Azııa oıyndaryna qatysqym keledi – Jibek Qulambaeva

Tennısten Qazaqstan ulttyq quramasynyń múshesi Jibek Qulambaeva jyldy qorytyndylap, aldaǵy oı-jospary jóninde Qazaqstan tennıs federaısy baspasóz qyzmetiniń suraqtaryna jaýap berdi. Ol kelesi jyly Azııa oıyndarynda baq synap, el namysyn qorǵaǵysy keletinin aıtty.

-Jibek, dúnıejúzilik reıtıngte jekeleı synda 441-orynda tursyń. Juptyq syn seniń oń jambasyńa keletin sekildi. Qazir 201-satydasyń. Aldymen ótken maýsym nesimen este qaldy? Sony aıtyp beresiń be?

-Jalpy, maýsym oıdaǵydaı ótti deýge bolady. Jekeleı jáne juptyq synda reıtıngilik kórsetkishimdi jaqsarttym. Juptyq synda birneshe ret jarys jeńimpazy atandym. ITF25 jáne ITF15 týrnırlerinde eki ret fınalǵa deıin jettim. Degenmen, maýsym sońynda jaraqat alyp, aıaǵyna deıin oınaı almadym.

-Ol ne jaraqat? Qatty mazalap júr me?

-Tobyǵymnan jaraqat alyp edim. Qazir emdelip jatyrmyn.

-Emdelý qaı kezge deıin sozylýy múmkin?

-Eki aı.

-Sonda qańtar aıynda jattyǵyp, týrnırlerge daıyndala bastaısyń ba?

-Iá.

-Bıyl belgili tennısshi Iaroslava Shvedova tizginin ustaǵan ulttyq qurama alǵash ret komandalyq álem chempıonaty – Bıllı Djın Kıng kýbogynyń fınaldyq kezeńinde óner kórsetti. Shotlandııanyń Glazgo qalasynda oınaı almasań da, komandamen birge boldyń. Qandaı áser aldyń?

-Bıyl ulttyq qurama sapynda eki ret boldym. Áýeli Bıllı Djın Kıng kýbogynyń irikteý satysynda Astanadaǵy Ulttyq tennıs ortalyǵynda Germanııamen oınadyq. Onda juptyq synda elimizdiń birinshi raketkasy Anna Danılınamen birge óner kórsettim. Sodan keıin Glazgoǵa jol tústi. Árıne, qyzdarmen bir komandada bolyp, birge júrgen, birge jattyqqan óte paıdaly. О́ıtkeni, olardyń bári de – kásipqoı sportshylar. Bári de jyldy jaqsy aıaqtady. Ásirese, Elena Rybakınanyń «Úlken dýlyǵa» týrnıri – Ýımbldon jarysynyń chempıony atanǵany bárimizdiń mereıimizdi ósirdi. Sondyqtan olardan kóp nárseni úırenýge bolady. О́z sheberligińdi jetildire túsesiń.

-Qazir óz deńgeıińdi qalaı baǵalaısyń? WTA 125 deńgeıindegi týrnırlerge qatysa alasyń ba?

-Juptyq deńgeıde baq synaýǵa daıynmyn dep oılaımyn. Jekeleı synda reıtıngtegi ornym ázirge múmkindik bermeıtin bolar. Sondaı-aq tájirıbesi mol, reıtıngi joǵary tennısshilermen oınap kórgen joqpyn. Negizinen ITF 25, 60 dodalarynda óner kórsetip júrmin. Onda deńgeı tómendeý.

-О́tken jyly Astanada WTA 250 týrnırine qatysyp kórdiń ǵoı. Qalaı oılaısyń, ITF jarystarynyń deńgeıi kóp tómen be?

-Men sol matchta bolashaq chempıon, belgııalyq Alıson Van Eıtvankke jol bergenimmen, barynsha qarsylyq kórsettim. Oıyn 4:6, 3:6 esebimen aıaqtaldy. Tym saq oınadym. Degenmen mundaı jarystaǵy deńgeıdiń ózgeshe ekendigi baıqalyp turdy. Ol sheberligin kórsete aldy. Al mende olaı bolǵan joq.

-Aldaǵy maýsymda qandaı maqsat-mindet qoıyp otyrsyń?

-Jańa jylda reıtıngide neǵurlym joǵarylap, óz oıynymdy barynsha jaqsartsam deımin. Eń bastysy, maýsym aldynda jemisti eńbektenip, durystap daıyndalý kerek. Sosyn maýsym boıy tabysty óner kórsetkim keledi.

-Aldaǵy jyly kúzde Qazaqstan sportshylary úshin basty jarystardyń biri – Azııa oıyndary bolady. Oǵan qatysý oıyńda bar ma?

-Árıne! Ulttyq quramaǵa alynsam, oınaýǵa daıynmyn. El namysyn abyroımen qorǵaýdan artyq ne bar!

-Áńgimeńe rahmet. Aldaǵy jyly sheberligińdi jetildirip, tabystarǵa jetýińe tilektespiz.

Jibek Qulambaeva 22 jasta, Almaty qalasynyń týmasy. ITF sanatyndaǵy týrnırlerde eki ret jekeleı synda jeńimpaz atanǵan. Oǵan qosa juptyq synda 19 tıtýldy ıelengen.