«Turan Barysy» Azııa kýbogyna álem chempıondary qatysady

29 qazanda Túrkistan qalasyndaǵy «Olympic center» sport saraıynda alǵash ret qazaqtyń ulttyq kúresinen «Turan Barysy» Azııa kýbogy úshin týrnır ótedi. Oǵan Túrki memleketteri uıymynyń ókilderi – Túrkııa, Túrikmenstan, О́zbekstan, Ázerbaıjan, Qyrǵyzstan, Vengrııa jáne Qazaqstan balýandary qatysady.

Dúrmekti dodaǵa 7 eldiń eń myqty degen sportshylary kele jatyr. Olardyń arasynda qazaq kúresimen qosa, dzıýdodan, sambo men kýrashtan halyqaralyq jarystarda júlde alyp júrgen sportshylar da bar. Ázerbaıjan quramasy atynan sambodan eki dúrkin álem chempıony Eıvaz Baqshıev (60 kg) kúsh synasady. Vengrııa quramasy sapynda dzıýdodan Eýropa chempıony Endre Gýnıch (82 kg), dzıýdodan álem chempıonatynyń kúmis júldegeri, Eýropanyń úsh dúrkin chempıony Barna Booýr (+90 kg) Azııa kýbogynda qurmet tuǵyrynyń eń bıik satysynan kórinýge úmitti. Al túrkııalyq Fýrkan Gúner – dzıýdodan Eýropa chempıony atanǵan sportshy.

Túrikmenstan quramasynyń balýandary da osal qarsylas emes. Kýrashtan álem chempıony Shammýhamet Kýrbanov (66 kg) pen sambodan eki dúrkin álem chempıony Samvel Aırapetıan (82 kg) Túrkistan tórinde boz kilemde myqtylarmen beldesedi. Túrikmenstandyq Tejen Tejenov sambodan birneshe dúrkin álem chempıony. Ol 2017 jyly Mınsk qalasynda qazaq kúresinen álem chempıony atanǵan.

О́zbekstan balýandary qazaq kúresinen ótip jatqan halyqaralyq jarystarda jaqsy óner kórsetip júr. Qurama sapynda kýrashtan álem chempıony Ýmıd Esanov (82 kg), kýrashtan álem chempıony, dzıýdodan Azııa chempıony Erkin Kozokov (90 kg), kýrashtan úsh dúrkin álem chempıony, qazaq kúresinen eki dúrkin álem chempıony Mýhsın Hısomıddınov (+90 kg) bar.

Azııa kýbogynda qazaq balýandaryna da úlken úmit artylyp otyr. Qazaqstan sapynda 90 kg salmaqta Aıdarbek Toqtarbek 2021 jyly qazaq kúresinen álem chempıony atandy. 90 kılodan asa salmaqta Ǵalymjan Qyryqbaı – «Qazaqstan barysy» respýblıkalyq týrnıriniń 2021 jylǵy kúmis, 2022 jylǵy qola júldegeri.

Týrnır elimizdegi ulttyq sport túrin damytý jáne qoldaý maqsatynda ótkiziledi.

«Turan Barysy» týrnıri Mádenıet jáne sport mınıstrligi men Túrkistan oblysy ákimdiginiń, sondaı-aq, «Qazaq kuresi» assoıaııasy, «Qazaqstan Barysy» qazaq kúresin qoldaý jáne damytý qorynyń uıymdastyrýymen ótedi. Týrnırdiń bas seriktesteri – «Samuryq-Qazyna» UÁQ AQ jáne «Týrızm men sportty qoldaý jáne damytý qory».

Jankúıerler týrnırdi Qazsport jáne TRT Avaz telearnalarynyń tikeleı efırinen tamashalaı alady.

Dastan KENJALIN,

ASTANA