Tektiden tekti týady

Búgingi senbi qýanyshty jańalyqtarmen janymyzdy qýantty. Qazaqtyń aty áıgili kommentatory, belgili sport jýrnalısi Dıas Ilııasuly Omarovtyń ómirjolyna arnalǵan tamasha bir kitaptyń tusaýy kesilip, oqyrmanǵa jol tartyp otyr. «Vel reportaj Dıas Omarov» degen atpen jaryq kórip otyrǵan estelik-esseler jınaǵy, ataqty kommentatordyń qazaq sportyndaǵy eleýli eńbekteri saǵynyshpen eske alynady.

Mende áıgili aǵamen sport jýrnalıstıkasynda kóp jyldar boıy qasynda júrip, tárbıesin kórgen shákirtteriniń biri retinde bul kitapqa óz esteligimdi qaldyrǵan edim. Aıtýly kitapty belgili sport jýrnalısi Álim Anapııanov pen tanymal rejısser Meıirhan Áshirbekter birigip jazyp shyǵarǵan eken. Kitap tamasha, tartymdy estelikterimen qundy.

Meniń bir aıtarym, el ishinde salaýatty ómir saltyn ómiriniń sońǵy sátine deıin ustaǵan bir adam bolsa, ol – Dıas aǵamyz. Jaryqtyq, qashan kórseń aqjarqyn kúlkisimen, sıqyrly ádemi daýysymen adam janyn baýrap alýshy edi. Sosyn men ol kisiniń eshqashan ashýǵa salyp, bireýge daýys kótergenin estigen de kórgen de emespin. О́mir boıy qasynda birge júrip kommentatorlyq salany birge ıgergen dosy Rabat Jánibekov aǵamyz da osyndaı dosynyń atynda kitap shyǵyp, jarys ótip jatqanda úıde otyrmaı, qýanyshty bólisýge kelipti.

Rabat aǵamyz da dosy týraly saǵynyshty esteligin aqparat quraldaryna jaqsylap sherin tarqata aıtyp berdi. «Tektiden tekti týady», demekshi, ákesi Ilııas Omarov kezinde Qaz KSR-niń Mádenıet mınıstri bolyp turǵanda kóptegen qınalǵan jandarǵa qamqorlyq jasaǵan, jomart júrek tulǵa bolǵan eken. Ázil aıtsa da dóp aıtatyn keremet jan bolsa kerek. Dıas aǵany sońǵy ret men «Dınamo» stadıonynan shyǵyp kele jatqanda kórgen edim. Sonda aǵamyz jasy seksenge jetse de áli dop teýip, salaýatty ómir saltyn dáriptep júrdi.

Jaryqtyq, erekshe týǵan jan edi. Jumsaq, jarasymdy ázilderi de tek ózine ǵana jarasyp turatyn. Allanyń rahymyna bólenip aldy peıish, arty kenish bolsyn degen tileýdi aıtamyz. Mine, búgingi jaryq kórip otyrǵan kitabynyń tusaýkeserine oraı, fýtboldan «Qaırat» klýbynyń ardagerleri men jýrnalısterden jasaqtalǵan qurama komanda oıyn alańynda kezdesti. Kezdesý 2:2 esebimen teń aıaqtaldy. Mundaıda dostyq jeńdi dep jatady emes pe. «Qaırat» quramasynda kezinde jasyl alańda teńdesiz ónerimen jankúıerlerin tánti etken Vahıd Masýdov óner kórsetti. «Syrly aıaqtyń syry ketse de syny ketpepti», demekshi, Vaha áli sol babynda sııaqty. Oıyn sońynan jıylyp estelik sýretke túsýdiń sáti keldi.

Aqyn ORDABAIULY,

 ALMATY