«رەال» – يسپانيا سۋپەركۋبوگىنىڭ يەگەرى!

كەشە ساۋد ارابياسىنىڭ جيددا قالاسىندا فۋتبولدان «رەال» ( مادريد) مەن «اتلەتيكو» (مادريد) كلۋبتارىنىڭ اراسىندا يسپانيانىڭ سۋپەركۋبوگى ءۇشىن فينالدىق ماتچتىڭ بولعانىن بىلەسىزدەر. ەندى مىنە، كەشەگى ويىننان جاقسى اسەر الىپ، ىستامبۇلدىڭ اۋەجايىندا استانامىزعا باراتىن ۇشاقتى كۇتىپ وتىرمىن. وسى ويىن تۋرالى ۇيگە جەتسەم اسىقپاي جازامىن دەپ ويلاعان ەدىم. بىراق ساپاردان اسەرىم جاقسى بولعانىمەن كوپ جازا المايتىن سياقتىمىن. ونىڭ ورنىنا فوتولار مەن ۆيدەولاردى سويلەتىپ، سولارعا از-ماز ءوز ويىمدى قوسا كەتۋدى ءجون كورىپ وتىرمىن.

كەشەگى ءبىز بارعان «King Abdullah Sports city» ( «ابدوللا كورولدىڭ سپورت قالاسى») ستاديونى سوڭعى ۇلگىدە سالىنعان ارەنا ەكەن. ول شامامەن 60 مىڭنان استام جانكۇيەرگە ارنالعان. ارابتار سپورت ورداسىن وتە جاقسى سالىپتى. ستاديوندا كەرەك دۇنيەنىڭ ءبارى بار. ءبىز ازيا سپورت ءباسپاسوزى اسسوتسياتسياسىنىڭ شاقىرۋىمەن كەلگەن سوڭ ساۋديتتەر قازاقستانعا قۇرمەت كورسەتىپ، ەڭ جاقسى ورىندارىن بەردى. بىزدەن باسقا ماتچتى پيرەنەي تۇبەگىنەن ارنايى كەلگەن جانكۇيەرلەر دە تاماشالادى. ولار جيددادا 8 قاڭتاردان بەرى ءجۇر ەكەن. سول كۇنى يسپانيا سۋپەركۋبوگى ءۇشىن «تورتتىكتىڭ ءتۋرنيرى» باستالعان بولاتىن. ەندى ويىن تۋرالى نە ايتۋعا بولادى؟ ماعان مىسالى، ءبىرىنشى، ەكىنشى تايم قىزىقسىز كورىندى. كوماندالار شابۋىلداپ، ەسەپتى ءبىرىنشى اشقىلارى كەلىپ، قاۋىپتى جاعداي جاساعانىمەن ءبىر-بىرىنە گول سوعا المادى. ماتچتىڭ نەگىزگى ۋاقىتى اياقتالىپ، قوسىمشا بەرىلگەن ەكىنشى 15 مينۋتتا «اتلەتيكونىڭ» جەڭىسكە جەتۋگە تاماشا مۇمكىندىگى بولدى. ەگەر «رەالدىڭ» قورعاۋشىسى قاقپاشىمەن بىرگە-ءبىر شىعىپ بارا جاتقان «اتلەتيكونىڭ» شابۋىلشىسىن قۇلاتپاعاندا زيداننىڭ ويىنشىلارى جەر سيپاپ قالار ەدى. بىراق، «رەالدىڭ» ويىنشىسى قارسىلاسىن اياقتان شالىپ، كوماندانىڭ قاقپاسىن امان الىپ قالدى. ءسويتىپ، قارسىلاستار دوپتى تەمىر تورعا تۋلاتاي الماي، تەڭ ەسەپپەن تارقاستى. سودان كەيىن كەزەك پەنالتي سەرياسىنا كەلدى. مۇندا «اتلەتيكونىڭ» جۇيكەسى سىر بەرسە، «رەالدىڭ» ويىنشىلارى ءتورت دوپتىڭ ءبارىن نىساناعا ءدال تيگىزىپ، جەڭىستى سۋىرىپ اكەتتى.

ال «اتلەتيكو» كلۋبى سۋپەركۋبوكتى الا الماي كەتتى. جالپى، ماتچتىڭ 90 مينۋتى اسا قىزىقتى بولماسا دا ويىنشىلار ساۋاتتى ويىن ورنەگىن كورسەتىپ، جانكۇيەرلەرگە تاماشا سىي جاسادى.

