ستاديون سالىنۋعا ءتيىس جەر سەگىز جىلدان بەرى بوس جاتىر

مۇنايلى اۋدانى باسقۇدىق اۋىلىنداعى بالالار جانە جاسوسپىرىمدەر سپورت مەكتەبىنىڭ ستاديونى سالىنۋعا ءتيىس ۋچاسكە سەگىز جىلدان بەرى بوس جاتىر.

ماڭعىستاۋ وبلىسىنىڭ اكىمى نۇرلان نوعاەۆ پەن اۋدان اكىمى ەرجان كۇمىسقاليەۆ ول جەردە ءبىر جارىم جىلدان بەرى قوقىس كونتەينەرلەرى مەن ەلەكتر باعانالارى جاتقانىن بىلە مە ەكەن؟ بۇل – بالالار ءۇشىن قاۋىپتى ءارى زيان. ال اكىمدەرىمىز ءوز بالالارى بارمايتىن جەر بولعاسىن، باسىن اۋىرتقىسى كەلمەيتىن سياقتى.

مەملەكەت باسشىسى قاسىم-جومارت توقاەۆ: «ازاماتتاردىڭ سالاۋاتتى ءومىر سالتى – سالاماتتى ۇلت قالىپتاستىرۋدىڭ نەگىزگى شارتى. سوندىقتان بۇقارالىق جانە بالالار سپورتىنا ەرەكشە نازار اۋدارۋىمىز قاجەت. بۇل ستراتەگيالىق ماڭىزى بار باسىم مىندەت»، – دەگەن ەدى.

باسقۇدىق اۋىلى اكىمدىگىنىڭ جانىنان ءوتىپ بارا جاتساڭىز، قاراما قارسى تۇرعان اۋلاعا نازار سالىڭىز. سىرتتان قاراعان ادام مىنا جەردە ءبىر مەكەمە بار شىعار دەپ ويلاپ قالادى. بىراق اۋلانىڭ ىشىندە قوقىس كونتەينەرلەرى مەن ەلەكتر باعانالارى عانا جاتىر. ءبىر جارىم جىلدان بەرى جانىندا بالالار اينالا جۇگىرەدى، فۋتبول وينايدى. سوندا ولاردىڭ قاۋىپسىزدىگىنە كىم جاۋاپ بەرەدى؟

انگاردىڭ ءىشى تار. سپورت مەكتەبىنىڭ اۋلاسىنا فۋتبول، ۆولەيبول، ۇلكەن تەننيس پەن مونشا، جاتاقانا سالىنۋى كەرەك. سەگىز جىلدان بەرى اۋداندىق مادەنيەت جانە سپورت ءبولىمىنىڭ باسشىسى بولىپ وتىرعان ەسەنباي قۇلي نەگە وسى جوسپاردى ىسكە اسىرمايدى؟ ول ءتىپتى، اۋدانىمىزدىڭ جاتتىقتىرۋشىلارىمەن كەزدەسىپ، جينالىس تا وتكىزبەگەن.

وتكەن جىلدىڭ سوڭىندا باسقۇدىق بالالار-جاسوسپىرىمدەر سپورت مەكتەبى «جىل قورىتىندىسىن» ۇيىمداستىرىپ، جەتىستىككە جەتكەن سپورتشىلار مەن جاتتىقتىرۋشىلاردى ماراپاتتادى. سوندا اۋداندىق مادەنيەت جانە سپورت ءبولىمىنىڭ جۇمىسىن باسقۇدىق سپورت مەكتەبىنىڭ باسشىسى وتەگەن سابىتاەۆ ۇيىمداستىردى. بۇعان سپورت مەكتەبىنىڭ ورىنباسارى سۇندەت ريزباەۆ پەن ادىسكەر-نۇسقاۋشى نۇربول ۋتەسينوۆ ءبىر اپتاداي دايىندالىپ، اتسالىستى. سوندا بايقاعانىم، اۋداندىق مادەنيەت جانە سپورت بولىمىنە جاڭا باسشى كەرەك ەكەن. ياعني، مۇنايلى اۋدانىنىڭ سپورت سالاسى ۇلكەن وزگەرىستەردى كۇتەدى.

بىزدەر «جاڭا قازاقستاندى» استانا مەن وبلىس ورتالىقتارىندا عانا ەمەس، اۋدان-اۋىلداردا تۇگەل سەزىنگىمىز كەلەدى.

ايبەك مۇحانوۆ،

قازاقستان جۋرناليستەر وداعىنىڭ مۇشەسى

ماڭعىستاۋ وبلىسى،

 اقتاۋ قالاسى.