SportPress.kz قازاقستان سپورت جاڭالىقتارى
ۇلتتىق سپورت تۇرلەرىنەن رەسپۋبليكالىق V فەستيۆال 18-25 قىركۇيەك كۇندەرى اقتوبە قالاسىندا وتەدى. ءتورت جىلدا ءبىر رەت ۇيىمداستىرىلاتىن اتالمىش باسەكەگە قاتىسۋشىلار ۇلتتىق سپورتتىڭ ون تۇرىنەن باق سىنايدى، دەپ حابارلادى قازاقستان ۇلتتىق سپورت قاۋىمداستىعى.
اتاپ ايتقاندا، 18 قىركۇيەكتە باستالاتىن V فەستيۆالدە كوكپار، اۋدارىسپاق، تەڭگە ءىلۋ، جامبى اتۋ، قۇسبەگىلىك (بۇركىت، قارشىعا، يتەلگى)، بايگە تۇرلەرى (ات، قۇنان)، توعىزقۇمالاق، اسىق اتۋ، جەكپە-جەك (ەرلەر جانە ايەلدەر اراسىندا)، قازاق كۇرەسى (ەرلەر جانە ايەلدەر اراسىندا) سپورت تۇرلەرىنىڭ جۇلدەلەرى ساراپقا سالىنادى.
V فەستيۆالدىڭ اشىلۋ (21 قىركۇيەك) جانە جابىلۋ (25 قىركۇيەك) سالتاناتتارى اقتوبە قالاسىنداعى «جەكپە-جەك» سپورت سارايىندا وتكىزىلەدى. فەستيۆالگە كەلۋ كۇنى – ات سپورتى تۇرلەرى بويىنشا 17 قىركۇيەككە، قازاق كۇرەسى ءۇشىن – 19 قىركۇيەككە، باسقا سپورت تۇرلەرى ءۇشىن 20 قىركۇيەككە جوسپارلانۋدا. ەلىمىزدە ۇلتتىق سپورت تۇرلەرىن دامىتۋ، سالاۋاتتى ءومىر سالتىن قالىپتاستىرۋ، جاستاردى وتانسۇيگىشتىككە جانە حالىقتار اراسىندا دوستىق پەن تاتۋلىقتى نىعايتۋ، ەڭ باستىسى ۇلتتىق سپورت تۇرلەرىن دامىتۋداعى ەڭ مىقتى ءوڭىردى انىقتاۋ ماقساتىندا وتكىزىلەتىن بيىلعى فەستيۆالعا رەسپۋبليكاداعى بارلىق ءوڭىردىڭ كوماندالارى قاتىسپاقشى.
ەسكە سالىپ وتسەك، ۇلتتىق سپورت فەستيۆالى 1999 جىلى تۇڭعىش رەت ەلوردا تورىندە جالاۋىن كوتەرگەن. ال، ەكى مىڭنان استام سپورتشى قاتىسقان ءىV ۇلتتىق سپورت فەستيۆالى 2015 جىلعى قازان ايىندا قىزىلوردا قالاسىندا وتكىزىلىپ، باس جۇلدەنى قىزىلوردا وبلىسى، ەكىنشى ورىندى تۇركىستان وبلىسى، ءۇشىنشى ورىندى جامبىل وبلىسى يەلەنگەن بولاتىن.
