جاسوسپىرىمدەر شاڭعىمەن تۇعىردان سەكىرۋدەن وليمپياداعا جولداما الدى

الماتىدا IV قىسقى جاستار سپورت ويىندارى بولىپ جاتىر. بۇگىن الاتاۋ بوكتەرىندەگى قالادا شاڭعىمەن تۇعىردان سەكىرۋدەن ۇزدىك جاسوسپىرىمدەر انىقتالىپ، ماراپاتتالدى. بۇل تۋرالى مادەنيەت جانە سپورت مينيسترلىگىنىڭ سپورتتى دامىتۋ ديرەكتسياسى حابارلادى.

سوڭعى جارىس كۇنى ارالاس كوماندالىق سىندا (2 قىز بەن 2 ۇل، — رەد.) الماتى قالاسىنىڭ ءبىرىنشى كومانداسى ايتارلىقتاي باسىمدىقپەن جەڭىسكە جەتتى. ودان كەيىنگى ورىنعا الماتى-2 كومانداسى مەن شىعىس قازاقستان وبلىسىنىڭ سپورتشىلارى يە بولدى.

جالپى ەسەپتە الماتى قالاسى جەكە-دارا توپ جاردى. شىعىس قازاقستان وبلىسى ەكىنشى ورىن السا، الماتى وبلىسى ۇزدىك ۇشتىكتى تۇيىندەدى.

بارلىعى «سۇڭقار» حالىقارالىق شاڭعى ترامپليندەر كەشەنىندە 4 ءوڭىردىڭ (الماتى قالاسى، شقو، جەتىسۋ جانە الماتى وبلىسى، — رەد.) 100-دەن استام سپورتشىسى 5 جاس ساناتىنا ءبولىنىپ، سىنعا ءتۇستى. ولار جەكەلەي سىندا ك-20 (12 جاس)، ك-40 (13-15 جاس)، ك-60 (14-16 جاس)، ك-95 (17-20 جاس) تۇعىرىنان سەكىرسە، كوماندالىق باسەكە ك-90 ترامپلينىندە بولدى.

جارىس وزىمە قاتتى ۇنادى. قيىن بولدى دەپ ايتا المايمىن. دەسە دە تارتىس سوڭىنا دەيىن سوزىلدى. شاڭعىمەن تۇعىردان سەكىرۋگە 6 جاسىمدا كەلگەنمىن. بيىل وسى سپورتپەن اينالىسقانىما 10 جىل بولادى. كۋميرىم –دانيل ۆاسيلەۆ. جاقىن ارادا ونىمەن بىرگە جاتتىعىپ، بىرگە ونەر كورسەتۋدى قالايمىن،-دەدى ءۇش التىن مەدال (جەكەلەي جانە كوماندالىق) جەڭىپ العان الماتىلىق يليا ميزەرنىح.

ەندى الماتىدا كەرلينگشىلەردىڭ جارىسى بولىپ جاتىر. بارلىعى ەكى قالا مەن سەگىز وبلىستان كەلگەن كوماندا (200-گە تارتا جاس سپورتشى) ەكى توپقا بولىنگەن. جەڭىمپاز بەن جۇلدەگەرلەر 12 اقپاندا بەلگىلى بولادى.

جالپى، بيىلعى جارىستا 11 سپورت تۇرىنەن ۇزدىكتەر انىقتالادى. بارلىق باسەكەدەن سوڭ ءار سپورت تۇرىنەن ەلىمىزدىڭ جاستار قۇراماسى جاساقتالىپ، الداعى حالىقارالىق رەسمي جارىستارعا، ونىڭ ىشىندە 2024 جىلى وڭتۇستىك كورەيانىڭ كانۆوندو قالاسىندا وتەتىن قىسقى جاسوسپىرىمدەر وليمپياداسىنا باراتىن سپورتشىلاردى انىقتالادى. سونداي-اق 2026 جىلعى يتاليانىڭ ميلان قالاسىندا وتەتىن وليمپيا ويىندارىنا دايىندالۋعا قاتىساتىن سپورتشىلار ىرىكتەلەدى.

ويىنداردىڭ سالتاناتتى اشىلۋى 23 اقپان كۇنى پاۆلودار قالاسىندا ساعات 14.00-دە، ال جابىلۋ ءراسىمى  8 ساۋىردە ساعات 14.00-دە استانا قالاسىندا بولادى.

بيىلعى جاستار سپورت وينىدارىنىڭ جەڭىمپازدار كەلەسى جىلى وڭتۇستىك كورەيانىڭ كانۆوندو قالاسىندا وتەتىن قىسقى جاسوسپىرىمدەر وليمپياداسىنا بارادى.

شامكەن بايىربەك،

الماتى

فوتو: مادەنيەت جانە سپورت مينيسترلىگىنىڭ سپورتتى دامىتۋ ديرەكتسياسى