سۋردليمپيادا ويىندارىنىڭ جۇلدەگەرلەرىنە پاتەر كىلتتەرى تابىس ەتىلدى

جامبىل وبلىسىندا ۇزدىك سپورتشىلار ماراپاتتالدى.

وبلىس اكىمدىگى ءباسپاسوز قىزمەتىنىڭ حابارلاۋىنشا، «جىل ۇزدىگى – 2022» سپورتتىق نوميناتسيالاردى تاپسىرۋ سالتاناتىنا ءوڭىر اكىمى نۇرجان نۇرجىگىتوۆ قاتىسقان. ءوزىنىڭ قۇتتىقتاۋ سوزىندە ول وڭىردەگى جەتىستىكتەرگە، اتقارىلىپ جاتقان اۋقىمدى جۇمىستارعا توقتالدى.

«قاسيەتتى اۋليەاتا ءوڭىرىنىڭ جاقسى سپورتتىق ءداستۇرى مەن جەڭىستى جولدارى ەجەلدەن قالىپتاسقان. سول ءداستۇردى جوعالتپاۋ، سول ابىروي بيىگىنەن تۇسپەۋ ءبىزدىڭ العا قويعان مىندەتىمىز ەكەنىن ەستەن شىعارماۋ كەرەك. وبلىس سپورتشىلارى بيىل رەسپۋبليكالىق جانە حالىقارالىق بايراقتى باسەكەلەردە 1500-گە جۋىق مەدالعا يە بولدى. قازىر 683 سپورتشى ءتۇرلى دەڭگەيدەگى ۇلتتىق قۇراما كوماندالارعا مۇشە بولىپ وتىر. وڭىرىمىزدە جوعارعى سپورت، ونىڭ ىشىندە بۇقارالىق سپورتتىڭ دامۋىنا ۇلكەن كوڭىل بولىنۋدە. 2022 جىلدىڭ قورىتىندىسى بويىنشا وبلىستا دەنە شىنىقتىرۋ جانە سپورتپەن جۇيەلى تۇردە شۇعىلدانۋشىلار قاتارى 475،3 مىڭ ادامعا نەمەسە 39،1 پايىزعا جەتتى. 2025 جىلعا دەيىن بۇل كورسەتكىشتى 50 پايىزعا جەتكىزۋ جوسپارلانىپ وتىر.

وبلىستىڭ بارلىق قالالارى مەن اۋدان ورتالىقتارىندا، سونداي-اق اۋىلداردا زاماناۋي سپورت زالدارى مەن ارنايى الاڭدارىنىڭ سانى ارتۋدا. بيىل تالاس جانە قورداي اۋداندارىندا دەنە شىنىقتىرۋ ساۋىقتىرۋ كەشەندەرى ىسكە قوسىلسا، وبلىس بويىنشا 62 سپورت الاڭشاسى قولدانىسقا بەرىلدى. تاعى دا 3 سپورت نىسانىن جىل اياعىنا دەيىن قولدانىسقا بەرىپ، 13 نىساننىڭ قۇرىلىسى 2023 جىلعا وتپەلى بولىپ وتىر»، — دەدى نۇرجان نۇرجىگىتوۆ.

بۇدان سوڭ وبلىس اكىمى جىلدىڭ ۇزدىك سپورتشىلارىن ءتۇرلى اتالىمدار بويىنشا ماراپاتتادى. ناقتىراق ايتساق، ءححىV جازعى سۋردليمپيادا ويىندارىنىڭ جۇلدەگەرلەرى عابيت ەسجانوۆ، عاسىر تۇرعىنباي، اننا كراموروۆا، اسان نۇرجان، فەريدە كارا وگلى، ولجاس رىسجانوۆ، ەۆەلينا ەگەمبەرديەۆا، ايدوس تۇگەلباەۆقا پاتەر كىلتتەرى تابىس ەتىلدى.

سونداي-اق «№2 وبلىستىق مامانداندىرىلعان بالالار – جاسوسپىرىمدەر سپورت مەكتەبى» كمم ارمرەستلينگتەن جاتتىقتىرۋشى ۆيتالي ترۋبينگە مادەنيەت جانە سپورت مينيسترلىگىنىڭ «دەنە شىنىقتىرۋ مەن سپورتتى دامىتۋعا سىڭىرگەن ەڭبەگى ءۇشىن» توسبەلگىسى، سارىسۋ اۋداندىق ات بايگەسى فەدەراتسياسىنىڭ جەتەكشىسى الپىسباي يساباەۆقا «قۇرمەتتى سپورت قىزمەتكەرى» توسبەلگىسى بەرىلدى.

وزگە دە ۇزدىك سپورتشىلار مادەنيەت جانە سپورت مينيسترلىگىنىڭ قۇرمەت گراموماسىمەن، وبلىسقا سىڭىرگەن ەڭبەگى ءۇشىن بەلگىسىمەن، جامبىل وبلىسى اكىمىنىڭ قۇرمەت گراموتاسى جانە العىس حاتىمەن ماراپاتتالدى.

سونىمەن قاتار، پاريج – 2024 ءXXXىىى جازعى وليمپيادا جانە ءXVIى جازعى پاراليمپيادا ويىندارىنا ليتسەنزيا الۋعا ۇمىتكەر سپورتشىلارعا سەرتيفيكاتتار جانە ۇلتتىق وليمپيادا كوميتەتىنىڭ توسبەلگىلەرى تابىس ەتىلدى.

دينارا امانتاي،

استانا