«ءولىسىن ريزا قىلاتىن…» امەريكا-اي!!!

in باستى تاقىرىپ، ەسىمى ەل ەسىندە، قۇرمەت، سىرت كوز - سىنشى 29.01.2020 0 267 رەت وقىلدى

…امەريكانىڭ كوپ ادەتىن، كوپ عۇرپىن قابىلداماي جاتامىز. ول ءجون دە شىعار. ويتكەنى ونداي قاسيەت وزىمىزدە دە، ەلىمىزدە دە جوق! الىسقا كەتپەيىن. تاياۋدا ۇلتتىق باسكەتبول قاۋىمداستىعى تاريحىندا وشپەس ءىز قالدىرعان ويىنشى كوبي برايانت تۇتقيىل كەلگەن اجالدان قايتىس بولدى. سودان بەرى بۇكىل امەريكا ازا تۇتىپ، كوز جاستارىن تيا الماۋدا.

بۇل 300 ميلليونعا تاياۋ حالىق تۇراتىن ەلدىڭ ءبارى باسكەتبول ويناعان جوق قوي! ولار تەك ۇلى ەلدىڭ ۇلى ءبىر بالاسى كەلمەسكە كەتكەنىنە قايعىرىپ جىلاپ جاتىر! …سول كۇننەن بەرى مەن دە قاپالىمىن. باسكەتبولدى كوبي برايانتشا ويناعان جان جوق. ءيا، مايكل دجوردان عاجاپ بولدى. مۇمكىن ول كوبيدەن دە ۇلى بولعان شىعار. سوعان قاراماي باسكەتبول بىلگىرلەرى مايكل دجورداندى ەمەس، كوبي برايانتتى NBA-نىڭ سيمۆولى ەتىپ قالدىرۋ يدەياسىن ۇسىنىپ جاتىر! ويتكەنى بۇل ەلدە ۇلىدان كەيىن ءوسىپ شىققان تالانتتى ۇلىلىق تاعىنا مىنگىزە ءبىلۋ قاسيەتى كەڭ تاراعان. كوبي شىنىمەن ۇلى ويىنشى بولدى. ونىڭ «لەيكەرستىڭ» قۇرامىندا ءجۇرىپ، ءبىر ءوزى تورونتا كومانداسىنىڭ شىعىرشىعىنا 81 (!!!) دوپ تاستاۋى تاريحتا ەندى قايتالانبايتىن دا شىعار. ءبىز اۋىز اشىپ، تاڭداناتىن ۆتب توبىنداعى كەيبىر كوماندالار ءبىر ويىندا بۇكىل ۇجىم بولىپ 81 دوپ تاستاي المايتىن كەزدەرى بولادى.

…بۇگىندە بۇكىل امەريكانى، اسىرەسە، لوس-انجەلەستى ورتەپ تۇرعان قايعىدان جەر تۇبىندە وتىرىپ، سەن دە جىلايسىڭ! كوشەنىڭ تاس الاڭدارىنا، بيىك-بيىك ۇيلەردىڭ قابىرعالارىنا كوبيدىڭ ءتىرى بەينەسىن كەستەلەپ الىپ، سونىڭ ماڭىنا مىڭداپ جينالىپ، مۇمكىن بولعان جيىندى جەرلەرگە ونىڭ ەسىك پەن توردەي سۋرەتىن كوتەرىپ بارىپ، اينالىپ-تولعانىپ، جىلاپ-سىقتاپ جاتقان حالىقتى كورگەندە سولاردىڭ ارقايسىسى-اق تۋعانىنان-تۋىسىنان ايرىلىپ قالعانداي اسەر بەرەدى. بۇل ول ەلدىڭ اسىلىن باعالاي بىلەتىندىگىنە، اياۋلىسىن ساعىنا بىلەتىنىنە، ۇلىسىن ۇلىقتاي بىلەتىنىنە كۋا!!!

