I Kenjalın oqýlary qaıratker qalamgerge qurmetti kórsetti

Keshe ál-Farabı atyndaǵy Qazaq ulttyq ýnıversıteti jýrnalıstıka fakýltetinde I Kenjalın oqýlary aıasynda uıymdastyrylǵan «Qazaqstan qoǵamyndaǵy aqparattyq úderister: BAQ menedjmenti men marketıngi jáne PR» atty halyqaralyq ǵylymı-tájirıbelik onlaın konferenııa óte jaqsy ótti.

Oǵan memleket jáne qoǵam qaıratkerleri quttyqtaý hattaryn joldap, sheteldik jáne otandyq ǵalymdar, qalamgerler, BAQ basshylary men tilshileri, oqytýshylar men stýdentter qatysyp, ákemniń jýrnalıstıka men ǵylymdaǵy eńbegi týraly áńgime qozǵady.

Oqýlar QazUÝ Basqarma basshysy-rektory Janseıit Túımebaevtyń qoldaýymen ótip, elimizde aqparattyq menedjment teorııasy men tájirıbesiniń negizin qalaǵan belgili ǵalym, jazýshy-pýblııst, saıası ǵylymdar kandıdaty, ulaǵatty ustaz, qoǵam qaıratkeri ákem Jumabek Kenjalındi eske alýǵa arnaldy.

Konferenııany áleýmettik damý jónindegi prorektordyń mindetin atqarýshy Álııa Másálimova ashyp, qalamgerdiń qazaq jýrnalıstıkasyna, sonyń ishinde aqparattyq menedjmentti qalyptastyrýdaǵy eńbegin atap ótti. Osy jerde Jýrnalıstıka fakýltetiniń dekany Saǵatbek Medeýbekuly Memlekettik hatshy Qyrymbek Kósherbaev, Aqparat jáne qoǵamdyq damý mınıstri Aıda Balaeva, Syrtqy Ister mınıstrligi Halyqaralyq aqparat komıtetiniń tóraǵasy Asqar Abdrahmanov pen Polsha-Qazaqstan Saýda-О́nerkásiptik palatasynyń tóraǵasy Petr Gýzovskııdiń quttyqtaý hattaryn oqyp berdi.

Memlekettik hatshy óz sózinde: «Talantty kósemsózshi retinde tanylǵan Jumabek Kenjalın birqatar respýblıkalyq basylymdarǵa jetekshilik etýmen qatar, qoǵamdyq-saıası saladaǵy ǵylymmen júıeli aınalysty. Belgili zertteýshiniń teorııa men praktıkany ushtastyrý nátıjesinde dúnıege kelgen «Saıası menedjment jáne baspasózdiń jurtshylyqpen baılanys máseleleri» atty irgeli eńbegi, sondaı-aq aqparattyq menedjment pen marketıng boıynsha jasaǵan ǵylymı-ádistemelik taldamalary búginde osy sala mamandarynyń jáne jas ǵalymdardyń ıgiligine qyzmet etýde» dese, Aqparat jáne qoǵamdyq damý mınıstri Aıda Balaeva oqýlardyń mańyzdylyǵy men jumysyna tilektestik bildirip, qalamgerdiń ómiri men shyǵarmashylyǵynyń qolyna qalam ustaǵan jastarǵa úlgi-ónege bolatynyn atap kórsetti.

–Jumabek Omaruly – sanaly ǵumyryn qazaq jýrnalıstıkasyn damytýǵa arnap, kásibı ósý men órleýdiń barlyq tabaldyryǵynan ótken belgili qalamger. Ol eńbek jolyn «Soıalıstik Qazaqstannan» bastap, «Bilim jáne eńbek» jýrnalynda, «Halyq keńesinde» abyroıly qyzmet etti. «Aqıqat» jýrnalynyń bas redaktory, «Qazaq ádebıeti» gazetiniń bas redaktory qyzmetterin atqardy.

Elimizdiń aqparat keńistiginde ózindik oryny bar ujym – «Qazaq gazetteri» jýrnalıstik ujymynyń ýyǵyn qadap, shańyraǵyn kóterip, ony jıyrma jylǵa jýyq basqarǵan Jumabek Kenjalınniń qoǵamdyq jáne shyǵarmashylyq qyzmeti bolashaq qalamgerler úshin úlgi-ónege bolyp tabylady.

J.Kenjalın Qazaqstan Jýrnalıster odaǵy syılyǵynyń jáne Qazaqstan Respýblıkasy Prezıdenti syılyǵynyń laýreaty boldy. Ol sonymen qatar qazaq bilimi men ǵylymynyń qara shańyraǵy-ál-Farabı atyndaǵy Qazaq ulttyq ýnıversıtetinde uzaq jyldar ustazdyq etip, saıasattanýshy ǵalym retinde aqparattyq menedjment teorııasy men praktıkasynyń negizin qalady, – dedi mınıstr.

