قۇربان ايت جارىستىڭ كورىگىن قىزدىردى

بارشا مۇسىلماننىڭ كوپتەن كۇتكەن قۇربان ايت مەرەكەسى دە كەلىپ جەتتى. قاسيەتتى ايت كۇنىندە جاعدايى كەلگەن ءاربىر مۇسىلمان قۇربان شالۋعا مىندەتتى. دەگەنمەندە حاديستە: «ناعىز بايلىق – دۇنيەنىڭ اعىل-تەگىل كوپتىگى ەمەس. ناعىز بايلىق – جان سارايىنىڭ بايلىعى»، – دەگەن. ەندەشە، بۇل كۇنى يمانىن  كۇشەيتىپ، جاقىندارىن ارالاپ ايت مەرەكەسىمەن قۇتتىقتاپ، قاۋىشۋ دا ادامنىڭ جان سارايىنىڭ بايلىعىن نىعايتا تۇسەدى.

تاڭ قىلاۋلاپ اتا باستاعان ساتتەن باستاپ بۇل كۇنى حالىق مەشىتكە ايت نامازىنا قاتىسۋعا اسىعادى. قۇربان ايتتا ءتورت مۇشەسى تۇگىل قوشقاردى قۇرباندىققا شالىپ، ءبىر بولىگىن وزىنە قالدىرىپ، قالعان بولىگىن جەتىم-جەسىر، جاعدايى تومەن وتباسىلارىعا تاراتىپ بەرۋ ۇلكەن ساۋاپ بولسا، بۇل كۇنى دەنساۋلىققا دا كوڭىل ءبولىپ، سالاۋاتتى  شارالارعا بەلسەنە قاتىسىپ، كوڭىل كوتەرۋدىڭ دە ماڭىزى زور ەكەن.

نەگىزى سوڭعى كەزدەرى قۇربان ايت مەرەكەسىنە قاتىستى سپورت تۇرلەرىنەن دۇرمەكتى جارىستاردى ۇيىمداستىرۋ داستۇرگە اينالىپ كەلەدى. بۇل دا ءبىر جاقسى ءبىر جاڭالىقتىڭ جارشىسى دەپ بىلەمىز. «دەنى ساۋ ادامنىڭ جان ساۋ»، – دەگەن قازاقپىز. ءبىز پەندەمىز عوي، سوندىقتان دا دەنساۋلىقتىڭ قادىرىن اۋىرعاندا عانا ءبىلىپ «اھ ۇرىپ جاتامىز. ال، سول اۋرۋدىڭ الدىن الۋدى ەرتەرەك ويلانساق ەش قاۋىپ كەلمەس ەدى. دەنساۋلىقتىڭ مىقتى بولۋى ادامنىڭ سالاۋاتتى ءومىر ءسۇرۋ سالتىندا ەكەنى ول قابىرعاعا قاعىلعان شەگەدەي اكسيوما دەسەك بولادى. پايعامبارىمىزدىڭ ءوزى سالاۋاتتى ءومىر سالتىنا دەن قويعان. مىنە، بۇگىنگى قاسيەتتى قۇربان ايت مەرەكەسىنىڭ كەلۋىنە وراي، الماتىداعى ورتالىق مەشىتتە قالالىق ءدىن ىستەرى باسقارماسىنىڭ باسشىلىعىمەن ۇلتتىق سپورت تۇرلەرىنەن تارتىستى جارىستاردىڭ ۇيىمداستىرۋى مەرەكەلىك شارانىڭ تاماشا ءبىر تۇزدىعى بولدى دەۋگە كەلەدى. «ۇلتتىق مۇرا» باعدارلاماسىنىڭ اياسىندا وتكىزىلگەن سپورتتىق شارادا، مەشىتكە جيىلعان حالىق;  ارقان تارتۋ، اسىق اتۋ، قول كۇرەستىرۋ، گىر تاسىن كوتەرۋ، قوشقار كوتەرۋ جانە توعىزقۇمالاق سەكىلدى ۇلتتىق ويىندارىمىزدان جارىس الاڭدارىندا باقتارىن سىنادى.

