«Turan Barysy» ازيا كۋبوگىنا الەم چەمپيوندارى قاتىسادى

29 قازاندا تۇركىستان قالاسىنداعى «Olympic center» سپورت سارايىندا العاش رەت قازاقتىڭ ۇلتتىق كۇرەسىنەن «Turan Barysy» ازيا كۋبوگى ءۇشىن تۋرنير وتەدى. وعان تۇركى مەملەكەتتەرى ۇيىمىنىڭ وكىلدەرى – تۇركيا، تۇرىكمەنستان، وزبەكستان، ازەربايجان، قىرعىزستان، ۆەنگريا جانە قازاقستان بالۋاندارى قاتىسادى.

دۇرمەكتى دوداعا 7 ەلدىڭ ەڭ مىقتى دەگەن سپورتشىلارى كەلە جاتىر. ولاردىڭ اراسىندا قازاق كۇرەسىمەن قوسا، دزيۋدودان، سامبو مەن كۋراشتان حالىقارالىق جارىستاردا جۇلدە الىپ جۇرگەن سپورتشىلار دا بار. ازەربايجان قۇراماسى اتىنان سامبودان ەكى دۇركىن الەم چەمپيونى ەيۆاز باقشيەۆ (60 كگ) كۇش سىناسادى. ۆەنگريا قۇراماسى ساپىندا دزيۋدودان ەۋروپا چەمپيونى ەندرە گۋنيچ (82 كگ)، دزيۋدودان الەم چەمپيوناتىنىڭ كۇمىس جۇلدەگەرى، ەۋروپانىڭ ءۇش دۇركىن چەمپيونى بارنا بووۋر (+90 كگ) ازيا كۋبوگىندا قۇرمەت تۇعىرىنىڭ ەڭ بيىك ساتىسىنان كورىنۋگە ءۇمىتتى. ال تۇركيالىق فۋركان گۇنەر – دزيۋدودان ەۋروپا چەمپيونى اتانعان سپورتشى.

تۇرىكمەنستان قۇراماسىنىڭ بالۋاندارى دا وسال قارسىلاس ەمەس. كۋراشتان الەم چەمپيونى شاممۋحامەت كۋربانوۆ (66 كگ) پەن سامبودان ەكى دۇركىن الەم چەمپيونى سامۆەل ايراپەتيان (82 كگ) تۇركىستان تورىندە بوز كىلەمدە مىقتىلارمەن بەلدەسەدى. تۇرىكمەنستاندىق تەجەن تەجەنوۆ سامبودان بىرنەشە دۇركىن الەم چەمپيونى. ول 2017 جىلى مينسك قالاسىندا قازاق كۇرەسىنەن الەم چەمپيونى اتانعان.

وزبەكستان بالۋاندارى قازاق كۇرەسىنەن ءوتىپ جاتقان حالىقارالىق جارىستاردا جاقسى ونەر كورسەتىپ ءجۇر. قۇراما ساپىندا كۋراشتان الەم چەمپيونى ۋميد ەسانوۆ (82 كگ)، كۋراشتان الەم چەمپيونى، دزيۋدودان ازيا چەمپيونى ەركىن كوزوكوۆ (90 كگ)، كۋراشتان ءۇش دۇركىن الەم چەمپيونى، قازاق كۇرەسىنەن ەكى دۇركىن الەم چەمپيونى مۋحسين حيسوميددينوۆ (+90 كگ) بار.

ازيا كۋبوگىندا قازاق بالۋاندارىنا دا ۇلكەن ءۇمىت ارتىلىپ وتىر. قازاقستان ساپىندا 90 كگ سالماقتا ايداربەك توقتاربەك 2021 جىلى قازاق كۇرەسىنەن الەم چەمپيونى اتاندى. 90 كيلودان اسا سالماقتا عالىمجان قىرىقباي – «قازاقستان بارىسى» رەسپۋبليكالىق ءتۋرنيرىنىڭ 2021 جىلعى كۇمىس، 2022 جىلعى قولا جۇلدەگەرى.

تۋرنير ەلىمىزدەگى ۇلتتىق سپورت ءتۇرىن دامىتۋ جانە قولداۋ ماقساتىندا وتكىزىلەدى.

«Turan Barysy» ءتۋرنيرى مادەنيەت جانە سپورت مينيسترلىگى مەن تۇركىستان وبلىسى اكىمدىگىنىڭ، سونداي-اق، «Qazaq kuresi» اسسوتسياتسياسى، «Qazaqstan Barysy» قازاق كۇرەسىن قولداۋ جانە دامىتۋ قورىنىڭ ۇيىمداستىرۋىمەن وتەدى. ءتۋرنيردىڭ باس سەرىكتەستەرى – «سامۇرىق-قازىنا» ۇاق اق جانە «تۋريزم مەن سپورتتى قولداۋ جانە دامىتۋ قورى».

جانكۇيەرلەر ءتۋرنيردى Qazsport جانە TRT Avaz تەلەارنالارىنىڭ تىكەلەي ەفيرىنەن تاماشالاي الادى.

داستان كەنجالين،

استانا