Konferenııaǵa joldaǵan quttyqtaý hattarynda Syrtqy Ister mınıstrligi Halyqaralyq aqparat komıtetiniń tóraǵasy Asqar Abdrahmanov pen Polsha-Qazaqstan Saýda-О́nerkásiptik Palatasynyń tóraǵasy Petr Gýzovskıı de Oqýlardyń máni men mańyzyn atap ótti. Odan keıin «Qaýyrsyn qalam» fılmi (teksti oqyǵan ýnıversıtettiń aǵa oqytýshysy, PhD doktorant Nelıa Rýshanova) kórsetildi. Osy fılmdi kórgende: «Myna dúnıeni súısine qaradym. О́te áserli jasalǵan eken!», «Kóńilim bosap, qarap shyqtym», «Jaqsy jasalǵan», «Tamasha vıdeo eken», «Kúshti eken. Aǵa týraly ádemi estelik», «Tamasha!», «Kóńilim bosap, uıymdastyrý jaǵy durys eken», «Oraza qabyl bolsyn! Tamasha shyǵypty», «Jaqsy túsirgen fılm eken», «Jaqsy habar eken», degen sózderin aıtqan adamdar da kóp boldy. Fılm kórsetilgen soń, Parlament Májilisiniń depýtattary Saýytbek Abdrahmanov, Meırambek Tólepbergen, Janarbek Áshimjan, ákemniń ǵylymdaǵy ustazy fılosofııa ǵylymdarynyń doktory, professor, Ulttyq Ǵylym akademııasynyń akademıgi Raýshanbek Ábsattarov, onyń 40 jyldan astam ýaqyttan beri syılasyp, birge qyzmet etken áriptesteri fılologııa ǵylymdarynyń doktory, professor О́mirhan Ábdimanuly, aqyn, Ulttyq Ǵylym akademııasynyń akademıgi Baýyrjan Jaqyp, «Qazaq gazetteri» JShS Bas dırektory – Redaktorlar Keńesiniń tóraǵasy Shámshıddın Pátteev, kýrstastary, belgili jazýshy-pýblııster Talǵat Aıtbaı, Sharhan Qazyǵul, Sábıt Dúısenbıev, Samat Ibraım, Amangeldi Keńshilikuly, fılologııa ǵylymdarynyń doktory, professor Temirhan Tebegenov pen saıasattaný ǵylymdarynyń doktory, professor Saıyn Borbasov sóz sóılep, qalamgerdiń ótken ǵasyrdaǵy qıyn qystaý kezderi aqparattyq menedjmentti qalyptastyrýdaǵy, buqaralyq aqparat quraldaryn zaman talabyna saı damytýdaǵy eńbegin aıtyp, jýrnalıstıka men ǵylymdy ushtastyrýdaǵy tájirıbesi barlyq azamatqa úlgi bolatynyn málimdedi.

Jıyn 2 saǵat 45 mınýtqa sozylyp, áńgime arasynda qazirgi zamanǵy jýrnalıstıkanyń ózekti de túıindi máseleleri talqylanyp, aqparattyq resýrstardy tıimdi paıdalaný jáne onyń tıimdiligin arttyrý joldary zerdelendi. Osy jerde men I Kenjalın oqýlary aıasynda ótken «Qazaqstan qoǵamyndaǵy aqparattyq úderister: BAQ menedjmenti men marketıngi jáne PR» atty halyqaralyq ǵylymı-tájirıbelik onlaın konferenııasyna quttyqtaý hattaryn joldaǵan Memlekettik hatshy Qyrymbek Kósherbaev, Aqparat jáne qoǵamdyq damý mınıstri Aıda Balaeva, Syrtqy Ister mınıstrligi Halyqaralyq aqparat komıtetiniń tóraǵasy Asqar Abdrahmanov pen Polsha-Qazaqstan Saýda-О́nerkásiptik palatasynyń tóraǵasy Petr Gýzovskııge, Oqýlardy ótkizýge qoldaý kórsetken QazUÝ Basqarma basshysy-rektory, fılologııa ǵylymdarynyń doktory, professor, Janseıit Túımebaevqa, ony uıymdastyrýǵa atsalysqan Jýrnalıstıka fakýltetiniń dekany, fılologııa ǵylymdarynyń kandıdaty, doent Saǵatbek Medeýbekulyna, IýNESKO, halyqaralyq jýrnalıstıka jáne qoǵamdyq medıa kafedrasynyń meńgerýshisi, fılologııa ǵylymdarynyń doktory, professor Nazgúl Shyńǵysovaǵa, ekonomıka ǵylymdarynyń kandıdaty, professor Jetpisbaı Bekbolatulyna, kafedra meńgerýshisiniń ǵylymı-ınnovaııalyq jumys jónindegi orynbasary, fılologııa ǵylymdarynyń kandıdaty, doent Darıǵa Gýbashevaǵa, ákem týraly «Qaýyrsyn qalam» fılmin jasaǵan jýrnalıst, aǵa oqytýshy, PhD doktorant Nelıa Rýshanovaǵa áýletimizdiń jáne otbasymnyń atynan alǵys aıtamyn. Sonymen birge Feısbýk pen Instagram áleýmettik jelisinde I Kenjalın oqýlaryna tilektestigin bildirip jatqan barsha aǵaıynǵa aq adal kóńilderińizge, nıetterińizge, aqjarma tilekterińizge rahmet aıtqym keledi. Elimiz tynysh, aspanymyz ashyq, denimiz saý, basymyz aman bolsyn!

Dastan KENJALIN