ءى كەنجالين وقۋلارى قايراتكەر قالامگەرگە قۇرمەتتى كورسەتتى

كەشە ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىندە ءى كەنجالين وقۋلارى اياسىندا ۇيىمداستىرىلعان «قازاقستان قوعامىنداعى اقپاراتتىق ۇدەرىستەر: باق مەنەدجمەنتى مەن ماركەتينگى جانە PR» اتتى حالىقارالىق عىلىمي-تاجىريبەلىك ونلاين كونفەرەنتسيا وتە جاقسى ءوتتى.

وعان مەملەكەت جانە قوعام قايراتكەرلەرى قۇتتىقتاۋ حاتتارىن جولداپ، شەتەلدىك جانە وتاندىق عالىمدار، قالامگەرلەر، باق باسشىلارى مەن تىلشىلەرى، وقىتۋشىلار مەن ستۋدەنتتەر قاتىسىپ، اكەمنىڭ جۋرناليستيكا مەن عىلىمداعى ەڭبەگى تۋرالى اڭگىمە قوزعادى.

وقۋلار قازۇۋ باسقارما باسشىسى-رەكتورى جانسەيىت تۇيمەباەۆتىڭ قولداۋىمەن ءوتىپ، ەلىمىزدە اقپاراتتىق مەنەدجمەنت تەورياسى مەن تاجىريبەسىنىڭ نەگىزىن قالاعان بەلگىلى عالىم، جازۋشى-پۋبليتسيست، ساياسي عىلىمدار كانديداتى، ۇلاعاتتى ۇستاز، قوعام قايراتكەرى اكەم جۇمابەك كەنجاليندى ەسكە الۋعا ارنالدى.

كونفەرەنتسيانى الەۋمەتتىك دامۋ جونىندەگى پرورەكتوردىڭ مىندەتىن اتقارۋشى ءاليا ءماسالىموۆا اشىپ، قالامگەردىڭ قازاق جۋرناليستيكاسىنا، سونىڭ ىشىندە اقپاراتتىق مەنەدجمەنتتى قالىپتاستىرۋداعى ەڭبەگىن اتاپ ءوتتى. وسى جەردە جۋرناليستيكا فاكۋلتەتىنىڭ دەكانى ساعاتبەك مەدەۋبەك ۇلى مەملەكەتتىك حاتشى قىرىمبەك كوشەرباەۆ، اقپارات جانە قوعامدىق دامۋ ءمينيسترى ايدا بالاەۆا، سىرتقى ىستەر مينيسترلىگى حالىقارالىق اقپارات كوميتەتىنىڭ توراعاسى اسقار ابدراحمانوۆ پەن پولشا-قازاقستان ساۋدا-ونەركاسىپتىك پالاتاسىنىڭ توراعاسى پەتر گۋزوۆسكيدىڭ قۇتتىقتاۋ حاتتارىن وقىپ بەردى.

مەملەكەتتىك حاتشى ءوز سوزىندە: «تالانتتى كوسەمسوزشى رەتىندە تانىلعان جۇمابەك كەنجالين بىرقاتار رەسپۋبليكالىق باسىلىمدارعا جەتەكشىلىك ەتۋمەن قاتار، قوعامدىق-ساياسي سالاداعى عىلىممەن جۇيەلى اينالىستى. بەلگىلى زەرتتەۋشىنىڭ تەوريا مەن پراكتيكانى ۇشتاستىرۋ ناتيجەسىندە دۇنيەگە كەلگەن «ساياسي مەنەدجمەنت جانە ءباسپاسوزدىڭ جۇرتشىلىقپەن بايلانىس ماسەلەلەرى» اتتى ىرگەلى ەڭبەگى، سونداي-اق اقپاراتتىق مەنەدجمەنت پەن ماركەتينگ بويىنشا جاساعان عىلىمي-ادىستەمەلىك تالدامالارى بۇگىندە وسى سالا ماماندارىنىڭ جانە جاس عالىمداردىڭ يگىلىگىنە قىزمەت ەتۋدە» دەسە، اقپارات جانە قوعامدىق دامۋ ءمينيسترى ايدا بالاەۆا وقۋلاردىڭ ماڭىزدىلىعى مەن جۇمىسىنا تىلەكتەستىك ءبىلدىرىپ، قالامگەردىڭ ءومىرى مەن شىعارماشىلىعىنىڭ قولىنا قالام ۇستاعان جاستارعا ۇلگى-ونەگە بولاتىنىن اتاپ كورسەتتى.

