Qamshybek QOŃQABAEV: «Eshqashan ońaı jekpe-jek bolmaıdy»

18 jeltoqsan kúni asa aýyr salmaqtaǵy boksshy Qamshybek Konqabaev «INDEPENDENCE DAY» sport keshinde ýkraınalyq Sergeı Radchenkomen sharshy alańǵa shyǵady.  Qazir boksshylar jekpe-jekke daıyndalyp jatyr. Jaqynda biz shoıyn judyryqty bylǵary qolǵap sheberimizben kezdesip, aldaǵy aıqasqa daıyndyǵy týraly az-kem áńgimelesken edik.

–Qamshybek, 18 jeltoqsanda kásipqoı bokstaǵy ekinshi jekpe-jegińdi ótkizesiń ǵoı. Daıyndyq qalaı bolyp jatyr?

–Jýyrda Qazaqstan chempıonatynyń bolǵanyn bilesizder. Osy jarysqa qatysqan jigitter synnan súrinbeı ótip, jankúıerler men  mamandardyń úmitin aqtap shyqty. Men kásipqoı rıngtegi  alǵashqy jekpe-jegimdi tamyz aıynda ótkizgen bolatynmyn. Endi mine, ekinshi ret sharshy alańǵa shyǵamyn. Bul jekpe-jek segiz raýnd bolady. Men shynyn aıtaıyn, osy kezge deıin osynshama raýnd boıy judyryqtasqan joqpyn. Sondyqtan oǵan erekshe ádis-tásilmen daıyndalyp jatyrmyn.

Qazir daıyndyqqa kóp kúsh ketip jatyr. 18 jeltoqsan kúngi jekpe-jek men úshin óte mańyzdy. Sol úshin meni aıqasqa daıyndap jatqan Qanat Altaev pen Seıitjan Tókenov jattyqtyrýshylaryma  alǵysymdy aıtqym keledi. Qazaqstan chempıonatynda maǵan olardyń aqyl-keńesteri kóp kómektesti. Jalpy, ulttyq quramanyń tálimgerleri kúndiz-túni jumys istep, jigitterdiń jeńisterine kóp septigin tıgizip jatyr.  Sol úshin de olarǵa zor alǵysymdy bildiremin.

–Alda Olımıpıada jyly kele jatyr. Tokıo Olımpıadasy týraly týraly ne oılaısyń?

–Qazir tek 18 jeltoqsanda ótetin jekpe-jek týraly oılap otyrmyn.  Qazaqstan chempıonatynan keıin biz ulttyq quramanyń jattyqtyrýshylarymen Olımpıada oıyndaryna daıyndyq josparyn talqyladyq. Men Tokıo Olımpıadasy men kásipqoı bokstaǵy jekpe-jekterge daıyndalamyn. Ekeýin qatar alyp júremin. Árıne, onyń bári ońaı sharýa emes. Meniń jarysqa daıyndaıtyn óz komandam bar. Solar bárin muqııat qarap, jekpe-jekterdiń ýaqytyn utymdy paıdalanady. Olımpıada jaqyndaǵanda biz oqý-jattyǵý jıyndaryn ótkizemiz. Aldaǵy kezde bos ýaqyt bolmaıdy. Qazir men densaýlyǵymdy saqtap, Olımpıada aldynda jaraqat alyp qalmaýdy oılap otyrmyn.  Kásipqoı boksta da menedjerler men jankúıerlerdiń úmitin aqtaýym kerek. Biz bosańsymaımyz. Alda bizdi kóp jumys kútip tur. Qazir bizdiń maqsatymyz – Ýkraınanyń boksshysy Radchenkony jeńý.  Sodan keıin úzilis jasap, aldaǵy josparlarǵa júıeli  túrde kirisemiz.

–Durys eken. Senen úmit kútip, senim artyp otyrǵan jankúıerlerge qandaı tilegiń bar?

–Barlyq otandastaryma, boks dese ishken asyn jerge qoıatyn, bizdiń ulttyq qurama komandanyń jigitterine senim artyp, jeńisterimizge úmittenip júrgen jankúıerlerge myqty densaýlyq pen bas amandyǵyn tileımin! Elimiz órkendep, jańa bıikterge jete bersin!

О́tip bara jatqan jyldaǵy qıyndyqtar 2020 jylmen tarıh qoınaýynda qalsyn deımin. Kele jatqan jańa jylda árbir otandasymyzdyń otbasynda tek baq-bereke, dastarhandarynda mereke bolsyn!

–Rahmet! Aıtqanyń kelsin! Sharshy alańǵa el úmitin arqalap shyǵatyn barlyq qazaqtyń jigitterine tek jeńis tileımiz!

Áńgimelesken Rústem JUMANULY