بالعىن بوكسشىلار شەلەكتە شيىرشىق اتتى

الماتى وبلىسى، ەڭبەكشىقازاق اۋدانى، شەلەك اۋىلىندا بوكستان جاسوسپىرىمدەر اراسىندا رەسپۋبليكالىق اشىق تۋرنير ءوتىپ جاتىر. ءتورت كۇنگە ۇلاسقان ءدۇبىرلى دودانىڭ فينالدىق سايىستارى بۇگىن بولادى.

كيكبوكستان قازاقستاننىڭ بىرنەشە دۇركىن چەمپيونى، ەۋروپانىڭ ەكى دۇركىن جەڭىمپازى، ازيا چەمپيونى، الەم كۋبوگىنىڭ يەگەرى داڭقتى سپورتشى ەلمۇرات قايىپجانوۆتىڭ جۇلدەسىنە ارنالعان اشىق تۋرنيرگە تۇركىستان وبلىسىنان، الماتى، شىمكەنت قالالارىنان، الماتى وبلىسىنىڭ اۋداندارىنان كەلگەن بوكسشىلار قاتىسىپ، سايىس كورىگىن قىزدىرۋدا.

ءتۋرنيردى تاماشالاپ، جەتكىنشەك بوكسشىلارعا ءسات-ساپار تىلەپ، تىلەۋلەستىگىن بىلدىرۋگە قازاق بالۋاندارى اراسىنان شىققان تۇڭعىش وليمپيادا چەمپيونى، الەم چەمپيونى، قازاقستاننىڭ ەڭبەك ەرى جاقسىلىق ۇشكەمپىروۆ، بوكستان ەلىمىزدىڭ ۇلتتىق قۇراماسىن جاتتىقتىرىپ، سيدنەي وليمپياداسىندا 2 التىن، 2 كۇمىس مەدالمەن ورالعان ايگىلى باپكەر تۇرسىنعالي ەدىلوۆ،  جاستار اراسىندا الەم چەمپيونى اتانعان، بەيجىڭ وليمپياداسىنىڭ كۇمىس جۇلدەگەرى، الماتى وبلىستىق دەنەشىنىقتىرۋ جانە سپورت باسقارماسىنىڭ باسشىسى نۇرباقىت تەڭىزباەۆ، بەيجىڭ وليمپياداسىنىڭ قولا جۇلدەگەرى، قىتايدىڭ 10 دۇركىن چەمپيونى، كاسىپقوي بوكستا 25 جەكپە-جەك وتكىزىپ، بارلىعىندا جەڭىسكە جەتكەن قانات يسلام،   ۋشۋ-ساندو، تاي بوكستان  الەم چەمپيونى دياس جاماشەۆ  سىندى ساڭلاقتار كەلدى.

الماتى وبلىستىق دەنەشىنىقتىرۋ جانە سپورت باسقارماسىنىڭ باسشىسى، نۇرباقىت تەڭىزباەۆ، باسقارمانىڭ اتىنان قۇتتىقتاۋ حاتىن وقىپ، ەلمۇرات قايىپجانوۆقا تاپسىردى. وسىمەن ەكىنشى رەت ۇيىمداستىرىپ، اۋىل تۇرعىندارىنا اسەرلى كەزدەسۋ، بالعىن بوكسشىلارعا تاماشا ءتۋرنيردى تارتۋ ەتكەن ەلمۇرات مۇقاش ۇلى قۇرمەتتى قوناقتارعا ەل اتىنان العىس ايتىپ، يىقتارىنا وقالى شاپان جاۋىپ سىي-سياپاتىن كورسەتتى.

اشىق چەمپيوناتتىڭ قۇرمەتتى قوناعى بولعان جاقسىلىق ۇشكەمپىروۆ بالعىن بوكسشىلارعا اق جول تىلەپ، ءباتۋالى ءسوزىن ايتىپ، اق باتاسىن بەردى.