–جۇمابەك ومار ۇلى – سانالى عۇمىرىن قازاق جۋرناليستيكاسىن دامىتۋعا ارناپ، كاسىبي ءوسۋ مەن ورلەۋدىڭ بارلىق تابالدىرىعىنان وتكەن بەلگىلى قالامگەر. ول ەڭبەك جولىن «سوتسياليستىك قازاقستاننان» باستاپ، «ءبىلىم جانە ەڭبەك» جۋرنالىندا، «حالىق كەڭەسىندە» ابىرويلى قىزمەت ەتتى. «اقيقات» جۋرنالىنىڭ باس رەداكتورى، «قازاق ادەبيەتى» گازەتىنىڭ باس رەداكتورى قىزمەتتەرىن اتقاردى.

ەلىمىزدىڭ اقپارات كەڭىستىگىندە وزىندىك ورىنى بار ۇجىم – «قازاق گازەتتەرى» جۋرناليستىك ۇجىمىنىڭ ۋىعىن قاداپ، شاڭىراعىن كوتەرىپ، ونى جيىرما جىلعا جۋىق باسقارعان جۇمابەك كەنجاليننىڭ قوعامدىق جانە شىعارماشىلىق قىزمەتى بولاشاق قالامگەرلەر ءۇشىن ۇلگى-ونەگە بولىپ تابىلادى.

ج.كەنجالين قازاقستان جۋرناليستەر وداعى سىيلىعىنىڭ جانە قازاقستان رەسپۋبليكاسى پرەزيدەنتى سىيلىعىنىڭ لاۋرەاتى بولدى. ول سونىمەن قاتار قازاق ءبىلىمى مەن عىلىمىنىڭ قارا شاڭىراعى-ءال-فارابي اتىنداعى قازاق ۇلتتىق ۋنيۆەرسيتەتىندە ۇزاق جىلدار ۇستازدىق ەتىپ، ساياساتتانۋشى عالىم رەتىندە اقپاراتتىق مەنەدجمەنت تەورياسى مەن پراكتيكاسىنىڭ نەگىزىن قالادى، – دەدى مينيستر.

كونفەرەنتسياعا جولداعان قۇتتىقتاۋ حاتتارىندا سىرتقى ىستەر مينيسترلىگى حالىقارالىق اقپارات كوميتەتىنىڭ توراعاسى اسقار ابدراحمانوۆ پەن پولشا-قازاقستان ساۋدا-ونەركاسىپتىك پالاتاسىنىڭ توراعاسى پەتر گۋزوۆسكي دە وقۋلاردىڭ ءمانى مەن ماڭىزىن اتاپ ءوتتى. ودان كەيىن «قاۋىرسىن قالام» ءفيلمى (تەكستى وقىعان ۋنيۆەرسيتەتتىڭ اعا وقىتۋشىسى، PhD دوكتورانت نەليا رۋشانوۆا) كورسەتىلدى. وسى ءفيلمدى كورگەندە: «مىنا دۇنيەنى سۇيسىنە قارادىم. وتە اسەرلى جاسالعان ەكەن!»، «كوڭىلىم بوساپ، قاراپ شىقتىم»، «جاقسى جاسالعان»، «تاماشا ۆيدەو ەكەن»، «كۇشتى ەكەن. اعا تۋرالى ادەمى ەستەلىك»، «تاماشا!»، «كوڭىلىم بوساپ، ۇيىمداستىرۋ جاعى دۇرىس ەكەن»، «ورازا قابىل بولسىن! تاماشا شىعىپتى»، «جاقسى تۇسىرگەن فيلم ەكەن»، «جاقسى حابار ەكەن»، دەگەن سوزدەرىن ايتقان ادامدار دا كوپ بولدى. فيلم كورسەتىلگەن سوڭ، پارلامەنت ءماجىلىسىنىڭ دەپۋتاتتارى ساۋىتبەك ابدراحمانوۆ، مەيرامبەك تولەپبەرگەن، جاناربەك ءاشىمجان، اكەمنىڭ عىلىمداعى ۇستازى فيلوسوفيا عىلىمدارىنىڭ دوكتورى، پروفەسسور، ۇلتتىق عىلىم اكادەمياسىنىڭ اكادەميگى راۋشانبەك ءابساتتاروۆ، ونىڭ 40 جىلدان استام ۋاقىتتان بەرى سىيلاسىپ، بىرگە قىزمەت ەتكەن ارىپتەستەرى فيلولوگيا عىلىمدارىنىڭ دوكتورى، پروفەسسور ءومىرحان ءابدىمان ۇلى، اقىن، ۇلتتىق عىلىم اكادەمياسىنىڭ اكادەميگى باۋىرجان جاقىپ، «قازاق گازەتتەرى» جشس باس ديرەكتورى – رەداكتورلار كەڭەسىنىڭ توراعاسى ءشامشيددين پاتتەەۆ، كۋرستاستارى، بەلگىلى جازۋشى-پۋبليتسيستەر تالعات ايتباي، شارحان قازىعۇل، ءسابيت دۇيسەنبيەۆ، سامات يبرايم، امانگەلدى كەڭشىلىك ۇلى، فيلولوگيا عىلىمدارىنىڭ دوكتورى، پروفەسسور تەمىرحان تەبەگەنوۆ پەن ساياساتتانۋ عىلىمدارىنىڭ دوكتورى، پروفەسسور سايىن بورباسوۆ ءسوز سويلەپ، قالامگەردىڭ وتكەن عاسىرداعى قيىن قىستاۋ كەزدەرى اقپاراتتىق مەنەدجمەنتتى قالىپتاستىرۋداعى، بۇقارالىق اقپارات قۇرالدارىن زامان تالابىنا ساي دامىتۋداعى ەڭبەگىن ايتىپ، جۋرناليستيكا مەن عىلىمدى ۇشتاستىرۋداعى تاجىريبەسى بارلىق ازاماتقا ۇلگى بولاتىنىن مالىمدەدى.

