Jaqsylyqty joqtaý aptalyǵy

Qazaqstan úshin !!!

1983 jyl! Máskeýde KSRO Halyqtarynyń VIII Spartakıadasy ótti. Ol kezde sport jýrnalıstıkasynyń atyna taqym tastaı bekigen, jarystan qalmaımyz, biz de bardyq. Búgingi jastarǵa túsinikti bolsyn, ol kezde KSRO-da bul SPARTAKIADADAN asqan mańyzdy jarys joq bolatyn. Ol jarystardaǵy nátıjeni KPSS Ortalyq komıtetiniń ózi baqylaýda ustap, jaqsy nátıje kórsetseń bastan sıpap, nashar nátıje kórsetseń quıryqtan shyqpyrtatyn! О́ıtkeni, bul Sportakıadadaǵy jeńisterine Respýblıka qorjynyna upaı túsetin… Talaı basshylar qyzmetten de taıǵan…

Keldik Máskeýge, Jolǵa júrerde Spartakıadaǵa qatysatyn sportshylar tizimin qaraǵanda, klassıkalyq balýandar tiziminde Jaqsylyqtyń da turǵanyn kórgenmin. «E, tizimge engize salǵan ǵoı, kim biledi…» degem de qoıǵanmyn. Jarys bolsa birden izdeıtinim kúres pen boks! Ekeýinde qazaq jigitteri mol áıteýir. Baıaǵy kúreske tarttym birden. Kilemge 48 kg Jaqsylyq shyǵa kelsin! Qarsylasy armıan balýany. Ustasa ketti. Aınalasy bir mınýtteı ǵana boldy,bir kezde armıan balýanynyń tizesi Jaqsylyqtyń qulaq-shekesine saq ete tústi. Jaqsylyq kilemge kesken terekteı qulady! Sulap tústi. Men 5-6 qatarda otyrǵanmyn, kilemge bir-aq qarǵydym. Kórgender bar. Dáriger de júgirip shyqty kilemge. Jaqsylyq esten tanyp qalǵan eken; dári ısketip, ýkol salyp, aıaq-qolyn ýqalap júrip, 7,5 mınýtta esi áreń kirdi! Dereý jedel járdemmen aýrýhanaǵa ala jóneldi. Biz qaldyq zalda. Ol aýrýhanada bir apta jatyp shyqty. Shyqqan soń men jatqan jerine izdep bardym. Jazdyń kúni,dalada serýendep júr eken. …Kelgenshe oılap kelgenmin; 1980-de chempıon boldy, 1981-de chempıon boldy. Sodan soń shyn jattyǵýdy tastady. El araladyq, Keńes dástúrimen qaıta-qaıta «jýdyq», qonaqtan qonaq, kezdesýden kezdesý… Qushaqtasyp, hal surasqan soń dosyma kúle qarap; «Jaqa-aý, sen sońǵy eki jylda belsendi jattyǵýdy qoıdyń. Myna kúreske kelgenińe jol bolsyn?!» deımin ǵoı. «…Endi , – deıdi Jaqsylyq mektep balasyndaı basy,moınyn sıpalap, – Otan úshin, Respýblıka úshin, Qazaqstan úshin!  kúres, – dedi. Qalaı barmaımyn deı alamyn?!.»

Mine, Jaqsylyq Úshkempirov degen patrıottyń taǵdyrynan bir ǵana sát! Osy jyly Jaqsylyq úlken sportpen qoshtasty. Ony Krasnoıarsk qalasynda ótken iri Odaqtyq jarysta úlken sporttan,ıaǵnı,kúresten, Keńes Odaǵynyń qurama komandasynan shyǵaryp saldy…

Nesip JÚNISBAIULY,

 jýrnalıst-jazýshy, sport qaıratkeri,

Qazaqstan Respýblıkasynyń eńbek sińirgen qaıratkeri.