قامشىبەك قوڭقاباەۆ: «ەشقاشان وڭاي جەكپە-جەك بولمايدى»

18 جەلتوقسان كۇنى اسا اۋىر سالماقتاعى بوكسشى قامشىبەك كونقاباەۆ «INDEPENDENCE DAY» سپورت كەشىندە ۋكراينالىق سەرگەي رادچەنكومەن شارشى الاڭعا شىعادى.  قازىر بوكسشىلار جەكپە-جەككە دايىندالىپ جاتىر. جاقىندا ءبىز شويىن جۇدىرىقتى بىلعارى قولعاپ شەبەرىمىزبەن كەزدەسىپ، الداعى ايقاسقا دايىندىعى تۋرالى از-كەم اڭگىمەلەسكەن ەدىك.

–قامشىبەك، 18 جەلتوقساندا كاسىپقوي بوكستاعى ەكىنشى جەكپە-جەگىڭدى وتكىزەسىڭ عوي. دايىندىق قالاي بولىپ جاتىر؟

–جۋىردا قازاقستان چەمپيوناتىنىڭ بولعانىن بىلەسىزدەر. وسى جارىسقا قاتىسقان جىگىتتەر سىننان سۇرىنبەي ءوتىپ، جانكۇيەرلەر مەن  مامانداردىڭ ءۇمىتىن اقتاپ شىقتى. مەن كاسىپقوي رينگتەگى  العاشقى جەكپە-جەگىمدى تامىز ايىندا وتكىزگەن بولاتىنمىن. ەندى مىنە، ەكىنشى رەت شارشى الاڭعا شىعامىن. بۇل جەكپە-جەك سەگىز راۋند بولادى. مەن شىنىن ايتايىن، وسى كەزگە دەيىن وسىنشاما راۋند بويى جۇدىرىقتاسقان جوقپىن. سوندىقتان وعان ەرەكشە ءادىس-تاسىلمەن دايىندالىپ جاتىرمىن.

قازىر دايىندىققا كوپ كۇش كەتىپ جاتىر. 18 جەلتوقسان كۇنگى جەكپە-جەك مەن ءۇشىن وتە ماڭىزدى. سول ءۇشىن مەنى ايقاسقا دايىنداپ جاتقان قانات التاەۆ پەن سەيىتجان توكەنوۆ جاتتىقتىرۋشىلارىما  العىسىمدى ايتقىم كەلەدى. قازاقستان چەمپيوناتىندا ماعان ولاردىڭ اقىل-كەڭەستەرى كوپ كومەكتەستى. جالپى، ۇلتتىق قۇرامانىڭ تالىمگەرلەرى كۇندىز-ءتۇنى جۇمىس ىستەپ، جىگىتتەردىڭ جەڭىستەرىنە كوپ سەپتىگىن تيگىزىپ جاتىر.  سول ءۇشىن دە ولارعا زور العىسىمدى بىلدىرەمىن.

–الدا وليميپيادا جىلى كەلە جاتىر. توكيو وليمپياداسى تۋرالى تۋرالى نە ويلايسىڭ؟

–قازىر تەك 18 جەلتوقساندا وتەتىن جەكپە-جەك تۋرالى ويلاپ وتىرمىن.  قازاقستان چەمپيوناتىنان كەيىن ءبىز ۇلتتىق قۇرامانىڭ جاتتىقتىرۋشىلارىمەن وليمپيادا ويىندارىنا دايىندىق جوسپارىن تالقىلادىق. مەن توكيو وليمپياداسى مەن كاسىپقوي بوكستاعى جەكپە-جەكتەرگە دايىندالامىن. ەكەۋىن قاتار الىپ جۇرەمىن. ارينە، ونىڭ ءبارى وڭاي شارۋا ەمەس. مەنىڭ جارىسقا دايىندايتىن ءوز كوماندام بار. سولار ءبارىن مۇقيات قاراپ، جەكپە-جەكتەردىڭ ۋاقىتىن ۇتىمدى پايدالانادى. وليمپيادا جاقىنداعاندا ءبىز وقۋ-جاتتىعۋ جيىندارىن وتكىزەمىز. الداعى كەزدە بوس ۋاقىت بولمايدى. قازىر مەن دەنساۋلىعىمدى ساقتاپ، وليمپيادا الدىندا جاراقات الىپ قالماۋدى ويلاپ وتىرمىن.  كاسىپقوي بوكستا دا مەنەدجەرلەر مەن جانكۇيەرلەردىڭ ءۇمىتىن اقتاۋىم كەرەك. ءبىز بوساڭسىمايمىز. الدا ءبىزدى كوپ جۇمىس كۇتىپ تۇر. قازىر ءبىزدىڭ ماقساتىمىز – ۋكراينانىڭ بوكسشىسى رادچەنكونى جەڭۋ.  سودان كەيىن ءۇزىلىس جاساپ، الداعى جوسپارلارعا جۇيەلى  تۇردە كىرىسەمىز.

–دۇرىس ەكەن. سەنەن ءۇمىت كۇتىپ، سەنىم ارتىپ وتىرعان جانكۇيەرلەرگە قانداي تىلەگىڭ بار؟

–بارلىق وتانداستارىما، بوكس دەسە ىشكەن اسىن جەرگە قوياتىن، ءبىزدىڭ ۇلتتىق قۇراما كوماندانىڭ جىگىتتەرىنە سەنىم ارتىپ، جەڭىستەرىمىزگە ۇمىتتەنىپ جۇرگەن جانكۇيەرلەرگە مىقتى دەنساۋلىق پەن باس اماندىعىن تىلەيمىن! ەلىمىز وركەندەپ، جاڭا بيىكتەرگە جەتە بەرسىن!

ءوتىپ بارا جاتقان جىلداعى قيىندىقتار 2020 جىلمەن تاريح قويناۋىندا قالسىن دەيمىن. كەلە جاتقان جاڭا جىلدا ءاربىر وتانداسىمىزدىڭ وتباسىندا تەك باق-بەرەكە، داستارحاندارىندا مەرەكە بولسىن!

–راحمەت! ايتقانىڭ كەلسىن! شارشى الاڭعا ەل ءۇمىتىن ارقالاپ شىعاتىن بارلىق قازاقتىڭ جىگىتتەرىنە تەك جەڭىس تىلەيمىز!

اڭگىمەلەسكەن رۇستەم جۇمان ۇلى