جيىن 2 ساعات 45 مينۋتقا سوزىلىپ، اڭگىمە اراسىندا قازىرگى زامانعى جۋرناليستيكانىڭ وزەكتى دە ءتۇيىندى ماسەلەلەرى تالقىلانىپ، اقپاراتتىق رەسۋرستاردى ءتيىمدى پايدالانۋ جانە ونىڭ تيىمدىلىگىن ارتتىرۋ جولدارى زەردەلەندى. وسى جەردە مەن ءى كەنجالين وقۋلارى اياسىندا وتكەن «قازاقستان قوعامىنداعى اقپاراتتىق ۇدەرىستەر: باق مەنەدجمەنتى مەن ماركەتينگى جانە PR» اتتى حالىقارالىق عىلىمي-تاجىريبەلىك ونلاين كونفەرەنتسياسىنا قۇتتىقتاۋ حاتتارىن جولداعان مەملەكەتتىك حاتشى قىرىمبەك كوشەرباەۆ، اقپارات جانە قوعامدىق دامۋ ءمينيسترى ايدا بالاەۆا، سىرتقى ىستەر مينيسترلىگى حالىقارالىق اقپارات كوميتەتىنىڭ توراعاسى اسقار ابدراحمانوۆ پەن پولشا-قازاقستان ساۋدا-ونەركاسىپتىك پالاتاسىنىڭ توراعاسى پەتر گۋزوۆسكيگە، وقۋلاردى وتكىزۋگە قولداۋ كورسەتكەن قازۇۋ باسقارما باسشىسى-رەكتورى، فيلولوگيا عىلىمدارىنىڭ دوكتورى، پروفەسسور، جانسەيىت تۇيمەباەۆقا، ونى ۇيىمداستىرۋعا اتسالىسقان جۋرناليستيكا فاكۋلتەتىنىڭ دەكانى، فيلولوگيا عىلىمدارىنىڭ كانديداتى، دوتسەنت ساعاتبەك مەدەۋبەك ۇلىنا، يۋنەسكو، حالىقارالىق جۋرناليستيكا جانە قوعامدىق مەديا كافەدراسىنىڭ مەڭگەرۋشىسى، فيلولوگيا عىلىمدارىنىڭ دوكتورى، پروفەسسور نازگۇل شىڭعىسوۆاعا، ەكونوميكا عىلىمدارىنىڭ كانديداتى، پروفەسسور جەتپىسباي بەكبولات ۇلىنا، كافەدرا مەڭگەرۋشىسىنىڭ عىلىمي-يننوۆاتسيالىق جۇمىس جونىندەگى ورىنباسارى، فيلولوگيا عىلىمدارىنىڭ كانديداتى، دوتسەنت داريعا گۋباشەۆاعا، اكەم تۋرالى «قاۋىرسىن قالام» ءفيلمىن جاساعان جۋرناليست، اعا وقىتۋشى، PhD دوكتورانت نەليا رۋشانوۆاعا اۋلەتىمىزدىڭ جانە وتباسىمنىڭ اتىنان العىس ايتامىن. سونىمەن بىرگە فەيسبۋك پەن ينستاگرام الەۋمەتتىك جەلىسىندە ءى كەنجالين وقۋلارىنا تىلەكتەستىگىن ءبىلدىرىپ جاتقان بارشا اعايىنعا اق ادال كوڭىلدەرىڭىزگە، نيەتتەرىڭىزگە، اقجارما تىلەكتەرىڭىزگە راحمەت ايتقىم كەلەدى. ەلىمىز تىنىش، اسپانىمىز اشىق، دەنىمىز ساۋ، باسىمىز امان بولسىن!

داستان كەنجالين