قىسقى ۋنيۆەرسيادا باستالدى

اقش-تىڭ لەيك-پلەسيد قالاسىندا قىسقى ۋنيۆەرسيادا سالتاناتتى تۇردە اشىلدى. وعان ەلىمىزدىڭ اتىنان 78 سپورتشى قاتىسادى.

قۇراما شتاتتاردا ەل نامىسىن 17 جوعارى وقۋ ورنىنىڭ ستۋدەنتتەرى سپورتتىڭ 10 تۇرىنەن قورعايدى. ونىڭ ىشىندە شاڭعىمەن جارىسۋدان – 14، شورت-ترەكتەن – 12، بياتلوننان – 9، مانەرلەپ سىرعاناۋ مەن كونكيمەن جۇگىرۋدەن – 6، سنوۋبورد، تاۋ شاڭعىسى سپورتى، تۇعىردان سەكىرۋ مەن قوسسايىستان – 2، شايبالى حوككەيدەن 23 وتانداسىمىز جارىس جولىنا شىعادى.

قازاقستان قۇراماسى 2017 جىلى ەلىمىزدە وتكەن دۇنيەجۇزىلىك ۋنيۆەرسيادا ويىندارىندا 11 التىن، 8 كۇمىس جانە 17 قولا جۇلدەمەن جالپىكوماندالىق ەسەپتە 2-ورىننان كورىنگەن بولاتىن.

بيىلعى ويىنداردى «Qazsport» تەلەارناسى تىكەلەي ەفيردە كورسەتەدى.

ۋنيۆەرسيادا ويىندارى 1924 جىلدان بەرى وتكىزىلىپ كەلەدى. ول 1959 جىلعا دەيىن بۇكىلالەمدىك ۋنيۆەرسيتەت ويىندارى دەپ اتالىپ كەلدى. سول جىلدان باستاپ ونىڭ اتى ۋنيۆەرسيادا بولىپ وزگەردى. وعان قاتىسۋ تالاپتارى ەنگىزىلدى. تالاپ بويىنشا 17 جاسقا تولعان جانە 28 جاستان اسپاعان جىگىتتەر مەن قىزدار ويىندارعا قاتىسۋعا مۇمكىندىك الادى.

داستان كەنجالين،

استانا