SportPress.kz Qazaqstan sport jańalyqtary
10-12 mamyr aralyǵynda Ýkraınanyń Odessa qalasynda meıbýakan godzıý-rıý karate-do jekpe-jeginen ótken álem chempıonatynda Qazaqstan quramasy 4 altyn, 1 kúmis, 2 qola medal alyp, komandalyq esepte ekinshi orynǵa ıe boldy.
Osy dodada el namysyn qorǵaǵan qaısar minez qarakóz jastarymyzdyń barlyǵy derlik qur qol qaıtpaı, jeńis satysyna kóterilip, úlken jetistikpen elge oralyp keledi.
Álem chempıonaty bolǵan soń ár eldiń saıdyń iriktelinip alynǵan marqasqa sportshylary keletini belgili. Odessa qalasynda godzıý-rıý karate-do jekpe-jeginen jalaýyn kótergen dúrmekti dodada 18 memlekettiń aıtýly sporttyń sheberleri óner kórsetti. Osy synǵa Qazaqstan komandasyn bastap barǵan ulttyq quramanyń bas jattyqtyrýshysy Nurlan Kerimbaevtyń shákirtteri úlken jetistikpen oralyp keledi.
Sonymen el qorjynyna júlde salǵan karate shberleriniń esimderin alǵa tartalyq. Negizi jekpe-jekter go kýmıte – tolyqtaı kontakt pen dzıý kýmıte – jartylaı kontakt sekildi eki júıemen ótken eken. Altyn júldeni 57, 63, 84 jáne absolıýttik salmaqtarda Baýyrjan Juman, Nesipbek Baqtııar, Jandáýlet Bekzatovtar jeńip alsa, kúmis júldeni 57 kıloda Medet Baǵdat, qola júldeni 74 kg salmaqta Máýlen Turysbekter ıelendi.
Bir aıta keter qýanyshty jáı, absolıýttik salmaqta óner kórsetken jerlesimiz Jandáýlet Bekzatov álemniń 3 dúrkin, Eýropanyń 2 dúrkin jáne Ýkraınanyń 5 dúrkin chempıony Gýnkony asqan basymdylyqpen atoılap júrip jeńgen eken. Jalpy 500-den asa karate-do sheberleri qatysqan álem chempıonatynda topjaryp osyndaı tabysqa ıe bolý úlken maqtaýǵa laıyqty nátıje. Qazaqstan quramasynyń sportshylary osyndaı tolaǵaı tabysymen kózsiz erlik jasap, elimizdiń mereıin asqatatyp otyr. Jeńistiń bas tuǵyryna kóterilgen sportshylarymyz 4 ret elimizdiń ánuranyn oryndatyp, kók baıraǵymyzdy 4 ret bárinen bıik kókke kóterýge májbúr etti.
Iá, godzıý-rıý karate-do sporty elimizde endi ǵana eńsesin tik ustap, álem alamandaryna qosylyp kele jatqan jas sport túriniń biri. Degenmende Meıbýkan godzıý-rıý karate-do assoıaııasynyń prezıdenti, qara belbeý 6 dan ıegeri Nurlan Kerimbekov sekildi óz isiniń maıtalman sheber mamandary jattyqtyratyn el quramasynyń jastary jalyndy ónerlerimen sońǵy jyldary komandalyq úzdik úshtikten tómen túsken emes.
«Elim deıtin er bolmasa, erim deıtin el qaıdan bolsyn», – degendeı, elim dep, eleýli eńbegimen alǵysqa bólene bastaǵan Nurlan Kerimbekovteı er tulǵaly, óz tańdaǵan sportyna janashyr jandardyń arqasynda kenjelep bolsa da kelip qosylǵan, godzıý-rıý meıbýakan karate-do túri, qazirdiń ózinde aıtarlyqtaı tabystarǵa qol jetkize bastady. Sonyń bir aıshyqty aıǵaǵy Odessada ótken álem chempıonatyndaǵy Qazaqstan quramasynyń orasan zor tabysy ekenin aıtqymyz keledi. «Qarǵa soısa da qasapshy soısyn», – demekshi, Nurlannyń shyǵystyń osy bir sportyn túriniń ádis-aılasyn tereń meńgerip alǵanymen qosa, aıtýly sport túrin jaqsy kórip, shákirtterine baı tájirbıesin aıanbaı bere otyryp, jeńis jolynda barynsha áreket jasaýynyń jemisi osyndaı úlken nátıjelerge jetkizse, aıbarly da aıbynda alashtyń jas ulandary jeńis tuǵyrynyń barlyq satysynan kórinip, elimizdiń abyroıyn asqatatyp qaıtyp keledi. Endeshe jigerli jastarymyzdy jeńisterimen quttyqtap, aldaǵy ýaqytqa sáttilik tileımiz.
Aqyn ORDABAIULY,
ALMATY
