اتىراۋدا دزيۋدودان قازاقستان چەمپيوناتى اياقتالدى

اتىراۋدا دزيۋدودان ەرلەر مەن ايەلدەر اراسىنداعى قازاقستان چەمپيوناتى اياقتالدى. جارىستىڭ سوڭعى كۇنى ارالاس كوماندالىق جارىستار ءوتتى.

حالىقارالىق دزيۋدو فەدەراتسياسىنىڭ ەرەجەلەرىنە سايكەس، دزيۋدوشىلار التى سالماق دارەجەسىندە كۇرەستى (ايەلدەر: -57 كگ، -70 كگ، +70 كگ، ەرلەر -73 كگ، -90 كگ جانە +90 كگ).

ارالاس كوماندالىق قازاقستان چەمپيوناتىنا بارلىعى 18 كوماندا قاتىستى.

ناتيجەسىندە جەتىسۋ وبلىسىنىڭ كومانداسى چەمپيون اتانىپ، فينالدا ماڭعىستاۋ وبلىسىن 4:3 ەسەبىمەن جەڭدى. اتىراۋ جانە الماتى وبلىستارىنان كەلگەن تاتامي شەبەرلەرى قولا مەدالدارعا يە بولدى.

بيىلعى قازاقستان چەمپيوناتىنىڭ جەكە جارىستارىنا استانا، الماتى جانە شىمكەنت قالالارىنان جانە ەلىمىزدىڭ 17 وبلىسىنان 500-گە جۋىق سپورتشى قاتىستى.

اقتوبە وبلىسىنىڭ تاتامي شەبەرلەرى جەكە ەسەپتە 3 التىن جانە 1 قولا مەدال جەڭىپ الىپ، مەدال كەستەسىندە كوش باستادى. اتىراۋ وبلىسىنىڭ دزيۋدوشىلارى 2 التىن، 2 كۇمىس جانە 3 قولا مەدالمەن ەكىنشى ورىندى يەلەندى. ال الماتى قالاسىنىڭ كومانداسى 2 التىن، 1 كۇمىس جانە 2 قولا مەدالمەن ۇزدىك ۇشتىكتى تۇيىندەدى.

جارىس قورىتىندىسى بويىنشا جەڭىمپاز جانە جۇلدەگەر اتانعان سپورتشىلار ۇلتتىق قۇرامانىڭ قۇرامىنا كىرەتىن بولادى. جاڭا ماۋسىمعا جاڭا قۇرام جاساقتالادى.

داستان كەنجالين،

استانا