رونالدۋ پورتۋگاليانىڭ جەڭىلىسىنە قاتىستى ويىن ايتتى

پورتۋگاليانىڭ شابۋىلشىسى كريشتيانۋ رونالدۋ كاتاردا فۋتبولدان ءوتىپ جاتقان الەم چەمپيوناتىندا ۇلتتىق قۇرامانىڭ ماروككو كومانداسىنان جەڭىلىسىنە قاتىستى پىكىر ءبىلدىردى.

پورتۋگاليا كومانداسى الەم چەمپيوناتىنىڭ شيرەك فينالىندا ماروككو قۇراماسىنان 0:1 ەسەبىمەن ۇتىلعاننان كەيىن رونالدۋ Instagram الەۋمەتتىك جەلىسىندە كومانداسىنىڭ جەڭىلىسىنە قاتىستى ويىن ايتتى.

پورتۋگاليا قۇراماسى ساپىندا الەم چەمپيوناتىن جەڭىس الۋ مەنىڭ كارەرامداعى ەڭ ۇلكەن ارمان ەدى. مەن كوپتەگەن اتاق الدىم. ۇلتتىق قۇراما ساپىندا تالاي جەتىستىككە جەتتىم.  بىراق مەن ەڭ ۇلكەن ارمانىما جەتە المادىم. مەن سول ءۇشىن كۇرەستىم. 16 جىلدا بەس الەم چەمپيوناتىندا ميلليونداعان وتانداسىمنىڭ قولداۋىمەن ۇلى فۋتبولشىلارمەن وينادىم. مەن بار كۇش-جىگەرىمدى جۇمسادىم. بار ونەرىمدى الاڭدا كورسەتتىم. مەن ەشقاشان كۇرەستەن باس تارتقان ەمەسپىن.

امال نە، كەشە مەن ارمانىمنان ايىرىلدىم. قىزبالىققا سالىنعىم كەلمەيدى. كوپ ايتىلدى، كوپ جازىلدى، كوپتەگەن سپەكۋلياتسيا بولدى. بىراق مەن پورتۋگالياعا دەگەن ادالدىعىم ءبىر ساتكە دە ۇزىلمەگەنىن بارىنە ايتقىم كەلەدى. مەن ارقاشان ورتاق ماقسات ءۇشىن كۇرەسەتىم. ەشقاشان كوماندالاستارىم مەن ەلىمنەن باس تارتقان ەمەسپىن.

قازىر نە باسقا ايتارىمىمدى بىلمەي وتىرمىن. راحمەت، پورتۋگاليا! راحمەت، كاتار!  ارمانىم باردا ءبارى تاماشا ەدى… ەندى ءبارى تىنىشتالىپ، اركىم ءوزى وي قورىتاتىن شىعار، — دەدى فۋتبولشى.

قولدا بار مالىمەتكە قاراعاندا، رونالدۋ 2026 جىلى پورتۋگاليا اقش پەن كانادادا وتەتىن الەم چەمپيوناتىنا جولداما السا، جاسىل الاڭعا شىعۋى مۇمكىن. ول كەزدە فۋتبولشىنىڭ جاسى 41-دە بولادى.

داستان كەنجالين،

استانا