«ۇلتتىق مۇرا» باعدارلاماسىنىڭ ماقساتى – مەشىت جاماعاتى اراسىندا دەنەشىنىقتىرۋ مەن سالاۋاتتى ءومىر سالتىن ناسيحاتتاۋ. ەندەشە، جولى جارقىن، الار اسۋ الادا، تاربيەلىك  جاعى باسىم بۇل باعدارلاما كوپتىڭ كوڭىلىنەن شىققان جاقسى ءبىر ساۋاپتى شارا بولىپ وتىر دەپ ايتامىز.

حوش، سونىمەن مەشىتتىڭ اينالاسىنداعى ءاربىر جەردە جاسالعان سپورت تۇرلەرىنەن ءوتىپ جاتقان جارىس وتە تارتىستى باستالدى. اسىرەسە، اسىق اتۋ، قول كۇرەستىرۋ، ارقان جارىستارىنا قاتىسقان يندۋستارمەن الا شاپاندى وزبەك اعايىندار جەڭىس ءۇشىن بار كۇشتەرىن ايانىپ قالمادى. دەگەنمەندە ۇلتتىق سپورت تۇرلەرىنىڭ قايسىبىرىن  الىپ قاراساڭ دا وزدەرىن سۋداعى بالىقتاي سەزىنەتىن قاراكوز جاستارىمىزدىڭ اتويلاپ كورسەتكەن ونەرلەرىنە كوپشىلىك قول سوعىپ قوشامەت كورسەتىپ جاتتى. سونىمەن، جارىس قورتىندىلارى بويىنشا  تاناداي سەمىز قوشقاردى يىعىنا اسىپ الىپ،  2 مينۋتتا 84 رەت كوتەرگەن  باۋىرجان ابىلقايىم سىيعا تىگىلگەن  ءوز جۇلدەسىن جەتەگىنە بايلاپ الىپ كەتتى. ال، قول كۇرەسىندە ابزال  پىرىمبەككە ەشكىم قارسى كەلمەسە، گىر تاسىن 55 رەت كوتەرگەن الماس بوكەنوۆ باس جۇلدەنىڭ يەگەرى اتاندى. اسىق اتۋ ويىنىندا بەكزات ءاشىرباي الا ساقاسىن ءشيىرىپ الىپ كەرەمەت دالدىلىكپەن دارا شىقسا، توعىزقۇمالاقتا سپورتىندا  بەكمۇحامبەت ايتجان پەن ورازبەك قالبەكوۆ باس بايگەنى  جەڭىپ الدى. ارقان تارتۋ سايىسى دا تاماشا قىزىقتارعا تولى بولدى. بۇل جارىستا «سۇڭقار» توبى قارسىلاستارىن تۇگەلدەي جەڭىپ، ۇزدىك شىقتى.

وسىلايشا، قاسيەتتى قۇربان ايتتىڭ قۇرمەتىنە ارنالعان جارىستار اياقتالىپ، جەڭىمپازدار مەن جۇلدەگەرلەر ۇيىمداستىرۋشىلاردىڭ باعالى سىيلىقتارىمەن ماراپاتتالدى. ءيا، «بۇگىنگى كۇن ەرتەڭگى تاريح»، دەسەك،  جەڭىسىمەن جۇزدەرى جارقىراپ تاراپ بارا جاتقان جاماعات ايتۋلى كۇندى كوپكە دەيىن ەسكە الىپ  ايتىپ جۇرەتىنىندە كۇمان جوق. تەك اللا تاعالا، ايتتان ايتقا باسىمىز، امان باۋىرىمىز ءبۇتىن قىلىپ امان – ەسەن جەتكىزسە دەپ تىلەيىك.

اقىن ورداباي ۇلى،

الماتى