…بۇل ماسەلەنىڭ قازاققا قاتىسى بولماسا مەن اۋىز دا اۋىرتپاس ەدىم. امەريكانى كوبيدىڭ قازاسى مۇنشا كۇيدىرگەندە، كەشەگى ءبيشى-ءانشى مايكل دجەكسوننىڭ، ۇلى بوكسشى مۇحاممەد ءاليدىڭ قازالارى ەسىمە تۇسەدى. دجەكسوندى ايدان اسا ۋاقىت جەر قوينىنا بەرمەي، دەنەسىن التىن تابىتقا سالىپ الىپ، امەريكانى ارالاتىپ ءجۇرىپ كونتسەرت قويدى. ءوزى وليمپيادا چەمپيونى بولعان مۇحاممەد ءاليدى كەيىن تىلدەن قالعاننىڭ وزىندە ەكى وليمپياداعا اپارىپ، بىرىندە الاۋ جاقتىردى، بىرىندە وليپيادانى ارالاتىپ، اياق-قولى سەلكىلدەگەن جاندى الەم سپورتشىلارىنا تابارىك ەتىپ كورسەتىپ ءجۇردى! ال، بىزدە شە؟ پەكين وليمپياداسىنىڭ ەكىنشى جارتىسىنا بارعان قازاقتىڭ قاجىمۇقاننان كەيىنگى باس بالۋانى ابىلسەيىت ايحانوۆ اعامىزدىڭ: «بۇل مەنىڭ تۇڭعىش كورگەن وليمپيادام! مۇمكىن سوڭعىسى دا بولار…» دەپ جىلاپ تۇرعانىن كورۋ قاي قازاقى جۇرەككە جەڭىل بولسىن! سول ءابىل اعانى كەيىننەن ومىردەن وزعاندا جەتى كۇن ازا تۇتپاق تۇگىلى، ەل بولىپ لايىقتى شىعارىپ تا سالمادى! قازاقتىڭ پەلەسى اتانعان تيمۋر سەگىزباەۆ اعامىز دا ومىردەگى باسقان ءىزى بىلىنبەيتىن ءوز مىنەزىندەي كوپ جانعا جاريا بولماي اتتاندى باقيعا! قازاقتىڭ تۇڭعىش وليمپيادا جۇلدەگەرى، 60-شى جىلداردىڭ ۋسەين بولتى، عۇسمان قوسانوۆ اعامىز ءوزىن قور ساناعانداردىڭ مازاعىنا شىداماي، ەرتە وزدى ومىردەن. مۇحاممەد ءاليدى قازاق تۇقىمىندا قايتالاعان قىپشاق باتىرى، قايتا تۋماس ءابدىسالان نۇرماحانوۆ اعامىزدى اياق-قولى ساۋ، اقىل-ەسى دۇرىس كەزىندە-اق لايىقتى جۇمىس بەرمەي، اۆتوتۇراققا جىلۋ جيناۋعا ىعىستىرىپ جۇرگەندە ءبىر كاپىر اتىپ ءولتىردى… ال، بۇل ءتورت ادام دا وليمپيادا چەمپيونى بولماعانمەن قازاق سپورتىنىڭ سيمۆولدارى بولاتىن!

…اجال اللادان ەكەنىن جاقسى بىلەمىز. بىراق ادامنىڭ، ەلدىڭ قولىنان كەلەتىنى باسقا — شىن قايعىرىپ، جوقتاي الۋ، ۇلى تالانتىمەن ەلىنە، حالقىنا، ۇلتىنا اپەرگەن اتاق-داڭقىنا قاراي ەستە قالدىرۋ، بولاشاق ۇرپاققا ۇلگى ەتە ءبىلۋ عوي! ياعني، ءولىنى ريزا ەتۋ عوي. ول جاعىنان قازاق تا، قازاق ەلى دە ءالى كوپ تومەندە جاتىر. مەن كوبي برايانتقا عانا ەمەس، سوعان دا جىلاۋدامىن بۇگىن!!!

نەسىپ جۇنىسباي ۇلى