىمىزدىڭ ءانۇرانى شىرقالمادى.

بيىلعى كۇرەس تۇرلەرىنەن الەم چەمپيوناتىندا قازاقستان قۇراماسى بەس مەدال جەڭىپ الدى. ونىڭ ىشىندە ءبىر كۇمىس جانە ءتورت قولا جۇلدە بار. ۇلتتىق قۇراما جالپىكوماندالىق ەسەپتە 15-ورىنعا يە بولدى.