ساعدات سادىق: «قىسقى وليمپياداعا ۇيالماي جىبەرەتىن سپورتشىلارىمىز بار»

جاستارىمىز اقش-تىڭ لەيك-پلەسيد قالاسىندا وتكەن قىسقى ۋنيۆەرسيادادا 11 مەدالءدى جەڭىپ الدى.  قازاقستان دەلەگاتسياسىن ۇلتتىق عىلىمي پراكتيكالىق دەنە تاربيەسى ورتالىعىنىڭ باس ديرەكتورى ساعدات كابىر ۇلى سادىقوۆ باستاپ بارعان ەدى. ءبىز باس ديرەكتورمەن سۇحباتتاستىق.

— ساعدات مىرزا، اقش-تان جەتكەن اقجولتاي جاڭالىقتارعا قۋانىپ وتىرمىز. ستۋدەنتتەرىمىز جاراپ-اق تۇر!

— سوڭعى جارىس كۇنىندە ءبىزدىڭ حوككەيشىلەر جاپونيا كومانداسىن 8:1 ەسەبىمەن ۇتىپ، ەلىمىزگە قولا مەدال سىيلادى. بۇلان بۇرىن كانادا كومانداسىن ۇتادى دەگەن ويدا بولعان ەدىك. 4:1 ەسەبمەن جەڭىلسەك تە، تارتىستى وتكەن ويىننان ءبىزدىڭ كوماندانىڭ ساعى سىنبادى. ولاي دەيتىن سەبەبىم، «اقش كومانداسىمەن نەگىزگى ويىن ۋاقىتىندا تەڭ دارەجەدە ويناپ، قوسىمشا ۋاقىتتا ەسە جىبەرگەن جاپونيامەن كەزدەسۋ قالاي بولار ەكەن» دەگەن ۋايىمىم بولدى. بىراق بۇل كۇدىگىم حوككەيشىلەرىمىزبەن تىلدەسكەن سوڭ سەيىلدى. «كىممەن جانە قالاي ويناعانىنا قاراماڭىز، ءبىز جەڭەمىز!» دەگەن سوزدەرى وتە سەنىمدى شىقتى. كوزدەرىندە وت، سوزدەرىندە جالىن بار ءبىزدىڭ جاستارعا سەنىم ارتتىم. سەنىمدى اقتادى. سوزدەرىندە تۇردى.  الپاۋىت 12 مەملەكەتتىڭ جاس حوككەيشىلەرىنىڭ باسەكەسىندە قازاقستاننىڭ كومانداسى جۇلدەگەر اتاندى. ەل قورجىنىنا ەڭ سوڭعى جۇلدەنى شاڭعىمەن جۇگىرۋدەن سىنعا تۇسكەن كسەنيا شالىگينا سالدى. بۇگىن ۋنيۆەرسيادانىڭ جابىلۋى سالتاناتى بولدى.

— بارەكەلدى! ۋنيۆەرسياداعا قاتىسۋشىلار قالاي تاڭدالدى؟

— ءبىر مىسال كەلتىرە كەتەيىن، اقش-تا ءار وقۋ ورنىنىڭ ءوز حوككەي كلۋبتارى بار. ال ءبىز ونداي دەڭگەيگە ءالى جەتە قويعان جوقپىز. سوندىقتان ءبىز ۋنيۆەرسيتەتتەر اراسىندا ىرىكتەۋ وتكىزدىك. سونداي-اق قىسقى سپورت تۇرلەرىنەن ونەر كورسەتەتىن ۇلتتىق قۇراما ساپىنداعى ستۋدەنت جاستارعا سەنىم ارتتىق. فەدەراتسيا ۇسىنعان ءارى مىقتى، ءارى ستۋدەنت سپورتشىلاردى نيۋ-يوركقا الىپ كەلدىك.

