جاپون حالقىنان الار ۇلگى جەتەدى

وسى كۇندەرى فۋتبولدان كاتاردا ءوتىپ جاتقان ءتورت جىلدا ءبىر كەلەتىن دۇرمەكتى الەم دوداسى جەر-ءجۇزىنىڭ نازارىن وزىنە اۋدارىپ، كۇن سايىن قىزىعى قايناي ءتۇسىپ كەلەدى. فۋتبول دەگەن ءبىر سيقىر-وزىنە تارتىپ باۋراپ الادى ەمەس پە؟! بار جۇمىستى ىسىرىپ قويىپ، الەمدەگى تەڭبىل دوپتىڭ سەركەلەرىنىڭ تارتىستى ويىندارىنا كوز تىگىپ وتىرمىز.

ءيا، قازاقستان قۇراماسى دا وسىنداي ءبىر ءدۇبىرلى مۋنديالعا قاتىساتىن كۇن تۋار ما جوق پا؟-ءۇمىتتى ۇكىلەپ ايتەۋىر كەلەمىز عوي. وزىمىزدە جوق بولعان سوڭ وزگەنىڭ جىرتىسىن جىرتىپ، قىرىق پىشاق بولىپ جاتامىز. امال نەشىك… حوش، مەنى بۇل الەم چەمپيوناتىندا تاڭ قالدىرعان جاپون حالقىنىڭ قايسارلىعى، ادەبى، مادەنيەتى بولدى. نە دەگەن عاجاپ ەل دەسەڭشى. ويىندى اياعىنا دەيىن جانكەشتىلىكپەن وتكىزەتىنى ءوز الدىنا، ولاردىڭ ويىننان تىس ادامگەرشىكتەرى ادامدى ەرىكسىز ءتانتى ەتەدى. مىسالى، وزدەرى وتىرعان ورىندارىندا قالعان قوقىستى تازالاپ كەتىپ بارا جاتقان جاپوندىقتار الەمگە تازالىقتىڭ، ادامگەرشىلىكتىڭ زور ۇلگىسى بولا ءبىلدى. ءتىپتى، كومانداسى حورۆاتتاردان پەنلتيدەن ۇتىلىپ، جارىستان شىعىپ قالسا دا بۇل حالىق ءوزىنىڭ كىسىلىك قاسيەتتەرىن جوعالتپاي ستاديوننىڭ ءىشىن تازالاپ كەتتى. قالاي عانا قىزىعا دا سۇيسىنە قاراماسسىڭ. سامۋرايلاردىڭ بۇل ادامي ەرەكشە قادامى الەمگە ۇلكەن ۇلگى بولدى. بىزدەردىڭ جاپونداردان الار جاقسى قاسيەتتەر جەتىپ ارتىلادى. ال، فۋتبولعا كەلسەك، الەم فۋتبولىنىڭ سەركەلەرى اياق تۇيىستىرگەن بۇل جارىستا مەن ءوزىم ارگەنتينا قۇراماسىنا جانكۇيەرى ەدىم. ارينە، اركىمنىڭ ءوز تاڭداۋى بارى انىق. مەنىڭ تاڭداۋىم وسى قۇراما. ويتكەنى، تەڭبىل دوپتىڭ تەڭدەسىز شەبەرى، سيقىرلى سول اياعىنىڭ سوققىسى تالاي تامساناتىن گولدارعا كۋا بولدىراتىن مەسسيدىڭ سوڭعى الەم چەمپيوناتى ءساتتى اياقتالسا دەگەن ۇمىتتەمىن.

اللا ءناسىپ ەتىپ، جەڭىسكە جەتىپ جاتسا كورە جاتارمىز. جالپى، نەبىر الەم فۋتبولىندا وزىندىك ويىنى بار گەرمانيا، بەلگيا سەكىلدى كوشباسشىلاردىڭ ءوزىن جولدان شىعارىپ تاستاپ جاتقان افريكا، ازيا كوماندالارى ناعىز سەنساتسياعا اينالىپ وتىر. «قۋىرداقتىڭ كوكەسىن تۇيە سويعاندا كورەسىڭ»، دەمەكشى، كوز تويماس قىزىقتار ءالى دە الدا دەپ ويلايمىن. ەندى ارگەنتينا نيدەرلاندقا قارسى جان الىسىپ، جان بەرىسكەن ويىنعا دايىندالىپ جاتسا، انگليا فرانتسياعا قارسى كەسكىلەسكەن ويىندى كۇتىپ تۇر. برازيليا دا مۋنديالدىڭ باس جۇلدەسىنەن ءۇمىتتى كوماندانىڭ ءبىرى ەسەبىندە. ەندى قاي كوماندانىڭ باعى مەن بابى قوسىلىپ كەلىپ تۇرعانىن الدا كورە جاتارمىز.

اقىن ورداباي ۇلى،

الماتى