بوكسشى ايدوس ەربوسىن ۇلى مالىمدەمە جاسادى

ەكىنشى ورتا سالماقتاعى بوكسشى ايدوس ەربوسىن ۇلى كومادان شىققاننان كەيىن الەۋمەتتىك جەلىدە جازبا جاريالادى.

بوكسشى كەلگەن حابارلامالاردىڭ سكرينشوتتارىن جاريالاپ، الاڭداپ، قولداۋ ءبىلدىرىپ وتىرعان وتانداستارىنا العىسىن ءبىلدىردى.

وسىعان ۇقساس سمس-تەر كوپ كەلگەن ەكەن. بارشا قولداپ جاتقان حالقىما راقمەت! اللا قالاسا ەلگە مىقتى بولىپ ورالامىن. اللا جازسا الار اسۋىمىز ءالى الدا، — دەپ جازدى ەربوسىن ۇلى.

6 قاراشادا قازاقستاندىق بوكسشى كۋبالىق داۆيد موررەلدەن نوكاۋتپەن جەڭىلگەن بولاتىن. سۋپەرورتا ديۆيزيونداعى جەكپە-جەكتە WBA تيتۋلى ساراپقا سالىنعان ەدى. 12-راۋندتاعى نوكاۋتتان كەيىن ايدوستى شۇعىل تۇردە ميننەاپوليس قالاسىنداعى اۋرۋحانالاردىڭ بىرىنە جەتكىزدى. ونى «ميىنا قان كەتۋ» دياگنوزىمەن جاساندى تۇردە كوماعا ءتۇسىرىپ، وپەراتسيا جاساعان ەدى.

داستان كەنجالين،

استانا