— بۇل جولعى ۋنيۆەرسيادادا قىسقى سپورت تۇرلەرىنەن وسال دەگەن سىنعا قالىپ جاتاتىن قاراگوزدەرىمىزدىڭ كوپتەپ قاتىسقانىن بايقادىق. ولار جەڭىمپاز بولىپ، جۇلدەگەر اتانىپ جاتتى…

— ءيا، بۇل ناتيجەلەر – كوڭىلگە ەرەكشە جىلۋ سىيلادى. ايتا كەتۋ كەرەك، قىسقى ۋنيۆەسيادادا تۇڭعىش رەت قازاق بالاسى بياتلوننان چەمپيون بولدى. ەشكىمدى ءبولىپ-جارىپ وتىرعانىم جوق. بىراق تاريحي فاكت ەكەنى راس. تاعى ءبىر ايتا كەتەتىن جايت: بۇرىندارى ۋنيۆەرسياداعا قاتىسقان سپورتشىلارىمىزدىڭ كوبى كوش سوڭىندا قالىپ قويىپ جاتاتىن كەزدەر ءجيى بولاتىن. ال بۇل جولى ءبارى دە لايىقتى ونەر كورسەتتى. قازاقستاندىق سپورتشى جاستار وزگە باسەكەلەستەرىنە تاباندى قارسىلىق كورسەتە الدى. وسىلايشا، قىسقى سپورت تۇرلەرىنەن بولاشاقتا وليمپيادا التىنىن كوپتەپ كۇتۋگە بولادى دەگەن ويعا قالىپ وتىرمىن. ارينە، الدە دە ەڭبەكتەنۋىمىز كەرەك. جالپى، قىسقى وليمپياداعا ۇيالماي جىبەرە الاتىن سپورتشىلارىمىز بار.

— وسى جولى وتكىزىلگەن ۋنيۆەرسيادانىڭ ەرەكشەلىگى بار ما؟

­- بۇرىندا بۇل دوداعا 28 جاسقا دەيىنگى سپورتشىلار قاتىساتىن. ال وسى جولى 25 جاستاعى جاستار باق سىنادى. سوعان قاراماستان قول جەتكىزگەن جەتىستىكتەرىمىزدى ەستىپ-كورىپ وتىرسىزدار. سول سەبەپتى وليمپيادا ويىندارىندا ءۇمىت كۇتتىرەتىن سپورتشىلارىمىز بار دەپ ايتۋعا بولادى. ەندى ءبىز ۇلتتىق عىلىمي پراكتيكالىق دەنە تاربيەسى ورتالىعى رەتىندە ەلىمىزدە قىسقى سپورت تۇرەرىنىڭ قايسىسىن دامىتا الامىز جانە ليگالاردى قالاي قالىپتاستىرامىز دەگەن ماسەلەلەردى ويلاسىپ وتىرمىز. ءبىز وسى باعىتتاعى جۇمىستاردى قولعا الۋىمىز كەرەك. ماسەلەن، ءوزىڭىز دە كۇنى كەشە قازاقستان مەن كانادا اراسىنداعى حوككەي ويىنىن تاماشالاعان شىعارسىز. كانادالىق حوككەيشى ستۋدەنتتەر قالاي ونەر كورسەتتى! ياعني، كانادا مەملەكەتى ءۇشىن كەلەسى وليمپيادا ويىندارىنا قاتىساتىن سپورتشىلار دايىن دەگەن ءسوز. ءبىز دە وسى باعىتتا جۇمىس ىستەۋىمىز كەرەك.

— الداعى جوسپارلارىڭىز جايلى بىلە وتىرساق…

— بۇيىرسا، قىتايدا وتەتىن جازعى ۋنيۆەرسياداعا ەل ىشىندە ىرىكتەۋ وتىكىزەمىز. دايىندىق باستالادى. ستۋدەنتتەر وداعىممەن بىرلەسىپ رەگلامەنت جاسايمىز. سوسىن ىرىكتەۋدە توپجارعان جاستاردى قىتايعا الىپ بارامىز. سونىمەن قاتار جوعارى ءبىلىم جانە عىلىم ءمينيسترى ساياسات نۇربەكتىڭ تاپسىرماسىمەن ستۋدەنتتەردى ۋنيۆەرسياداعا جاي عانا الىپ بارمايمىز، ءبىز الدىمەن وقۋ-جاتتىعۋ جيىنىن وتكىزەمىز جانە ولارمەن بىرگە عىلىمي جۇمىستار جۇرگىزەمىز.

— جاستاردىڭ قىسقى سپورت تۇرلەرىنە دەگەن قىزىعۋشىلىعى جايلى ايتا الاسىز با؟

-ۋنيۆەرسيادا – ولميپيادادان كەيىنگى ەڭ ءىرى دودا. سوندىقتان بولاشاقتا وليمپيادا جۇلدەلەرىنە زور ۇمىتپەن قاراۋعا بولادى. بىراق، بۇل جەردە عىلىمي جۇمىستار جۇرگىزىلۋى قاجەت.

