SportPress.kz قازاقستان سپورت جاڭالىقتارى
تەننيستەن اۆستراليانىڭ اشىق چەمپيوناتىنىڭ 1/8 فينالىندا ەلەنا رىباكينا الەمنىڭ ءبىرىنشى راكەتكاسى پولياك يگا سۆەنتەكتى جارىس جولىنان شىعارىپ تاستاعان سوڭ، شيرەك فينالدا لاتۆيالىق ەلەنا وستاپەنكومەن كۇش سىناستى.
كەزدەسۋ 1 ساعات 21 مينۋتقا سوزىلدى. ماتچتا رىباكينا قارسىلاسىن 6:2، 6:4 ەسەبىمەن جەڭدى.
ەندى ەلەنا رىباكينا فينالعا شىعۋ ءۇشىن الەمنىڭ 18-راكەتكاسى، «ۇلكەن دۋلىعا» جارىسىنىڭ ەكى مارتە جەڭىمپازى، بەلارۋستىڭ وكىلى ۆيكتوريا ازارەنكومەن نەمەسە الەمنىڭ ءۇشىنشى راكەتكاسى، امەريكالىق دجەسسيكا پەگۋلامەن كەزدەسەدى.
قاڭتاردىڭ 16-سىندا باستالعان اشىق چەمپيوناتتىڭ ايەلدەر تۋرنيرىندە ەكىنشى اپتاعا «ۇلكەن شلەم تۋرنيرلەرىنىڭ» بەس بىردەي چەمپيوندارى – ۆيكتوريا ازارەنكو، ەلەنا وستاپەنكو، ەلەنا رىباكينا، يگا سۆەنتەك جانە باربورا كرەيچيكوۆا جەتتى. ولاردىڭ ءبارى جەرەبەدەگى ەلەكتىڭ جوعارعى جارتىسىنان ورىن الدى.
وستاپەنكومەن كەزدەسۋدىڭ الدىندا رىباكينا 1/8 فينالدىق شايقاستا يگا سۆەنتەكتى جەڭگەن ەدى. بۇل كەزدەسۋ 1 ساعات 19 مينۋتقا سوزىلدى. ماتچ 6:4، 6:4 ەسەپتەرىمەن قازاقستاندىق سپورتشىنىڭ پايداسىنا شەشىلدى. سوڭعى سەتتىڭ باسىندا لەنا قارسىلاسىنان 0:3 ەسەبىمەن ۇتىلىپ تۇردى. بىراق ەسەسىن كوپ ۇزاماي قايتارىپ، اقىرىندا العا شىقتى.
يگا 2022 جىلى «رولان گارروس» پەن US Open تۋرنيرىندە كوش باستاسا، ەلەنا ۋيمبلدوندا ءبىرىنشى بولعان ەدى. الايدا، وسى كەزدە رەسەيلىك جانە بەلارۋستىك تەننيسشىلەر بانعا جىبەرىلۋلەرىنە بايلانىستى رەيتينگىلىك ۇپايلارىنان ايىرىلىپ قالعاندىقتان، قازاقستان وكىلى ءوز رەيتينگىسىنە 2000 بالل قوسا المادى. ءسويتىپ، 25-ساتىدا قالىپ قويدى.
«Australian Open» مەلبۋرندەگى «مەلبۋرن پارك رود لەيۆەر ارەنا» ستاديونىندا بولىپ جاتىر. اۆستراليانىڭ اشىق چەمپيوناتى 30 قاڭتاردا ءوز مارەسىنە جەتەدى.
داستان كەنجالين،
استانا