ارابتار فۋتبولدى جاقسى كورەدى ەكەن. قازىر ساۋديادا سپورتتىڭ وسى ءتۇرىن دامىتۋ قولعا الىنعان. ساۋديتتەر تەڭبىل دوپ ونەرىن ەلدىڭ ءتورت بۇرىشىنا كەڭىنەن ناسيحاتتاپ، دامىتۋ ءۇشىن وسىنداي ۇلكەن تۋرنيرلەردى وتكىزىپ كەلەدى.
كەشەگى ماتچتىڭ ۇزىلىسىندە ەكى كەزدەسۋ وتكىزدىم. الدىمەن مەنى وسى ساپارعا شاقىرعان ازيا سپورت ءباسپاسوزى اسسوتسياتسياسىنىڭ وكىلى ساۋديت ابدوللامەن كەزدەسىپ، وعان كادەسىيلاردى بەردىم.

ول ءبىزدى جىلى قارسى الىپ، وزدەرىنىڭ جۇمىسى تۋرالى ايتتى.

ء–بىزدىڭ شاقىرۋدى قابىلداپ، يسپانيا سۋپەرليگاسىنا كەلگەندەرىڭە راحمەت! ازيا سپورت ءباسپاسوزى قاۋىمداستىعى الداعى كەزدە دە قازاق ارىپتەستەرىمەن تىعىز بايلانىستا جۇمىس ىستەي بەرەدى. ءبىز بىرىگىپ جۇمىس ىستەسەك، ەكى جاققا دا ءتيىمدى بولادى. سوندىقتان دوستىعىمىز ۇزاعىنان بولسىن، – دەدى ول.

ءبىز دە ءۇزىلىس كەزىندە ۋاقىت سوزباي، قازاق جۋرناليستەرىنىڭ ساۋد ارابيا ەلىنىڭ اقپارات قۇرالدارىمەن، ازيا سپورت ءباسپاسوزى اسسوتسياتسياسىمەن بايلانىسقا مۇددەلى ەكەنىن، ەكى جاق تىعىز قارىم-قاتىناستا بولسا الىنبايتىن قامالدىڭ بولمايتىنىن ايتتىم. ودان ءارى ابدوللاعا كادەسىيدى سىيعا تارتا وتىرىپ، كارتينادا سۋرەتتەلگەن قازاق باتىرىنىڭ ەجەلدەن بەرى كەڭ دالامىزدى قورعاپ كەلگەنىن، قازاقتار ءۇشىن جىلقى ارابتارعا سياقتى ەڭ قۇرمەتتى جانۋار ەكەنىن، ءبىزدىڭ اتا-بابامىز ونى ءتورت ت ۇلىكتىڭ تورەسى دەپ باعالاپ، ەرەكشە جاقسى كورگەنىن اتاپ ءوتتىم.

–سىزگە بۇل سىيلىقتى بەرىپ جاتقانىمنىڭ ءمانى مەن ماڭىزى بار. اتقا وتىرعان باتىردى سىيلاعانىمنىڭ سەبەبى، ارابتار دا ءوز ەلىندە ەشقاشان اتتان تۇسپەي، بيلىكتى ارقاشان ءوز قولدارىندا ۇستاپ وتىرسىن دەگەنىم. ەكىنشىدەن، قازاقتىڭ كيىز ءۇيىن دە سىيلاپ جاتقانىم، شاڭىراقتارىڭىز بيىك بولسىن، ونىڭ كەرەگەسى كەڭ، تەرەزەسى تەڭ، بوساعاسى بەرىك بولسىن دەگەن نيەتپەن بەرىپ وتىرمىن. اراب ەلدەرى ارقاشان بىرلىكتە بولسىن! يسلام ەلدەرى وسىنداي شاڭىراقتىڭ استىندا ىنتىماقتاستىقتا، ءبىر-بىرىمەن جاقسى قاتىناستا ءومىر ءسۇرسىن دەگەن تىلەكپەن وسى كادەسىيدى سىيلايمىن، — دەدىم. ساۋديتتەر وسىعان ريزا بولىپ، سىي-سياپاتقا العىسىن ءبىلدىردى.

«كوڭىل كوڭىلدەن سۋ ىشەدى»، دەمەكشى ودان كەيىن يسپانيا سۋپەركۋبوگى ءۇشىن ءتۋرنيردى ۇيىمداستىرۋشىلاردىڭ ءبىرى لاما حانىممەن اڭگىمەلەسىپ، وعان دا كادەسىيلاردى سىيعا تارتتىم. بىزبەن اڭگىمەدە لاما حانىم دا قازاقستاندى جاقسى بىلەتىنىن، الداعى ۋاقىتتا بايلانىستى دامىتا بەرۋ كەرەك دەگەن تىلەگىن جەتكىزدى.

وسىلايشا ساۋد ارابياسىنا ساپار اياقتالدى. سىزدەرگە اراب تۇبەگىنەن بەرگەن قىسقاشا اقپاراتىم وسى. اماندىقتا كەزدەسەيىك!

داستان كەنجالين،

جيددا – ىستامبۇل