كەشە ءبىز جاپونيادان كەلگەن ارىپتەستەرىمىزبەن سويلەستىك. ولار قىسقى سپورت تۇرلەرىنە قاتتى ءمان بەرىپ وتىر. ءبىر عانا مىسال، كەزىندە شاعىمەن سىرعاناۋدان قازاقستان قاي تۇعىردا تۇردى، جاپونيا قاي ساتىدا ەدى؟ ال قازىر جاپوندار ءبىزدى باسىپ وزدى. ءتىپتى، حوككەي توڭىرەگىندە دە ويلاناتىن سۇراقتار كوپ. مىنە، وسىنداي ماسەلەلەردى شەشۋ ءۇشىن جۇمىستاردى مەكتەپتەن باستاۋىمىز كەرەك. بۇل رەتتە وقۋ اعارتۋ مينيسترلىگى دە ۇلكەن شارۋالار اتقارعالى وتىر. سوندىقتان وسىلاردى ءبىر جۇيەگە كەلتىرۋىمىز كەرەك. مىسالى، مەكتەپ – ستۋدەنت – ۇلتتىق كوماندا دەگەن ءۇش ساتى جاساۋىمىز قاجەت. قازىرگى ۋاقىتتا سوعان قاراي بەتبۇرىپ وتىرمىز.

 

— اڭگىمەڭىزگە راحمەت!

اڭگىمەلەسكەن جانبولات كەنجەعۇل،

استانا

 

P.S. بۇگىن تۇندە سپورتشىلاردىڭ الدى ەلگە ورالا باستايدى. ايتا كەتەيىك، ەل قورجىنىندا ءۇش التىن، ءتورت كۇمىس جانە ءتورت قولا بار.

بياتلون — ۆاديم كۋرالەس  (1 ورىن)

شاڭعىمەن سەكىرۋ — دانيل ۆاسيلەۆ (1 ورىن)

بياتلون – ەرلەر كوماندالىق سپرينت 10 كم:

بەكەنتاي  تۇرلىبەكوۆ — 1 ورىن

الەكساندر مۋحين – 3 ورىن

 

ايەلدەر اراسىندا 3 × 5 كم ەستافەتالىق شاڭعى جارىسى – (3 ورىن)

1. ايشا راقىشەۆا،
2. كسەنيا شالىگينا،
3. نادەجدا ستەپاشكينا.

 شاڭعى جارىسى ماسس ستارت 15 كم – كسەنيا شالىگينا  (3 ورىن)

ەرلەر اراسىنداعى ترامپلين. ەكىنشى ورىن 

1. دانيل ۆاسيلەۆ،
2. سەرگەي تكاچەنكو.

 شورت-ترەكتەن كوماندالىق ميكس (2000 م). ەكىنشى ورىن

1. الينا اجعاليەۆا
2. يانا حان
3. ماليكا ەرمەك
4. ءادىل عالياحمەتوۆ
5. ەركەبۇلان شامۋحانوۆ
6. الىشەر ابىلقاتىموۆ

 ەرلەر اراسىندا بياتلوننان ماسس ستارت (15 كم) — الەكساندر مۋحين (2 ورىن)

ەرلەر (5000 م). ەكىنشى ورىن

1. ءادىل عالياحمەتوۆ
2. ەركەبۇلان شامۋحانوۆ
3. ۆالەري كليمەنكو
4. سانجار ءجانىسوۆ
5. انتون حۆان

 شايبالى حوككەي. ءۇشىنشى ورىن

1. يۆان گاۆريلەنكو
2. ءمادي ديحانبەك
3. ارتەم كورولەۆ
4. كيريلل پولوحوۆ
5. نيكيتين كيريلل
6. ابىلايحان سۇلەيمەنوۆ
7. دانيل بۋتەنكو
8. ستانيسلاۆ الەكساندروۆ
9. ولەگ بويكو
10. الەكساندر بوريسەۆيچ
11. اندرەي بۋيالسكي
12. دياس گۋسەينوۆ
13. دانيار سايان
14. ماكسيم مۇحامەتوۆ
15. ماكسيم مۋسوروۆ
16. باتىرلان مۇراتوۆ
17. اباي ماڭعىسباەۆ
18. ءاليحان ومىربەكوۆ
19. ۆسەۆولود لوگۆين
20. دەنيس قاراتاەۆ
21. رومان كالمىكوۆ
22. اندرەي شۋتوۆ