Boksshy Jasmın Qızatova men Gúlsaıa Erjan Azııa chempıony atandy

Taılandtyń astanasy Bangkok qalasynda 22 jasqa deıingiler arasynda ótip jatqan Azııa chempıonatynda Jasmın Qızatova men Gúlsaıa Erjan bas júldeni jeńip aldy.

Jasmın Qızatova 70 kelige deıingi salmaqta ózbekstandyq Azıza Zokırovamen kezdesti. Bul kezdesý óte tartysty jáne qyzyqty ótti. Onda otandasymyz qarsylasyna des bermeı, úsh raýndta da bosańsymaı, 3:2 esebimen utty. Osy jeńis Qazaqstan qorjynyna alǵashqy altyn júlde ákeldi. Sodan keıin sharshy alańǵa 81 kelige deıingi salmaq dárejesindegi boksshylar kóterildi. Bul sanatta rıngke Gúlsaıa Erjan shyqty. Ol fınalda alań ıesi Pornıppa Chýtımen qolǵap túıistirdi.

Kezdesýde birinshi raýndta Taıland boksshy basymdyq tanytqanymen ekinshi raýndta otandasymyz tarazy basyn teńestire aldy. Úshinshi raýdta Gúlsaıa Erjan qarsylasyn aıqyn basymdyqpen jeńdi. Sóıtip, tóreshilerdiń sheshimimen qazaq qyzy 3:2 esebimen utty.

Osylaısha, Qazaqstan qyzdar quramasy Azııa birinshiliginde 2 altyn, 7 qola medaldi jeńip aldy.

Budan buryn Móldir Toıkova (50 kg), Ánel Saqysh (54 kg), Vıktorııa Grafeeva (57 kg), Shahnaz Isaeva (60 kg), Nazerke Serik (63 kg), Aqnar Iщanova (66 kg) men Dana Dıdaı (75 kg) qola júldege ıe bolǵan edi.

Dastan KENJALIN,

ASTANA