Ýnıversıada: Qazaqstan hokkeıshileri bir týr qalǵanda pleı-offqa shyqty

Qysqy ýnıversıadada shaıbaly hokkeıden Qazaqstan quramasy tórtinshi oıynyn Slovakııaǵa qarsy ótkizip, qarsylastaryn 4:0 esebimen utty. Osylaısha otandastarymyz bir týr qalǵanda pleı-off básekesine shyqty.

Qazaqstandyq hokkeıshiler V tobynda Ońtústik Koreıa, Vengrııa, Ulybrıtanııa, Slovakııa jáne AQSh-pen synǵa túsýde. Atap aıtqanda, 12 qańtarda Ońtústik Koreıany – 5:1, odan keıin Vengrııany – 9:1, Ulybrıtanııany 15:1 esebimen jeńdi.

Búgingi oıynda Qazaqstan quramasynan Maksım Mýhametov (8-mınýt), Stanıslav Aleksandrov (10-mınýt), Batyrlan Mýratov (20-mınýt) jáne Oleg Boıko (29-mınýt) shaıba soqty.

Slovakııa quramasy buǵan deıin Vengrııany – 4:0, Ulybrıtanııany – 14:0, AQSh-ty 5:2 esebimen jeńgen edi.

Endi Qazaqstan stýdentter quramasy 18 qańtarda AQSh-quramasymen kezdesedi.

Atalǵan toptan alǵashqy eki oryndaǵy quramalar 21 qańtarda ótetin jartylaı fınalǵa joldama alady. Fınal men úshinshi oryn úshin oıyn 22 qańtar kúni bolady.

Shaıbaly hokkeıden Qazaqstan stýdentter quramasy dúbirli dodaǵa toǵyz márte qatysty. 1995 jyly Ispanııanyń Haka qalasynda chempıondyq tuǵyrǵa kóterilse, 1993, 2013, 2015, 2017 jyldarda kúmis, 2007 jyly qola medal ıegeri atandy.

Dastan KENJALIN,

ASTANA