–مەن دە وزدەرىڭدەي اۋىلدا تۋىپ، اۋىلدىڭ توپىراعىنا اۋناپ وسكەن قازاقتىڭ قاراپايىم بالاسى بولدىم. كۇرەس ونەرىن دە اۋىلدا ءجۇرىپ ۇيرەنىپ، بەلدەسۋلەرگە قاتىسىپ شىڭدالدىم. قانداي ابىروي، اتاق، دارەجە-دەڭگەي بولماسىن ءبارى دە تەك اق ادال ەڭبەكپەن كەلەتىنىن ءومىر مەكتەبى ۇيرەتتى. ايانباي توككەن تەردىڭ وتەۋىنە ماعان 1980 جىلى ماسكەۋ وليمپياداسىنىڭ چەمپيونى دەگەن اتاق، 1981 جىلى نورۆەگيادا وتكەن الەم چەمپيوناتىنىڭ دا التىن مەدالى بۇيىردى. بىراق وسى جەتىستىكتەرگە قالاي جەتتىم؟ قازىر كوسىلىپ، شەشىلىپ سويلەپ ايتقانىما وڭاي بولعانىمەن، سول كەزدەگى قيىندىق، كەدەرگىنىڭ قانشالىقتى اۋىر سوققانىن وزىمنەن وزگە ەشكىم جەتە بىلمەيدى. ءبىزدىڭ كۇرەسكەن شاعىمىزدا ەلىمىز كەڭەس وداعى دەيتىن الىپ يمپەرياعا قارايتىن. كسرو-نىڭ بىرنەشە دۇركىن چەمپيونى اتانسام دا الەم بىرىنشىلىگى، وليمپيادا ويىندارىنا مەنى جىبەرگەن جوق. سول كەزدەگى ساياساتتىڭ قۇربانى بولىپ، شىدەردەن شىعا المادىق. وليمپيادا ويىندارىنا تەك جاسىم وتىزعا تولعاندا، كۇرەستى دوعاراتىن شاق جاقىن قالعاندا عانا قاتىسىپ، چەمپيون اتاندىم. اللاعا سانسىز شۇكىرشىلىك دەيمىز، بۇگىندە تاۋەلسىز ەلمىز، الەم تانىعان دامۋشى ەلدەردىڭ كوشىندە كەلەمىز. ءبىزدىڭ كەزىمىزدەگىدەي جوقشىلىق، قيىنشىلىقتىڭ قازىر ەشقايسى جوق. تەك ەرىنبەي ەڭبەكتەنسەڭدەر بولدى. ءبارى بىردەن بولا كەتپەيدى. وسىنداي تۋرنيرلەردىڭ بولعانى، ۇنەمى ۇيىمداستىرىلعانى اۋىلداعى بالعىن سپورتشىلاردىڭ تالابىن ۇشتاپ، ۇلكەن سەرپىن بەرىپ، جەڭىسكە دەگەن جىگەرىن جاني تۇسەدى. ەلمۇراتتىڭ ەلگە وسىنداي جارىس وتكىزىپ، جەرلەستەرىنە تاماشا جەكپە-جەك سايىسىن كورسەتكەنى ءۇشىن العىسىمدى ايتامىن، – دەدى جاقسىلىق ۇشكەمپىروۆ.

–بارىمىزدە وزدەرىڭدەي بالا كۇنىمىزدەن بوكسپەن شۇعىلدانىپ، جارىستارعا قاتىسىپ شىڭدالىپ، ەل نامىسىن قورعايتىن دارەجەگە جەتتىك. مەن دە سەندەردىڭ وتتى كوزدەرىڭە قاراپ، رۋحتى جىگەرلەرىڭدى تانىپ، بولاشاقتا ارالارىڭنان الەم چەمپيونى، وليمپيادا چەمپيوندارى شىعادى دەپ سەنەمىن. الدىڭعى اربا قايدا جۇرسە، سوڭعى اربا سوندا بارادى دەيدى قازاق. ءبىز الدىڭعى بۋىن اعالارىمىزدى ارقا تۇتىپ جۇرەمىز. ەلمۇرات قايىپجانوۆ – قازاق سپورتىنا وراسان ۇلەس قوسىپ كەلە جاتقان ازامات.  ارداقتى اعامىز توقسانىنشى جىلدارى كيكبوكسينگتىڭ ەندى-ەندى قاناتىن جايىپ، ءورىس الىپ كەلە جاتقان تۇسىندا وسى سپورت تۇرىنەن الەم كۋبوگىن يەلەندى، ەۋروپا، ازيا قۇرلىعىندا ءوز سالماعىنىڭ سەركەسى اتانىپ، چەمپيوندىق بەلبەۋدى  ەلىمىزگە تارتۋ ەتتى. ەلمۇرات اعانىڭ ەلدىك مۇرات-مۇددە جولىندا تارتىنبايتىن قايسارلىعى، سپورتشى باۋىرلارىنا دەگەن قامقورلىعى الابوتەن. قاشاندا ەلىمىزدىڭ سپورتىن وركەندەتۋگە ۇلەسىن قوسا بەرسىن دەپ تىلەۋلەستىگىمدى بىلدىرەمىن، – دەدى قانات يسلام.

«اشىق بىرىنشىلىككە 182 بوكسشى قاتىسىپ، 17 سالماق دارەجەسى بويىنشا مەدالدار جيىنتىعىن بولىسەدى. 2005-2006 جىلى تۋعان جەتكىنشەكتەر ءتورت كۇن بويى شەلەك تورىندە كەرىلگەن رينگتە شەبەرلىكتەرىن كورسەتىپ جاتىر. قىزدار مەن ۇلدار اراسىندا وتكىزىلگەن سايىستىڭ ماقساتى – اۋىل جاستارىنىڭ سپورتپەن شۇعىلدانۋىنا سەرپىن بەرۋ، جەتكىنشەكتەردىڭ دەڭگەيىن ءوسىرۋ، وسى تۋرنيردە توپ جارىپ، ءىرى دودالارعا تۇرەن سالار، الەم، وليمپيادا چەمپيونى بولار بوكسشىلار شىعۋىنا باسپالداق بولسا دەگەن ماقساتتا وتكىزدىك»، دەيدى  ۇيىمداستىرۋشىلار. ءتۋرنيردىڭ سۋپەرۆايزەرى، ۇلتتىق دارەجەدەگى تورەشى ەرجان نۇرقالىقوۆ جارىستىڭ ءداستۇرلى دوداعا اينالاتىنىنا سەنىم ءبىلدىردى.

ن.راحمەت،

الماتى وبلىسى،

ەڭبەكشىقازاق اۋدانى،

شەلەك اۋىلى