Australian Open-2023: Rybakına búgingi jeńisi úshin 288 mln teńge aldy

Tennısshi Elena Rybakına Avstralııanyń Melbýrn qalasynda ótip jatqan Australian Open-2023 ashyq chempıonatynda jartylaı fınalǵa shyqqany úshin qomaqty aqshalaı syılyq alady. Týrnır uıymdastyrýshylary oǵan 623 500 dollar (288 mln teńgeden astam, — red.) somaǵa chek ázirledi.

Eger Rybakına AusOpen-2023 chempıonatynyń fınalyna jetse, bul syıaqy eki esege jýyq kóbeıedi.  Onyń ústine otandasymyz qazir Tennısten áıelder qaýymdastyǵynyń Live reıtınginde 12-orynda tur.

Tennısshi Australian Open-2023 chempıonatyn álemniń 25-raketkasy retinde bastaǵan edi.

Jalpy, Avstralııanyń ashyq chempıonatynyń bıylǵy júlde qory rekordtyq kórsetkishke jetip, 52 mln dollar boldy. Áıelder men erler arasyndaǵy jeke synda chempıondar úsh mıllıon AQSh dollaryna jýyq aqsha alady.

Dastan KENJALIN,

ASTANA